Polyeto sa SONA 2025

SA IKAAPAT NA SONA NI BBM

WAKASAN ang "BULOK na Pilipinas'

ITAKWIL ang REHIMENG MARCOS JR.

Ikaapat na SONA ni BBM sa darating na Hulyo 28, 2025. Tatlong taon na rin bigo ang mga pangako ng 'BAGONG PILIPINAS'. Mahigit dalawang taon na lang ang nalalabi sa rehimeng BBM at ni isang larawan ng pagbabago ay wala pang nalalasap ang masang Pilipino.

Hindi lang bigo ang rehimeng BBM sa kanyang pangako kundi 'BULOK na Pilipinas' ang hatid nito na panunungkulan sa...

'Bulok na Pilipinas' dahil mataas pa rin ang presyo ng mga bilihin at batayang serbisyo habang patuloy na barat at hindi sapat ang sahod ng mga manggagawang Pilipino. Aabot sa 2% ang inflation rate ng bansa, tumataas ng 2% ang presyo ng lahat ng mga batayang pangangailangan sa bansa. Tampok ang presyo ng bigas na nananatiling P41/kilo. Pati ang presyo ng gulay, isda, karne, maging presyo ng kuryente, krudo at tubig ay patuloy sa pagsirit. Habang ang sahod sa kabila ng barya-baryang umento ay hindi kayang makabawi man lang sa patuloy na pagtaas ng presyo ng mga bilihin. Ang kasalukuyang minimum wage sa NCR na P695 ay may P681 lang na tunay na halaga.

'Bulok na Pilipinas' dahil patuloy ang paglaki ng kakulangan sa pondo ng bayan. Ngayong unang 5-buwan ng 2025, umabot na sa hp523.9 Bilyon ang kakapusan sa kaban ng bayan. Noong 2024, umabot ito sa P1.5 Trilyon. Kasabay sa paglobo ng kakulangan ay ang todo sirit din ng utang ng bansa. Ngayon Abril pa lang umabot na sa Php16.75 ang utang ng bansa at tinatayang aabot ito sa Php 17 Trilyon sa dulo ng 2025. Masaklap, para ibsan ang krisis sa pananalapi ng rehimeng BBM, todo-todo naman ang pagpiga ng buwis sa mamamayan. Hindi na kuntento sa VAT sa bilihin at digital na transaksyon, pati kita o interes sa savings ay binuwisan pa ng 20% ng gobyerno habang payag naman ito sa 0% taripa sa mga imported na produkto.

Larawan din ng 'Bulok na Pilipinas' ang lumalala at wholesale na katiwalian at korapsyon sa kaban ng bayan sa anyo ng budget insertions sa Bicam, pagpapatuloy ng confidential at intelligence funds at unprogrammed funds, na ginagamit na pang-ayuda at panunuhol sa kampanya ng mga trapo at dinastiya. Ayon sa konserbatibong pagtaya ng World Bank, mahigit sa Php 130 Bilyon ang nawawala sa kaban taun-taon dahil sa katiwalian at korapsyon.

'Bulok na Pilipinas' ang ibinunga sa ating ekonomiya. Lugmok pa din ating ekonomiya. Naghihingalo at matumal pa rin ang ating ekonomiya. 5.4% lamang ang inilaki ng GDP, 1% lang ang inilaki nito kumpara sa nakaraang 2024 sa kabila ng lubusang liberalisasyon, pribatisasyon at deregulasyon ng ekonomiya. Ang resulta ng pakikipag-usap kay US Pres. Donald Trump ay patunay din sa kabulukang ito. Talo ang ekonomiya at mamamayan sa resulta ng US visit ni BBM, pumayag ito sa 0% taripa para sa mga produktong ipapasok ng US habang 19% ang taripa naman sa mga produkto ng bansa ang iniluluwas sa US. Babaha ang mga imported na produkto ng US sa bansa na wala tayong kikitaing buwis habang papatawan ng 19% buwis sa mga produkto natin sa US, magreresulta ito ng pagkawala nang mahigit na Php 32 Bilyon taun-taon sa ating kabang yaman. Talo na tayo sa kita, papatayin pa nito ang naghihingalong lokal na ekonomiya laluna ang agrikultura at manupaktura.

'Bulok na Pilipinas' ang inabot natin dahil marami pa ring hikahos at nagugutom. Ayon sa SWS, 50% ng mga Pilipino ay itinuturing ang sarili na mahirap habang 20% ng mga Pilipino ay nakakaranas ng pagkagutom. Dahil ito sa lalong lumakas na kapangyarihan ng mga pampulitikang dinastiya at pangingibabaw ng interes ng mga oligarkiya sa ekonomiya ng bansa. Ayon sa Rappler, 18 malalaking dinastiya ang nakaluklok mula Kongreso hanggang mga pwesto sa lokal na pamahalaan. Sa Senado, 4 na pamilyang dinastiya ang nakaupo sa ika-20 Kongreso. 15 Bilyonaryo din lang ang may kontrol sa ekonomiya at nagpipyesta sa 80% ng likhang yaman ng bansa.

'Bulok na Pilipinas' ang mahigit na tatlong taon ni BBM, sa ilalim ng kanyang rehimen muling lumakas ang impluwensya at kapangyarihan ng imperyalistang US sa bansa. Sa ilalim ng kanyang administrasyon, 4 na bagong base militar ng US sa ilalim ng EDCA ang naitayo. At ngayon sa kanyang pagbisita at pakikipagpulong kay Trump ay inihayag nito ang pagpayag sa pagtatayo ng pabrika at imbakan ng armas sa Subic sa Zambales. Lalo nitong paiigtingin ang desisyon ng tensyon sa pagitan ng Tsina at Pilipinas. Muli tayong inilagay sa bingit ng giyera at digmaan dahil sa pag-igting ng militarisasyon sa West Philippine Sea habang umiinit ang hidwaan sa pagitan ng US at Tsina.

'Bulok na Pilipinas' ang sinapit ng ating bansa dahil sa gitna ng taunang kalamidad at pagiging tagapangulo ni BBM sa Loss and Damage Committee, patuloy ang pagkasira ng kalikasan bunga ng malawakang kumbersyon, reklamasyon at pagmimina habang patuloy na pinapayagan at pinapalawak nito ang operasyon ng mga marumi at nakakapinsalang enerhiya sa anyo ng COAL-FIRED POWER at LIQUIFIED NATURAL GAS (LNG) na lalong nag-aambag hindi lamang sa lalong pagtaas ng temperatura ng daigdig, sa paglikha ng matinding kalamidad kundi maging sa dislokasyon at kahirapan sa mga kanayunan.

Lalong 'Bulok na Pilipinas' dahil hindi magawa ni BBM ang mapagpasyang resolusyonan ang pagpapanagot kay Sara Duterte sa kabila ng malawak na panawagan at malinaw na pananagutan nito sa paglustay sa pondo ng bayan. Ang pagbasura ng Korte Suprema sa impeachment laban kay Sara ay patunay ng kabulukan ng umiiral na gobyerno. Sa 'Bulok na Pilipinas' ni BBM walang pagpapanagot sa mga mandarabong!

'Bulok na Pilipinas' ang ibinunga ng paghahari ng rehimeng Marcos dahil nagpapatuloy ang maka-kapitalista, maka-asendero, at maka-imperyalistang tunguhin at programang ipinatutupad sa bansa. Kung mananatili at hindi tutulan ay ihahatid tayo ng rehimen hindi lang sa kahirapan at kagutuman kundi pagyurak at pagkakait sa karapatang pantao at hustisyang panlipunan/

Hindi palakpakan at pagpuri sa rehimeng BBM ang dapat na isalubong sa ika-4 na SONA dahil KABULUKAN ang HINATID nito sa bansa. Bagkus, dapat SINGILIN at PANAGUTIN ito sa patuloy na kahirapan, gutom, dislokasyon, pagkasira ng klima't kalikasan, at panunupil sa mamamayan. Walang ibang solusyon sa kabulukang dinaranas ng bansa kundi WAKASAN at ITAKWIL ang rehimeng BBM.

Tugunan ang Masa: Trabaho, Sahod, Kabuhayan at Karapatan!

Wakasan ang Katiwalian at Pampulitikang Dinastiya!

Tutulan ang Imperyalistang Paghahari at Giyera!

Marcos-Duterte Panagutin!

Itakwil ang Rehimeng Marcos Jr.!

SANLAKAS - BMP - PLM - Oriang - AMA - KPML - ZOTO - SPARK

Hulyo 2025

Polyeto ng KPML sa SONA 2025

SA RA 12216 (NHA ACT OR 2025),

TAGILID NA NAMAN ANG MARALITA

Ang Republic Act 12216 o ang National Housing Authority Act of 2025 ay nilagdaan na nitong Mayo 29, 2025. Bagamat wala pa itong IRR (Implementing Rules and Regulations). Pinawalang bisa ng batas na ito ang Presidential Decree No. 757 (series of 1975) na siyang lumikha sa National Housing Authority (NHA), ang pangunahing ahensya ng pambansang pamahalaan hinggil sa pabahay.

Subalit nakababahala ang ilang probisyon sa bagong batas. Suriin ang ilang matitingkad na probisyon. Kung dati, 30 days notice, ngayon, 10 araw na lang. Ayon sa Article IV, letter d, "proper notice of ejectment, either by personal service or by posting the same on the lot or door of the apartment, as the case may be, shall be given to the informal settler family or illegal occupant concerned at least ten (10) days before the scheduled ejectment from the premises."

Sa nasabing probisyon din, may police power to demolish na rin ang NHA: "That the Authority shall have the power to summarily eject and dismantle, WITHOUT the necessity of judicial order, any and all informal settler families, as well as any illegal occupant in any homelot,"

Ang mandato ng NHA ay maglaan ng pabahay para sa mga walang bahay. Subalit bakit pati ang condonation and restructuring ay pinasok na rin nito? Sec. 6, Artikulo II, d. "Establish a socialized and low-cost housing loan restructuring and condonation program, subject to the terms and conditions the Board of Directors may prescribe"

Mga kapwa maralita, ilan lang iyan sa mga matitinding kinakaharap ng mga maralita, lalo sa isyu ng pabahay. Bukod pa iyan sa 4PH (Pambansang Pabahay Para sa Pilipino Program), na flagship project ni BBM upang lutasin umano ang 6.8 milyong backlog sa pabahay. Subalit ang 4PH ay hindi naman para sa ating maralita, kundi para sa mga pulis, guro, at sektor na may pay slip at fixed income. Hindi para sa maralita ang 4PH.

Tapos nariyan pa ang bagong NHA Act na parang wala nang karapatan ang mga maralita sa pabahay, na pag ginusto ng NHA na walisin ang mga maralita, may police power na ang NHA na basta na lang wawalisin ang bahay ng mga dukha. Ilang beses na bang tagilid ang maralita sa mga proyekto ng pamahalaan at pribadong sektor? Walang masusulingan ang maralita kundi magkaisa, magkapitbisig at lumaban para sa kanilang mga karapatan na may hustisyang panlipunan.

Kaya ngayong ikaapat na SONA ni BBM, ating ipanawagan sa mga kapwa maralita na magkaisa upang labanan ang bagong batas o itong NHA Act na inilalagay sa dehado ang mga maralita! Itinatakwil ng Kongreso ng Pagkakaisa ng Maralitang Lungsod (KPML) ang batas na ito at IBASURA dahil hindi ito mag-aangat sa kalagayan ng mga maralita, bagkos ay magpapahirap at magbabaon pa sa kumunoy ng kahirapan ng masa.

ITO AY NEGOSYO, HINDI SERBISYO! IBASURA ANG BATAS NA ITO! Ito ay tahasang pagyurak at paglabag sa karapatang pantao! Ito ay labag sa Konstitusyon ng Pilipinas!

ANG TUNAY NA PROGRAMA PARA SA MARALITANG MASANG PILIPINO AY ANG PAMPUBLIKONG PABAHAY SA PILIPINAS!

Kongreso ng Pagkakaisa ng Maralitang Lungsod (KPML)

Hulyo 28, 2025