Huwebes, Abril 17, 2014

Istorya ng Kalbaryo ng Maralita 2014 sa Larawan

Isinagawa ng KPML at ZOTO ang Kalbaryo ng Maralita 2014, sa pamamagitan ng pagsasadula nito mula sa Sto. Domingo Church (una at ikalawang istasyon), Holy Trinity Parish sa Balic-Balic, Sampaloc, Mla. (ikatlo, ikaapat at ikalimang istasyon), San Roque de Sampaloc Parish sa M. dela Fuente, Sampaloc, Mla. (ikaanim at ikapitong istasyon), Our Lady of Loreto Parish sa Bustillos St., Sampaloc, Mla. (ikawalo, ikasiyam at ikasampung istasyon), at Mendiola Bridge (na ngayon ay Chino Roces Bridge) (ikalabing-isa, ikalabingdalawa, ikalabingtatlo, at ikalabing-apat na istasyon). Binubuo ito ng 30 litrato.

(Mga litrato ni Greg Bituin Jr.)

Mga tagapagsalita sa Kalbaryo ng Maralita 2014, sa larawan

Ipinaliwanag ng mga tagapagsalita sa Kalbaryo ng Maralita 2014 ang iba't ibang isyu at kalagayan ng mga maralita, tulad ng bantang demolisyon at kawalang serbisyo't kagutuman sa relokasyon. Iniugnay nila ito sa kalbaryo ni Hesus sa panahon ng mga malulupit na Hudyo, kung saan siya'y pinahirapan ng husto hanggang sa mamatay, tulad din ng kasalukuyang kalagayan ng mga dukha sa lipunan. Para sa mga maralita, kalbaryo nila sa araw-araw ang nararanasang banta, gutom, at kahirapan. Ninanais nilang sumibol ang pag-asa at pagkakaroon ng katarungang panlipunan, di lang para sa kasalukuyang henerasyon kundi sa mga susunod pa. Nais nilang mawala na ang banta ng demolisyon at magkaroon ng kapayapaan na may hustisyang panlipunan para sa lahat.

(Ulat at mga litrato ni Greg Bituin Jr.)
Si Ka Orly Gallano, pangulo ng ZOTO at bagong pangulo ng KPML-NCRR
Si Ka Glenly Mendina, ikalawang tagapangulo ng KPML-NCRR
Si Ka Anthony Barnedo, ang pangkalahatang kalihim (secretary general) ng KPML-NCRR.

Si Ate Melai Margallo, ang nanay ng mga kabataang gumanap sa Pasyon ni Hesus at direktor ng munting palabas, ang siyang tagapagsalita ng kalbaryo ni Hesus sa bawat istasyon.

 Si Ka Erwin, isang lider-maralita, at kasapi ng Partido Lakas ng Masa (PLM) - Quezon City chapter.

 Si Nanay, isang lider-maralita sa Muntinlupa, habang galit na nagsasalita. Ang kanilang mga kabahayan ay dinemolis nitong nakaraang buwan lamang, Marso 2014.

 Si Ka Manny Toribio, unang pangulo ng Piglas-Kabataan, at kasalukuyang deputy secretary general ng ZOTO.

 Si Ka Gie Relova, ang pangkalatang kalihim ng BMP-NCRR.

Si Ka Edwin Guarin, isa sa council member ng PLM.

Si Ka Orly Gallano, pangulo ng ZOTO at bagong pangulo ng KPML-NCRR, habang kinakapanayam ng reporter ng ABS-CBN.

Islogan at Tema ng Kalbaryo ng Maralita 2014, Mga Larawan

Narito ang sentral na islogan at ang mga tema ng bawat istasyon ng Kalbaryo ng Maralita na may 14 na istasyon ng krus, na isinagawa ng KPML at ZOTO, mula sa Sto. Domingo Church (una at ikalawang istasyon), Holy Trinity Parish sa Balic-Balic, Sampaloc, Mla. (ikatlo, ikaapat at ikalimang istasyon), San Roque de Sampaloc Parish sa M. dela Fuente, Sampaloc, Mla. (ikaanim at ikapitong istasyon), Our Lady of Loreto Parish sa Bustillos St., Sampaloc, Mla. (ikawalo, ikasiyam at ikasampung istasyon), at Mendiola Bridge (na ngayon ay Chino Roces Bridge) (ikalabing-isa, ikalabingdalawa, ikalabingtatlo, at ikalabing-apat na istasyon).

Ang mga lumahok sa Kalbaryo ng Maralita ay mga kasapi ng KPML at ZOTO mula sa mga eryang may banta ng demolisyon, at mula sa mga lugar ng relokasyon. May banta ng demolisyon ang mga nasa tabing ilog, estero at ilalim ng tulay, na prayoridad na tanggalin ng gobyerno at itapon sa mga lugar ng relokasyon. Ang mga nasa relokasyon naman ay nagbabalikan sa dati nilang lugar dahil sa gutom at kawalan ng maayos na serbisyo, walang trabaho, at pulos kagutuman ang kanilang nararanasan. isinasagawa ng KPML ang Kalbaryo ng Maralita taun-taon tuwing panahon ng kuwaresma. Ngayong 2014, sumuporta rin sa aktibidad na ito ng KPML at ZOTO ang Partido Lakas ng Masa (PLM).

(Ulat at mga litrato ni Greg Bituin Jr.)

Sabado, Abril 12, 2014

Maralita, sumama sa rali para sa mga nasalanta ng Yolanda

MARALITA, SUMAMA SA RALI PARA SA MGA NASALANTA NG YOLANDA

Abril 11, 2014 - Sumama sa pagkilos ang KPML-NCRR, sa pangunguna ni Anthony Barnedo, sa FDC, PMCJ, Bulig Visayas, FCAID, PM, SANLAKAS, at iba pang grupo upang iprotesta ang umano'y pagpapabaya at hindi tuluy-tuloy na pagtulong ng pamahalaan sa mga komunidad na apektado ng Yolanda. Ayon pa sa pahayag na inilabas ng nasabing mga grupo, ang Rehabilitation Assistance on Yolanda (RAY) ng pamahalaang PNoy sa katunayan ay Rejection and Abandonment of Yolanda (RAY)-Affected Communities. Sinabi pa nilang imbes na makamamamayang solusyon, ipinabahala na ng pamahalaan ang "pagtulong" sa mga malalaking negosyante. Kaya nanawagan ang mga grupong iyon na dapat ay isang planong pangunahing nakatutok sa taumbayan at sa karapatan ng mga ito kaysa sa plano ng mga negosyanteng unahin ang negosyo sa mga nasalantang komunidad (Pursue a people-centered and a rights-based rehabilitation plan now). (Ulat at litrato ni Greg Bituin Jr.)


 





Martes, Abril 8, 2014

Biyernes, Pebrero 7, 2014

Sa ika-13 anibersaryo ng kamatayan ni Ka Popoy Lagman

Kuha sa Bahay ng Alumni, Pebrero 6, 2014, sa ika-13 anibersaryo ng kamatayan ni Ka Popoy Lagman, dating pangulo ng Bukluran ng Manggagawang Pilipino (BMP).

Martes, Enero 28, 2014

KPML-NCRR rally with BMP at the ERC office


Ang mga litrato'y kuha ni Greg Bituin Jr.

Lunes, Disyembre 9, 2013

Sabwatang Meralco at ERC, kinundena ng militante, Karabana ng protesta, inilunsad



JOINT PRESS RELEASE
09 December 2013

Contact person:
Anthony Barnedo - KPML-NCRR, Secretary-General
0949-7518792

Sabwatang Meralco at ERC, kinundena ng militante
Karabana ng protesta, inilunsad


NANGALSADA ulit ang militanteng Bukluran ng Manggagawang Pilipino (BMP) at Kongreso ng Pagkakaisa ng Maralitang Lungsod (KPML) para igiit na ang napipintong pagtaas ng singgil sa kuryente ng P4.15/kWh ng kumpanyang Meralco ay isang ‘di makatwirang pabigat lamang sa mga kababayan nating hindi pa nakakabawi sa mga trahedya’t kalamidad na tumama sa bansa ngayong taon. 

“Habang walang signipikanteng dagdag umento at talamak pa rin ang kontrakwal na trabaho, dati nang kalunos-lunos ang kalagayan ng mga manggagawa at kapag natupad pa ang panibagong pabigat ng Meralco, ultimong ang kaprasong pang-Noche Buena ng aming pamilya ay kukunin pa nila para lang pagbigyan ang kanilang walang katapusang kasibaan sa tubo. Ang patuloy na paglala ng kalagayan ay magtutulak sa mga obrero sa desperasyon at sa huli’y sa rebelyon,” sabi ni Gie Relova, lider ng BMP 

Naglunsad ng isang karabana ng protesta ang mga nasabing grupo kung saan ay isa-isa nilang niralihan ang mga sangay ng Meralco sa mga lungsod ng Kaloocan, Quezon at Maynila. Dumulo ang protesta sa tanggapan ng Energy Regulatory Commission (ERC) sa lungsod ng Pasig, kung saan naganap ang deliberasyon ng Komisyon sa petisyon ng Meralco sa dagdag singil. 

Nagsalitan ang mga tagapagsalita ng BMP at KPML sa pagkundena sa Meralco at ERC. Giit nila, magkakutsaba ang pribadong kumpanya at ahensya ng gobyerno sa dagdag pahirap na P4.15/kWh.

“Kahit minsan, mula nang isinilang ang ERC ay hindi pa ito nagsilbi sa interes ng nakararaming naghihirap. Isang tuod ang ahensyang ito na ang tanging silbi ay makapanlinlang at palabasin na may ginagawa ang gubyerno para isulong ang kapakanan ng mamamayan,” dagdag ni Relova.

Ang ERC ay inanak ng pagsasabatas ng Electricity Power Industry Reform Act noong 1999 para garantiyahan ang malinaw at makatwirang presyo ng kuryente sa isang malaya at patas na kumpetisyon at may pananagutan sa publiko. Bahagi rin ng mandato nito ang pagtatatag ng isang malakas at independyenteng kapulungan na magsasaayos at magsisistemisa para sa proteksyon ng mga gumagamit ng kuryente. 

“Ang Malakanyang at Kagawaran ng Enerhiya ay hindi rin ligtas sa kritisismo. Umaasta lamang sila na ginagawa nila ang lahat para sa mamamayan ngunit ang katotohana’y puro apila lang sa management ng Meralco ang kanilang nagawa. Kung talagang sinsero ang gobyernong ito na protektahan ang interes ng nakararami, dapat suspendihin muna nito ang VAT sa kuryente hanggang sa mag-normal ulit ang operasyon ng Malampaya para mabawasan man lang ang impak sa mamamayan ng panibagong dagdag singgil,” panukala ni Relova. 

Samantala, hiniling sa gobyerno ni Anthony Barnedo, tagapagsalita ng KPML, ang buong kalagayan at lubos na paggamit ng pondong Malampaya matapos ideklara ng Korte Suprema na ang pondo’y eksklusibo para sa elektripikasyon.

“Kailangang ipatupad ang desisyon ng Korte Suprema hanggang sa huling letra nito. Ang kinita ng gobyerno sa Malampaya ang dapat gamitin para sa rehabilitasyon ng mga planta at kawad ng kuryente na nasira ng bagyong Yolanda at hindi dapat magmula sa bulsa ng mga tumatangkilik sa Meralco,” sabi ni Barnedo.###

Militants hits Meralco and ERC collusion, Protest Caravan Launched

JOINT PRESS RELEASE
09 December 2013

Militants hits Meralco and ERC collusion,
Protest Caravan Launched


MILITANTS belonging to Bukluran ng Manggagawang Pilipino (BMP) and Kongreso ng Pagkakaisa ng Maralitang Lungsod (KPML) once again took to the streets to reiterate that the P4.15/kwh increase in electricity rates of power firm Meralco is an unjust burden to millions of Filipinos who have not yet recuperated from the calamities that hit the country in the past months.

“With no significant wage increase since 2010 and only contractual jobs available, the living conditions of workers are already wretched as it is. Once implemented, Meralco and the power producers shall only rob our families’ meager budget for noche buena just to satisfy their insatiable appetite for profit. Exacerbating our situation will only push the workers to desperation and eventually revolt,” said BMP leader, Gie Relova.

The groups held a protest caravan and held protests at Meralco branches in Caloocan City, Quezon City and Manila. The protest caravan culminated at the office of the Energy Regulatory Commission (ERC) in Pasig City, in time for the deliberations of the commission on the Meralco rate hike petition.

The BMP and KPML speakers took turns in lambasting both Meralco and the ERC, in what they claimed was collusion between a power distribution monopoly and the agency tasked to “regulate” electricity prices in an already deregulated power industry.

Relova pointed out that, “Not even once since its onset did the ERC favor the interests of the people over the vulture-like Meralco. This agency is as lame as a duck, designed to deceive and provide the notion that the government is working for the electricity consumers’ welfare”.

The ERC was created upon the enactment of the Electricity Power Industry Reform Act in 1999 to ensure transparent and reasonable prices of electricity in a regime of free and fair competition and full public accountability. Also part of its mandate is to establish a strong and purely independent regulatory body and system to ensure consumer protection.

“Malacanang and the Department of Energy cannot claim impartiality and act as if they have done anything and everything when all they have done is appeal to the management of Meralco by pathetically citing its corporate social responsibility. If the national government is truly sincere in protecting the interests of the multitude, then it should suspend the collection of value-added tax (VAT) pending the normalization of the operations at the Malampaya gas field to decrease the hike’s impacts,” Relova proposed.

Meanwhile KPML spokesperson Anthony Barnedo demanded from government authorities the full disclosure and utilization of the Malampaya funds since the Supreme Court (SC) recently decreed that its sole purpose was for the electrification of the countryside.

“The SC decision must be implemented to the letter. The revenues sourced from the Malampaya gas field must be utilized for the rehabilitation of the power plants and transmission lines struck by Yolanda and not from the pockets of the Meralco consumers,” Barnedo asserted.###

Contact person:

Anthony Barnedo - KPML-NCRR, Secretary-General
0949-7518792

Sabado, Nobyembre 30, 2013

Mensahe sa ika-150 Kaarawan ni Gat Andres Bonifacio

Sa ika-150 taon ng kapanganakan ni Gat Andres Bonifacio:
MAY PAG-ASA
Laban sa Inutil na Pangulo at Palpak na Elitistang Gobyerno

MAYPAG-ASA. Ito ang alyas o koda noon ni Andres Bonifacio, supremo ng Katipunan at lider-manggagawang namuno sa laban ng bayan sa kolonyalismong Espanyol. 

Isa’t kalahating siglo na mula nang isilang si “Maypag-asa” – ang dapat tanghaling unang pangulo ng republika ng Pilipinas. Ngunit napapanahon pa ring tanungin ng bawat Pilipino: “May pag-asa pa ba ang ating Inang Bayan”? 

Makabuluhan ang tanong na ito laluna sa panahong tayo ay humaharap sa kaliwa’t kanang mga pagsubok bunga ng kalamidad at mga kontrobersyang pampulitika. Laluna sa yugtong ito na tila nalulukuban ang buong bansa ng kawalang pag-asa.

Tahasan nating idinedeklara: “May pag-asa pa!” Subalit hindi ito grasyang magmumula “sa itaas”. Hindi ito manggagaling sa mga elitistang may-kontrol sa ating ekonomiya’t pulitika. Hindi magsisimula sa matataas na mga opisyal ng gobyerno na sinasamantala ang mismong kahirapan at pagdarahop ng masang Pilipino. 

Bakit? Dahil sa sumusunod na kadahilanan:

Ang gobyernong ito ay para sa mababang pasahod. Tuwi-tuwinang sagot ng rehimeng Aquino sa ating kahilingan para sa dagdag na sahod ay ang pagsasara ng mga pabrika at pagbabawas ng mga trabahador. Imbes na sundin ang Konstitusyunal na probisyon ukol sa living wage (o sahod na makabubuhay ng pamilya), ang gobyerno mismo ang tumatayong tagapagsalita ng blakmeyl ng mga kapitlalista para manatili ang mababang pasahod. Sa Enero 2014, itataas pa nito ang kaltas para sa Social Security System at Philhealth. Liliit lalo ang take-home pay ng mga manggagawa! Ang Wage Order 18 ang pinakamaliit na kautusan sa buong kasaysayan ng NCR wage board.

Ang gobyernong Aquino ay para sa kontraktwalisasyon. Sa kaso ng kontraktwalisasyon sa Philippine Airlines nang tangkain ni Lucio Tan (dating may-ari ng PAL) na alisin ang mga regular at palitan sila ng mga kontraktwal na empleyado sa pamamagitan ng outsourcing ng ilang departamento ng kompanya, kumampi ang Malakanyang sa katuwiran ni Tan. Gumawa ito ng bagong kategoryang “core” at “non-core” na hindi nakasaad sa Labor Code.

Ang gobyernong Aquino ay para sa demolisyon ng komunidad ng mga maralita. Walang habas ang demolisyon sa mga “informal settlers” sa mga punong lungsod. Diumano, ito ay para daw iligtas sila sa mga “danger zone”. Subalit mas masahol naman ang kanilang nililipatan sa mga relokasyon sapagkat bukod sa wala o kulang sa batayang mga serbisyo ay malayo pa sa kanilang mga trabaho. Ang mas hinahabol ng gobyerno ay pagwawalis sa mga maralita upang tumaas ang land value sa lungsod para sa mga real estate developer gaya nina Henry Sy, Zobel de Ayala, mga Gokongwei, Lucio Tan at Andrew Tan. 

Ang gobyernong Aquino ay para sa mataas na presyo ng langis. Nang uminit ang protesta laban sa oil deregulation kasabay ng pagsirit ng presyo ng krudo sa $100 kada bariles noong 2012, nagpatawag ng rebyu ang Department of Energy. Pero imbes na aralin kung paano manunumbalik sa “regulated oil industry”, tutuklasin pa raw ang epekto ng deregulasyon sa presyo ng langis. Bagamat maliwanag pa sa sikat ng araw na ang kawalang kontrol sa presyo ang siyang dahilan ng walang tigil na pagtaas sa presyo ng produktong petrolyo! Ang totoo, mas pinapaboran ng gobyerno ang mahal na presyo ng langis sapagkat mas tumataas din ang kanilang nakokolektang VAT bunga ng pagtaas nito! 

Ang gobyernong Aquino ay para sa mataas na singil sa serbisyo publiko. Hindi pinipigilan ang pribatisasyon ng mga dating sineserbisyo ng gobyerno gaya ng kalusugan, edukasyon, pabahay, pangmasang transportasyon gaya ng tren, atbp. Pinalitan lamang ng pangalan – tinaguriang private-public partnership (PPP) – ngunit iisa ang resulta: pagtutubuan ng mga kapitalista ang serbisyong panlipunan. Ilang halimbawa ng epekto nito ay ang napipintong pagtaas sa pasahe ng LRT at MRT, pagtataas sa toll fee sa NLEX, SLEX at iba pang tollway, at pagsasapribado ng mga pampublikong ospital.

Ang gobyernong Aquino ay para sa malalaking kapitalista. Sa nakaraang SONA, ipinagmalaki ni Noynoy ang “inclusive growth”. Aniya ang nais raw ng rehimen ay pag-unlad na para sa lahat ng Pilipino. Subalit sino lamang ang nakinabang sa ipinagmamalaking GNP/GDP growth? Ang pinakamayamang 40 pamilya na lumago ang yaman ng 37.9% noong 2011. 

Ang gobyernong Aquino ay para sa political dynasty. Ang mismong pangulo ay nagmula sa pampulitikang angkan. Ito ang mga pamilyang nagpapasasa sa kaban ng bayan at hindi inuuna ang kapakanan ng nakararami at ang totoong pambansang pag-unlad. Hanggang ngayon, hindi pa rin naisasabatas ang enabling law sa Konstitusyonal na probisyon laban sa mga political dynasty. 

Ang gobyernong Aquino ay para sa pork barrel. Naluklok sa poder si Noynoy at partido Liberal sa islogang “kung walang korap, walang mahirap” at “daang matuwid”. Pero hindi niya tinanggal (bagkus ay dinoble pa nga!) ang PDAF ng mambabatas na matagal nang pinupuna bilang isa sa mga mekanismo ng korapsyon sa bansa. Bukod sa PDAF, mayroong P1.3 Trilyon na presidential pork na ginagamit – hindi sa lahatang-panig na pag-unlad – kundi sa pagpapanatili ng “utang na loob” ng mga lokal na opisyal at kanilang mga botante. 

AT HIGIT SA LAHAT, ang gobyernong Aquino ay palpak sa pagtulong sa mga nasalanta ng kalamidad. Ang sunod-sunod na kalamidad sa Visayas – mula sa lindol hanggang sa kamakailan lang na bagyong Yolanda – ang nagbulgar sa kapalpakan ng elitistang paghahari. Lumipas muna ang isang linggo bago opisyal na nasimulan ang pag-ayuda ng gobyerno sa Leyte’t Samar, partikular sa Tacloban. Ito ang INUTIL na administrasyong mas inuuna ang imahe bago ang pagtulong sa taumbayan. Hanggang ngayon, maraming lugar pa rin ang hindi nakakatanggap ng tulong mula sa gobyerno. 

Kung wala sa inutil na pangulo at elitistang gobyerno, nasaan matatagpuan ang pag-asa ng bayan? Nasa taumbayan mismo. Nasa ating sama-samang pagkilos. Nasa ating kapatiran at pagdadamayan. Nasa ating pagkakaisa’t paglaban. Makikita ito sa pagtulong ng milyon-milyong ordinaryong mamamayang hindi na naghintay sa anumang anunsyo ng gobyerno ngunit agad na tumulong sa mga nasalanta ng nakaraang mga sakuna. 

Mas pa, sapagkat ang sama-samang pagkilos “mula sa ibaba” ay nagkamit, kamakailan lang, ng sumusunod na mga tagumpay: 

Una, ang pagdeklara ng Korte Suprema na labag sa Konstitusyon ang PDAF ng mga mambabatas at iligal ang lump-sum appropriation sa pondo ng gobyerno at absolutong kontrol ng Malakanyang sa paggamit nito ng Malampaya fund (na dapat ay inilalaan sa paglikha ng enerhiya at elektripikasyon ng bansa). Hindi pa nagtatapos ang laban. Tinanggal lamang ang “pork barrel” ng mga mambabatas ngunit nananatili ng presidential pork. Hindi pa rin nailalagay ang partisipasyon ng taumbayan sa pagbabadyet ng gobyerno. Ganunpaman, makasaysayan ang naging hatol ng Korte. Maari na itong gawing batayan sa lahat ng susunod na kaso tungkol sa kabuuang “pork barrel”. Ito ang bunga ng tuloy-tuloy na pagkilos ng taumbayan na nasimulan sa Million People March sa Luneta noong Agosto 26.

Ikalawa, ang pagbabalik sa mga tinanggal bilang regular ng mga empleyado ng Philippine Airlines, sa pamumuno ng PALEA. Palagiang kinampihan ng gobyerno – mula sa Malakanyang hanggang sa Court of Appeals – ang outsourcing ni Lucio Tan para mapalitan ng mga kaswal ang mga regular at durugin ang unyong PALEA. Sa loob ng dalawang taon, lumaban ang unyon – sa tulong at suporta ng kilusang mamamayan at kilusang paggawa. Nang ibenta ang PAL sa San Miguel group, unang pumostura laban sa reinstatement ang bagong management. Subalit hindi natinag ang unyon bagamat umabot na ng dalawang taon mula nang i-lockout ni Lucio Tan ang PAL. Noong Nobyembre 16, dahil sa pangangailangan din ng PAL ng mga manggagawang mas may kasanayan sa trabaho, pumayag ang bagong may-ari na bumalik bilang regular ang mga kasapi ng PALEA.

Mga kababayan! May pag-asa pa. Ang ating katubusan ay nasa ating mga kamay. Sa sama-samang pagkilos, naging iligal ang PDAF at nakabalik ang PALEA. Sa pagkakaisa’t pakikibaka, may lakas at tagumpay ang mamamayang Pilipino. 

Mga kamanggagawa! Si Gat Andres ay manggagawa. Gaya rin nating sahurang alipin. Subalit pinangibabawan niya ang kahirapan. Nagkusang mag-aral at magtiyaga. Inisip ang kapakanan ng buong bayan, hindi lang ng sarili o sariling pamilya. Hanggang sa naging lider ng bayan. Sa okasyong ito ng ika-150 taon ng kapanganakan ni Bonifacio, tanggapin natin ang tungkuling pangunahan ang laban ng bayan sa elitista’t trapong paghahari. Higit sa anumang sektor sa lipunan, ang nagkakaisang pagkilos ng manggagawa, ng milyon-milyong walang pag-aari kundi ang kanilang lakas, talino at oras – ang siyang tunay na pag-asa ng bayan. Palpak na gobyerno, inutil na pangulo, itakwil! 

BMP–PLM–SANLAKAS-KPML
Nobyembre 30, 2013