Pahayag ng KPML sa International Mountain Day

PAHAYAG NG KPML SA INTERNATIONAL MOUNTAIN DAY O PANDAIGDIGANG ARAW NG KABUNDUKAN

Disyembre 11, 2022

2022 theme: WOMEN MOVE MOUNTAINS

2010 theme: Mountain minorities and indigenous peoples

PROTEKTAHAN ANG MGA BUNDOK AT PANGALAGAAN 

ANG SARIBUHAY O BIODIVERSITY NA NAROROON!

NAKAKALBONG BUNDOK AY TANIMAN NG PUNO!

TUTULAN ANG PAGMIMINA AT ILIGAL NA PAGTOTROSO

NA NAKAKASIRA SA ATING MGA KABUNDUKAN!

KARAPATANG PANTAO SA KABUNDUKAN, IPAGLABAN!

Mahigpit na nakikiisa ang Kongreso ng Pagkakaisa ng Maralitang Lungsod (KPML) sa pag-alala sa International Mountain Day o Pandaigdigang Araw ng Kabundukan.

Ang Disyembre 11 bilang "International Mountain Day" ay itinalaga ng United Nations General Assembly noong 2003. Ang General Assembly ay "hinikayat ang pandaigdigang komunidad na ayusin ang mga kaganapan sa lahat ng antas sa araw na iyon upang patampukin ang kahalagahan ng napapanatiling pag-unlad ng bundok." Ang International Mountain Day ay ipinagdiriwang taun-taon na may iba't ibang temang nauugnay sa sustenableng pag-unlad ng kabundukan. Ang FAO ang organisasyon ng U.N. na inatasang  manguna sa pagdiriwang ng International Mountain Day. 

Ang tema para sa International Mountain Day 2010 ay "Mountain minorities and indigenous peoples." Nilalayon nitong itaas ang kamalayan tungkol sa mga katutubo at minorya na naninirahan sa mga kapaligiran sa bundok at ang kaugnayan ng kanilang kultural na pamana, tradisyon at kaugalian. Ngayong 2022, ang tema ng International Mountain Day ay "Women Move Mountains." Ipinapakita sa mga temang ito ang kahalagahan ng mga tagapangalaga ng kabundukan: ang mga liping minorya, lumad, at kababaihan.

Gayunpaman, napakaraming banta sa kabundukan, tulad ng pagmimina, iligal na pagtotroso, slash and burn farming, pangongolekta ng kahoy na panggatong, iligal na pangangaso, at pagpapalawak ng mga pamayanan ng tao bilang mga pangunahing nag-aambag sa pagkawala ng takip sa kagubatan. Ang mga problemang ito ay hindi natatangi sa Sierra Madre ngunit nakakaapekto rin sa iba pang mga bundok at protektadong lugar, tulad ng Masungi.

Ito pa ang ilan sa mga matataas na bundok sa ating bansa na dapat nating protektahan:

(1) Bundok Apo – Ang pinakamataas na bundok sa Pilipinas.

(2) Bundok Dulang-Dulang – Pangalawa sa pinakamataas na bundok sa Pilipinas.

(3) Bundok Pulag – Pinakamataas na bundok sa Luzon.

(4) Bundok Kitanglad – Mapanghamon ang mga trail dito ngunit nag-aalok ng magagandang tanawin at mayamang biodiversity na ginagawang sulit ang iyong paglalakbay.

(5) Bundok Kalatungan – Ito ay nauuri bilang isang potensyal na aktibong bulkan at itinuturing na isa sa mga pinaka-mapanghamong bundok sa Pilipinas na akyatin.

(6) Bundok Tabayoc – Pangalawa sa pinakamataas na bundok sa Luzon.

(7) Bundok Piapayungan – Hanggang ngayon, ito ay nananatiling isa sa pinakamahirap na taluktok sa Mindanao.

(8) BundokR agang – Mt.Ragang ang pinakamataas na bundok sa Lanao Del Sur.

(9) Bundok Maagnaw – Pangatlong pinakamataas na tuktok sa hanay ng Kitanglad

(10) Bundok Timbak - sa Benguet, kung saan nagyeyelo o snow na rito sa panahon ng taglamig

(11) Sierra Madre - ang pinakamahabang bulubundukin sa Pilipinas. Sumasaklaw sa mahigit 540 kilometro, ito ay tumatakbo mula sa lalawigan ng Cagayan pababa sa lalawigan ng Quezon.

Dapat protektahan ng pamahalaan at ng mamamayan ang ating mga kabundukan, lalo na ang mga saribuhay o biodiversity na naririto. Huwag natin itong hayaan sa pagmimina, ilegal na pagtotroso at anumang gawaing nakakasira sa kalikasan!

Protektahan ang karapatan ng mga katutubo, mga tagabundok, at lahat ng naninirahan sa kabundukan! Pangalagaan natin ang ating kalikasan!

Pinaghalawan:

https://www.fao.org/international-mountain-day/en/

https://www.zenrooms.com/blog/philippines-mountains/

https://en.wikipedia.org/wiki/Mountain_Day