Pahayag ng KPML sa World Bicycle Day

PAHAYAG NG KPML SA WORLD BICYCLE DAY

Hunyo 3, 2022

Mahigpit na nakikiisa ang Kongreso ng Pagkakaisa ng Maralitang Lungsod (KPML) sa paggunita sa World Bicycle Day tuwing ikatlo ng Hunyo taun-taon.

Noong Abril 2018, idineklara ng United Nations General Assembly ang Hunyo 3 bilang World Bicycle Day. Ang resolusyon para sa World Bicycle Day ay kinikilala ang "natatangi, mahabang buhay at kakayahang gamitin ang bisikleta, na ginagamit na sa loob ng dalawang siglo, at ito ay isang simple, abot-kaya, maaasahan, malinis at angkop sa kapaligiran na napapanatiling paraan ng transportasyon."

Sa ating bansa naman, idineklara naman ang ikaapat na Linggo ng Nobyembre ng bawat taon bilang "Pambansang Araw ng Bisikleta" upang isulong ang mga benepisyo sa kapaligiran ng mga bisikleta batay sa pinakahuling proklamasyon ni Pangulong Rodrigo Duterte. Sa Proclamation No. 1052 na nilagdaan niya noong Nobyembre 18, idineklara ni Duterte ang taunang okasyon upang matiyak ang ekolohikal na integridad at malinis at malusog na kapaligiran sa pamamagitan ng pagpapataas ng kamalayan ng publiko sa mga teknolohiya, sistema, at kasanayan sa kapaligiran.

Para sa KPML, ang paggamit ng bisikleta ay ekonomikal, pampalakas ng katawan, at kinakailangan ng mga maralita at manggagawang patungo sa kanilang trabaho upang makaiwas sa trapiko at makapasok ng tamas a oras. Ayon pa sa pananaliksik, ang benepisyo ng paggamit ng bisikleta ay: nagsusunog ng calories, nagpapataas ng balanse at flexibility, pinagaganda ang cardiovascular fitness, nagpapaganda ng hugis ng katawan, at nagpapabuti ng joint mobility.

Pinaghalawan:

https://www.un.org/en/observances/bicycle-day

https://en.wikipedia.org/wiki/World_Bicycle_Day

https://www.pna.gov.ph/articles/1122381

https://www.umt.edu/transportation/bike/about/benefits/

Pahayag ng KPML sa World Day Against Child Labor

PAHAYAG NG KPML SA WORLD DAY AGAINST CHILD LABOR

Hunyo 12, 2021

PALAYAIN ANG MGA BATA 

MULA SA PASAKIT NA CHILD LABOR!

Mahigpit na nakikiisa ang Kongreso ng Pagkakaisa ng Maralitang Lungsod (KPML) sa paggunita sa World Day Against Child Labor tuwing Hunyo 12, kasabay ng sinasabi nilang Araw daw ng Kalayaan sa bansa, at kasabay din ng International Year for the Elimination of Child Labor ngayong 2021.

Ayon sa International Labor Organization, "Sa huling 20 taon halos 100 milyong mga bata ang tinanggal mula sa talaan ng child labor, na bumaba sa 246 milyon noong 2000 hanggang 152 milyon noong 2016. Gayunpaman, ang pag-unlad sa mga rehiyon ay hindi pantay. Halos kalahati ng child labor ang nangyayari sa Africa (72 milyong bata), sinundan ng Asya Pasipiko (62 milyon). 70 porsyento ng mga bata sa gawaing child labor ang nasa agrikultura, mas nasa pangkabuhayan at komersyal na pagsasaka at pagpapastol ng hayop. Halos kalahati ng lahat ng mga batang ito ay nagtatrabaho sa mga sitwasyong itinuturing na mapanganib para sa kanilang kalusugan at buhay."

Noong bandang 2005-2010 ay nagkaroon ng programa ang KPML hinggil sa usaping Child Labor, kung saan nakapanayam nila ang maraming batang manggagawa sa Navotas, Malabon, Maynila, at iba pang lugar. Nakapanayam nila ang mga batang nangangalakal, may batang nasabugan ng dinamita at naputulan ng braso dahil sa pangingisda, may mga kabataang babaeng sa murang nagtatrabaho sa mga night club, at marami pang iba. Ipinakita ng KPML ang kaibahan ng child labor sa child work, kung saan sa child work, tulad ng mga batang artista, dapat silang kumuha ng lisensya sa Department of Labor and Employment (DOLE) upang makapagtrabaho ng apat na oras sa bawat araw, habang may panahon sa pag-aaral. Subalit sa child labor, di na nakakapag-aral ang bata dahil subsob na sa trabaho. Maagang tumanda ang mga nagtatrabahong bata.

Dahil dito, may commitment ang KPML na ipanawagang itigil na ang child labor. Ang mga batayang pinanghahawakan ng KPML ay Children’s rights, mula sa Artikulo 32 UN Convention on the Rights of the Child, na nagsasabng "Children have the right to be protected from economic exploitation and from work that could be harmful for them. Next to that children that are working are often not going to school, which violates their right to education. (May karapatan ang mga batang maprotektahan mula sa pang-ekonomyang pagsasamantala at mula sa trabahong maaaring makasasama sa kanila. Sunod dito'y ang mga batang manggagawa ay madalas na hindi nakakapasok sa paaralan, na lumalabag sa kanilang karapatan sa edukasyon.)" Isa pa ang ikawalong Sustainable Development Goal o SDG 8, na nagsasabing "The goal on Decent work and economic growth (SDG 8) also provides for the abolishment of all child labor. (Ang layunin sa disenteng pagtatrabaho at paglago ng ekonomiya (SDG 8) ay nagbibigay din para sa pagwawaksi ng lahat ng paggawa sa bata.)"

Karapatan ng bawat batang mabigyang proteksyon, may tahanan at pamilya, walang diskriminasyon, magpahayag ng sariling pananaw o opinyon, sapat na pagkain, magkaroon ng edukasyon. Subalit dahil sa child labor, kaybilis tumanda, murang katawan ay nabatak ng husto't kawawa, ama'y walang trabaho, bata'y naging manggagawa, ika nga, bata, bata, paano ka ba ginawa. Di mabayarang tama ang trabaho nila't pagod. Di makaangal ang bata sa mababang pasahod. Ddinadaya na ang bata, gobyerno'y nakatanghod? Habang sa child labor, kapitalista'y nalulugod!

End Child Labor, Now!

Wakasan na ang Child Labor, Ngayon Na!

Pahayag ng KPML sa unang anibersaryo ng pagsasara ng ABS-CBN

PAHAYAG NG KPML

Mayo 5, 2021

PAHAYAG NG MARALITA SA UNANG ANIBERSARYO

NG PAGSASARA NG ABS-CBN

Mahigpit na nakikiisa ang pamunuan at kasapian ng pambansang samahangKongreso ng Pagkakaisa ng Maralitang Lungsod (KPML) sa higit labing-isang libong manggagawa ng ABS-CBN na nawalan ng trabaho nang magsara ang nasabing kumpanya isang taon na ang nakararaan.

Matatandaang hindi na binigyan pa ng panibagong prangkisa ang ABS-CBN sa pasiya ng Mababang Kapulungan ng Kongreso. Ito'y itinuring na matinding pagbira sa kalayaan sa pamamahayag sa bansa. 

Naging bahagi na ng kabataan at ng buhay ng maraming Pilipino ang mga palabas sa ABS-CBN. Maraming mga palabas o programa ritong kinagiliwan ng mga manonood. Bukod pa sa mga balitang nakakaabot sa mga liblib na pook. Nang mawala ang ABS-CBN, maraming kababayan ang nasalanta ng bagyo at nasira ang mga ari-arian at pananim sapagkat hindi nila napaghandaan at nabalitaan dahil na rin sa pagsasara ng ABS-CBN.

Sa pakikibaka ng mga manggagawa ng ABS-CBN bago ito magsara, nakiisa ang iba't ibang mga unyon at grupong maralita upang ipaglaban ang mahigit 11,000 manggagawang mawawalan ng trabaho. Kabilang na sa mga nakiisang ito ang mga lider-maralita ng KPML.

Gayunman, kung ibabalik ito, gaya ng sigaw ng marami, hiling namin na gawing regular sa trabaho ang lahat ng manggagawa ng ABS-CBN. Hindi dapat pagsamantalahan ng pangasiwaan ng ABS-CBN ang mga manggagawa sa pagpapanatili sa mga ito bilang mga kontraktwal. Dagdag pa, ibigay ang tamang pasahod sa mga manggagawa ng ABS-CBN. Isang nakabubuhay na sahod o living wage batay sa isinasaad ng Konstitusyon ng bansa, at hindi libing wage na hindi nakakabuhay ng pamilya.

Kaya ang panawagan namin sa KPML: Ibalik ang mga manggagawang tinanggal sa ABS-CBN, at gawing regular ang lahat ng mga manggagawa ng ABS-CBN, at ipagbawal na ang kontraktwalisasyon!

Makikita rin ang pahayag na ito sa facebook page ng KPML

https://www.facebook.com/maralitanglungsod/photos/a.121383745932501/561304331940438/

Pahayag ng KPML sa World Day for Safety and Health at Work

PAHAYAG NG KPML

Abril 28, 2021

SA WORLD DAY FOR SAFETY AND HEALTH AT WORK, SIGAW NG MARALITA:

KABUHAYAN, KALUSUGAN, KARAPATAN, KALIGTASAN, IPAGLABAN!

Umabot na ng isang milyong katao ang naapektuhan ng COVID-19 sa bansa. Sa Timog-Silangang Asya, pumapangalawa na tayo sa Indonesia na may 1,6 milyong kataong apektado ng naturang sakit. Bakit nangyari na biglang lumobo ang bilang na ito? Ano ang ginagawa ng pamahalaan sa problemang ito, o palpak mismo ang rehimeng Duterte sa pagresolba sa krisis?

Tumitinding lalo ang mga nagaganap. Kahit na sa mga pagawaan at opisina ay nauuso ang tanggalan dahil isinasara ang mga pabrika dahil sa pandemya. O kaya naman ay nakita itong pagkakataon ng mga kapitalista upang tanggalin ang mga regular na manggagawa upang mapalitan ng mga kontraktwal, na walang security of tenure, walang sapat na benepisyo, at hindi pinapayagan sa kanilang karapatang mag-unyon at organisahin ang mga sarili.

Karapatan ng mamamayan na humingi ng ayuda at obligasyon naman ng pamahalaan ang ibigay ito dahil sa pinatutupad nilang mga patakaran ukol sa pandemya na naging isang malaking sagka sa kakayahang kumita ng masa. Marami ang nawalan ng trabaho at naging resulta nito ay ang kakarampot na pagkain sa hapag kainan na kasalukuyang pinagsasaluhan ng bawat pamilya.

Nag-inisyatiba ang mga mamamayan, sa pangunguna ng Maginhawa community pantry upang kahit papaano'y makatulong kahit bahagya upang maibsan ang kagutuman ng ilang mga nagugutom na kababayan. Hanggang sa ito'y dumami at nagsulputan ito sa iba't ibang bahagi ng bansa. Ipinakita ang pagdadamayan, pagbibigayan, pag-aambagan, at pagbabayanihan ng mga tao. Manipestasyon na palpak ang pamahalaan kaya mamamayan na mismo ang gumawa ng paraan. Subalit ni-redtag pa ito ng mga ulupong at itinuring na kagagawan umano ng mga komunista. Ang dinig yata ng NTF-ELCAC (National Task Force to End Local Communist Armed Conflict) sa community pantry ay communist party.

Pansamantalang katugunan lang ang community pantry. Dapat ay maglunsad ng national pantry ang pamahalaan, subalit sa pagbibigay nga lang ng ayuda ay nagkukulang na sila. Paano pa pag national pantry? Di sapat ang community pantry dahil repleksyon lang ito ng kainutilan ng pamahalaang dapat siyang nagtitiyak ng maayos na ayuda. Paano pag patuloy na gipitin ang mga comunity pantry tulad ng ginawa ng NTF-ELCAC? Subalit patuloy ang bayanihan, bagamat hindi tayo tiyak sa seguridad sa pagkain kung hindi natin susuportahan ang mga magsasaka at mangingisda.

Dapat tiyakin ang pangkalahatang kalusugan ng mamamayan. Hindi sapat ang bakuna lang para sa lahat. Isama sa ayuda ang mga bitaminang kinakailangan ng katawan. Tiyakin ding kumakain ng sapat na pagkaing masustansya ang mamamayan upang hindi magkasakit. Dapat matulungan ang mga magsasaka upang mas umunlad pa ang kanilang paraan ng pagsasaka, matulungan din ang ating mga mangingisda bagamat nag-iingat na silang pumunta sa West Philippine Sea upang mangisda. Ito'y upang matiyak na laging may makakain ang ating mamamayan, o kaya'y maglunsad tayo ng urban farming upang may mapipitas balang araw.

Karapatan ng mamamayan na humingi ng ayuda sa panahong nawalan sila ng pinagkakakitaan dahil hindi na sila pinayagang makalabas ng bahay dahil sa community quarantine na ipinatutupad. Hiling ng maralita na ang pondo ng NTF-ELCAC na nasa higit 19 Bilyong piso ay tanggalin na at gamitin sa ayuda sa mamamayan. Sayang lang ang pondong ginagamit nila sa kawalanghiyaan at pangre-redtag sa bayanihan ng mamamayan. Kaya kung sinasabi ng pamahalaan na said na ang ayuda, aba'y ang P19B ng NTF-ELCAC ay gamitin na sa ayuda at malaking tulong na ito sa mamamayan.

Milyon na ang apektado ng COVID. Nais ng mamamayan na tiyaking ligtas sila at ang kanilang mga mahal sa buhay mula sa sakit na ito. Kung nahihirapan ang pamahalaan, sa pangunguna ni Duterte, na tugunan ang krisis na ito, dapat lang siyang mag-resign na sa pwesto. O kung kapit tuko pa rin siya ay nararapat lamang siyang patalsikin ng taumbayan. At magkaroon ng bagong pamunuang binubuo ng mga magagaling at matitino, na siyang magtitiyak ng kaligtasan ng sambayanan.

Ngayong Abril 28, sa okasyon ng World Day For Safety and Health at Work (Pandaigdigang Araw para sa Kaligtasan at Kalusugan sa Trabaho), sigaw ng maralita, KABUHAYAN, KALUSUGAN, KARAPATAN, KALIGTASAN, IPAGLABAN!

Pahayag ng KPML sa ika-500 taon ng Tagumpay sa Mactan

PAHAYAG NG KPML

Abril 27, 2021

PAGPUPUGAY SA IKA-500 TAON NG TAGUMPAY NG LABANAN SA MACTAN

INURONG NI LAPULAPU NG 44 TAON PA ANG PANANAKOP NG MGA KASTILA

Ang Tagumpay Laban sa Mananakop, at ang bantang pananakop sa West Philippine Sea sa kasalukuyan

Mahigpit na nakikiisa ang pambansang organisasyon ng Kongreso ng Pagkakaisa ng Maralitang Lungsod (KPML) sa pagdiriwang ng ika-500 taon ng tagumpay ng Labanan sa Mactan na naganap noong ika-27 ng Abril 1521. Natalo ng hukbo ni Lapulapu, ang datu ng Mactan, ang mga kawal na Kastila sa pamumuno ng Portuges na kapitan at eksplorador na si Ferdinand Magellan, na napatay naman sa labanang iyon.

Ayon sa kasaysayan, dumating sa ating kapuluan sina Ferdinand Magellan sakay ng kanilang mga barko noong Marso 16, 1521. Nakipagkaibigan siya sa maraming pinuno sa Cebu, pangunahin na si Raha Humabon, at sa isla ng Mactan, kay Datu Zula. Bininyagan bilang Kristyano si Raha Humabon at kanyang mga tauhan. Gayunpaman, tumanggi si Datu Lapulapu na makipag-ugnayan kina Magellan. Dahil dito'y nais ni Magellan na ipakita ang kanilang superyor na armas at hukbo laban sa hukbo ni Lapulapu.

At noong Abril 27, 1521, naging madugo ang labanan sa Mactan nang sumugod doon sina Magellan. Nanaig naman ang mga mandirigma ni Lapulapu sa hukbo ni Magellan, na ayon sa mananalaysay na si Pigafetta, si Magellan ay napatay. Nakatakas naman sina Pigafetta at iba pa nilang kasama. Ayon pa kay Pigafetta, ilan sa mga tauhan ni Magellan ay napatay sa labanan at ang ilang katutubong naging Kristiyano na tumulong sa kanila ay napatay din ng mga mandirigma ni Lapulapu.

Si Lapulapu ay bayani ng ating lahi at sumisimbolo ng kalayaan sa buong Asya. Hindi siya gawa-gawa lang kundi tunay na taong nakibaka para sa kalayaan ng kanyang mga kababayan laban sa mga mananakop na dayuhan.

Sa ngayon ay may panibagong banta sa bansa, ang nagbabantang pananakop ng mga Tsino sa ating bansa. Kung nagawa noon nina Lapulapu na patalsikin ang dayuhan at iurong pa ng apatnapu't apat na taon ang pananakop ng mga Kastila, magagawa rin nating itaboy ang mga Intsik na nais manakop ng ating bayan. Subalit...

Halos pinamimigay na ni Duterte ang ating bansa sa mga Tsino dahil kaibigan siyang matalik ni Pangulong Xi ng Tsina. Mag-alburuto man tayo sa pang-aagaw ng teritoryo ng Tsina sa ating bansa ay tila wala tayong magawa dahil sa kainutilan ni Duterte na ipagtanggol ang ating bansa laban sa bagong mananakop. 

Nariyan pa ang pagsakmal ng dayuhan sa kasarinlan ng bansa dahil sa kasunduan sa pagitan ng Amerika at Pilipinas, tulad ng EDCA (Enhanced Defense Cooperation Agreement), ng 1951 Mutual Defense Treaty (MDT) at ang MLSA (Mutual Logistics Support Agreement, na maaari rin namang Muling Lumuhod Sa Amerika). Dahil dito'y hindi ganap ang kasarinlan ng bansa habang ang mga Tsino naman ay nagbabanta.

Bilang mga maralita, nauunawaan namin ang kahulugan ng kalayaan, hindi lamang kalayaan laban sa bagong mananakop, kundi kalayaan din mula sa kagutuman; kalayaan mula sa pagsasamantala ng tao sa tao; kalayaang hindi nayuyurakan ang dignidad ng mamamayan; kalayaan mula sa paninikis ng estado, tulad ng rehimeng Duterte, na pumaslang ng libu-libong tao nang walang wastong proseso ng batas, o hindi dumaan sa due process of law.

Bilang KPML, inspirasyon sa atin ang Tagumpay sa Mactan upang maipakita ang tradisyon ng pakikibaka laban sa lahat ng mapagsamantala at nagsasamantala sa sinumang malayang tao o naghahangad ng kalayaan. Lalo na't nakikibaka rin ang KPML para sa makataong pabahay, paglaban sa demolisyon, at magkaroon ng maayos na paninirahan ang mga maralitang ginigipit, kundi man ng pamahalaan, ay ng mga pribadong tao, tulad sa Malipay sa Cavite, sa Cebu, at sa iba pang lupang tinitirhan ng mga abang dukha. Inspirasyon ang Tagumpay sa Mactan upang patuloy tayong makibaka para sa ating karapatan, kinabukasan, at dignidad. Ngayong Abril 27, 2021 ay mahalagang pagkakataon upang ipahayag ang mga naturan.

Tayo ay bansa ng mga bayani. Kung may panibagong banta sa ating kalayaan, pambansa man o bilang mga maralita, tulad ng nangyayari ngayon sa West Philippine Sea, ang ginawa nina Lapulapu noon ay inspirasyon upang gawin din natin ang nararapat upang mapalayas ang mga dayuhan at mga mapagsamantalang nais yumurak sa ating kalayaan at karapatan bilang tao.

Mabuhay ang ika-500 taon ng tagumpay nina Lapulapu! Paalisin ang mga Intsik sa West Philippine Sea! Mabuhay ang kalayaan!

Pahayag ng KPML sa Earth Day 2021

PAHAYAG NG KPML SA EARTH DAY 2021

Abril 22, 2021

Mahigpit na nakikiisa ang Kongreso ng Pagkakaisa ng Maralitang Lungsod (KPML) sa lahat ng mamamayan ng mundo sa paggunita sa Earth Day o Araw ng Daigdig. 

Kaming mga maralita ay taospusong nagpupugay, nakikiisa, nakikipagkapitbisig at kumikilos kasama ng iba't ibang organisasyong pangkalikasan. Dahil alam naming para sa kinabukasan ng ating kapaligiran at daigdig ang kanilang ginagawa. Ayaw namin sa pagmimina dahil ito'y nakakasira ng kalikasan habang winawasak ang mga lupaing ninuno para lang sa tubo ng mga gahamang kapitalista.

Nagbabago ang klima o climate change. Ang dating buwang malamig ay napakainit, at ang panahon ng tag-init ay ulan ng ulan. Nasira na ng mga usok ng coal fired power plants at ng pagsusunog ng mga fossil fuel ang ating atmospera na siya dapat sanang sasangga laban sa papatinding init ng sinag ng araw. Maaari tayong magkasakit dahil sa mga ultraviolet rays.

Napakaraming basurang nagkalat. Naglutangan ang mga plastik sa dagat na inaakala ng mga isda na dikya o jelly fish na kanilang kinakain, subalit basurang plastik pala. Ang mga upos ng sigarilyo, na isa sa pinakamalaking bulto ng basura sa mundo bukod sa plastik, ay lulutang-lutang din sa laot. Hindi sapat na tayo'y magbukod lang ng basura mula sa nabubulok at hindi nabubulok sa ating mga tahanan, kundi saan ito dinadala, at bakit napupunta sa mga karagatan. Dapat ihiwalay din natin ang mga electronic waste, lalo na ang mga medical waste, tulad ng heringgilya at facemask, sa ating karaniwang basura. Bawal nang magsunog ng basura subalit kayrami pa ring nagsusunog.

Naniniwala ang mga maralita na dapat tayong magtulungan upang mapangalagaan ang kalikasan dahil iisa lang ang ating daigdig. Walang Planet B at hindi tayo nangangarap na pumunta ng Mars upang palitan ang ating daigdig.

Ngayong Earth Day ay umpisahan na natin ang pagbabago ng bulok na sistemang naging dahilan ng pagsasamantala ng tao sa tao at pagsasamantala sa kalikasan bunsod ng tubo sa ilalim ng bulok na sistemang kapitalismo. Baguhin ang sistema! Alagaan ang kalikasan! Iisa lang ang ating daigdig!

Pahayag ng KPML sa World Health Day (Pandaigdigang Araw ng Kalusugan)

PAHAYAG NG KPML

Abril 7, 2021

PAHAYAG SA WORLD HEALTH DAY

(PANDAIGDIGANG ARAW NG KALUSUGAN)

Mula sa pambansang samahan ng Kongreso ng Pagkakaisa ng Maralitang Lungsod (KPML), ay mahigpit na nakikiisa sa lahat ng gumugunita sa World Health Day o Pandaigdigang Araw ng Kalusugan.

Nakikita namin sa KPML ang patuloy na kapalpakan ng rehimeng Digong sa usapin ng maayos na patakarang pangkalusugan hinggil sa COVID 19 at sa mga maralita. Tingin namin ay HINDI SOLUSYON SA COVID-19 ANG LOCKDOWN. Kundi ang marapat na solusyon, sa palagay namin, ay ang lakihan ang badyet sa kalusugan at paunlarin ng pamahalaan ang buong health care system, tulad ng pagbibigay ng malawakan at libreng mass testing, pagpapaigting ng contact tracing, at bakunang ligtas at epektibo para sa lahat.

Libreng mass testing, ngayon na! Panawagan itong sana'y matugunan ng pamahalaan. Napakamahal ng swab test na kung indibidwal kang kukuha ay baka hindi kaya ng bulsa ng maralita. Pang-almusal nga ay gipit na, pang-swab test pa kaya.

Solusyong medikal, hindi militar. Imbes na medical frontliner ay pawang pulis at sundalo ang nangunguna. Sa isang balita kahapon sa telebisyon, namatay diumano ang isang lalaking lumabag sa curfew at pinag-push up ng tatlong beses ng mga nakahuli. Coronavirus ang kalaban, hindi ang mamamayan.

Trabaho at ayuda, hindi tanggalan. Palpak ang pagbibigay ng ayuda noong nakaraang taon at marami pa rin ang hindi nabigyan ng ayuda, tulad ng SAP. Maraming manggagawa ang nawalan ng trabaho nang masarahan ang maraming pagawaan dahil sa community quarantine. Ang iba'y pinalayas na sa tinutuluyan nila dahil walang pambayad ng upa, kaya nakatira na lang sa kalsada.

Libre, ligtas at epektibong bakuna para sa lahat! Gaano nga ba kamahal ang naririyang bakuna? Kundi man libre'y abotkaya ba iyan ng masa? Paano natin matitiyak na hindi iyan tulad ng dengvaxia na ayon sa mga ulat, kayraming namatay nang maturukan ng nasabing bakuna? Dapat na mahusay itong maipaliwanag sa pamamagitan ng syensya sa ating mga kababayan upang hindi katakutan ang bakunang ito.

Ayusin ang Philippine Health Care System. Ayon sa mga balita, sa Pilipinas pa lang, labingtatlong libong higit na ang namatay sa COVID-19. Grabe. Sabi ng marami, wala kasing komprehensibong plano ang pamahalaan hinggil sa kalusugan, kundi ang tanging solusyon lagi ay lockdown o community quarantine. Dapat tutukan ng pamahalaan ang pag-aayos sa sistemang pangkalusugan ng bayan. Tingnan ang mga halimbawa ng sistemang pangkalusugan sa ibang bansa, tulad sa Vietnam at Cuba. Kung maaayos ng mabuti ang ating health care system, at hindi pulos lockdown ang alam gawin, bakasakaling mas mapababa pa ang kaso ng mga nahahawa ng COVID-19.

Iyan ang aming panawagan sa okasyon ng paggunita sa World Health Day. Iyan ang paninindigan ng KPML. Iyan ang dapat nating pag-usapan. Iyan ang pag-usapan ng mamamayan, at tutukan ng pamahalaan.

Pakikiramay sa mga naulila ni Ka Jess Panis, dating pangulo ng KPML

PAHAYAG NG KPML

Abril 4, 2021

PAKIKIRAMAY SA MGA NAULILA NI KA JESS PANIS, DATING PANGULO NG KPML

Taospusong nagpapaabot ng pakikiramay ang pamunuan at kasapian ng ating pambansang organisasyong Kongreso ng Pagkakaisa ng Maralitang Lungsod (KPML) sa pamilya ni Ka Jess Panis, dating pangulo ng KPML.

Si Ka Jess Panis ay nahalal na pangulo ng KPML sa ikatlong kongreso nito na naganap sa Tomana Covered Court noong 1997. Muli siyang nahalal bilang pambansang pangulo ng KPML sa ikaapat na kongresong naging unang pambansang kongreso nito noong 2001. At napalitan lamang siya ni Ka Pedring Fadrigon noong 2004.

Bilang lider-maralita, natatangi si Ka Jess Panis sa kanyang liderato kung saan mas kinilala ang KPML sa larangan ng pakikibaka laban sa demolisyon, at paglaban para sa karapatan sa pabahay ng maralitang lungsod.

Muli, kami'y taas-noong nagpupugay sa mga naging ambag ni Ka Jess Panis sa pakikibaka ng maralita, at taos-pusong pasasalamat dahil naging bahagi siya ng buhay at pakikibaka ng KPML sa pangarap nitong maitayo ang isang lipunang makatao kung saan walang pagsasamantala ng tao sa tao, pakikibaka laban sa pribadong pag-aari ng mga kasangkapan sa produksyon, at pagsusulong ng sosyalismo.

Pahayag ng KPML: Kalbaryo ng Manggagawa't Maralita

PAHAYAG NG KPML

Marso 30, 2021

KALBARYO NG MANGGAGAWA'T MARALITA:

NAGPAPATULOY PA ANG HIRAP AT DUSA NG MAMAMAYAN

Kami, sa pambansang samahan ng Kongreso ng Pagkakaisa ng Maralitang Lungsod (KPML), ay mahigpit na nakikiisa sa lahat ng mga gumugunita sa semana santa, lalo na sa Kalbaryong dinaranas ng mga manggagawa't maralita sa ilalim ng inutil na rehimeng Duterte.

Sapagkat nagpapatuloy pa rin ang kalbaryo ng kapalpakan ng rehimeng Digong sa usapin ng maayos na patakarang pangkalusugan hinggil sa COVID 19 at sa mga maralita; sinong maralita ba ang dapat mabakunahan, at paano matitiyak na epektibo ang bakuna. HINDI SOLUSYON SA COVID-19 ANG LOCKDOWN. Ang solusyon ay lakihan ang badyet sa kalusugan at paunlarin ng pamahalaan ang buong health care system, tulad ng pagbibigay ng malawakan at libreng mass testing, pagpapaigting ng contact tracing, at bakunang ligtas at epektibo para sa lahat; palpak ang pagbibigay ng ayuda noong nakaraang taon at marami pa rin ang hindi nabigyan ng ayuda, tulad ng SAP;

Sapagkat nagpapatuloy pa rin ang kalbaryo ng kontraktwalisasyon. Hinahati at pinag-aaway ng mga kapitalista ang mga manggagawang regular at manggagawang kontraktwal, subalit dapat magkaisa ang mga regular at kontrakwal na manggagawa laban sa iskemang kontraktwalisasyon na bumabawi sa mga ipinanalong benepisyo ng mga manggagawa sa kasaysayan;

Sapagkat nagpapatuloy pa rin ang kalbaryo ng tokhang, na pumaslang ng walang awa sa libu-libong maralita nang hindi dumadaan sa wastong proseso ng batas, habang nananawagan ng hustisya ang maraming ina sa walang katarungang pagpaslang sa kanilang mga mahal sa buhay;

Sapagkat nagpapatuloy pa rin ang kalbaryo ng tanggalan sa trabaho, na idinadahilan ay ang pandemya. maraming mga manggagawa ang pinaalis sa kanilang mga inuupahan at nakatira na lang sa kalsada nang mawalan ng trabaho dahil nagsara ang pinagtatrabahuhan;

Sapagkat nagpapatuloy pa rin ang kalbaryo ng kawalan ng disenteng paninirahan sa mga maralita; matataas ang bayarin sa mga relokasyon; may mga bantang demolisyon dahil sa mga proyektong pangkaunlaran na hindi kasama ang mga maralita, tulad ng isyu ng Manila Bay at Bulacan International Airport; habang ipinaglalaban ng maralita ang kanilang konsepto at panawagang pampublikong pabahay;

Sapagkat nagpapatuloy pa rin ang kalbaryo ng matataas na presyo ng mga bilihin, na dahil nawalan ng trabaho ang manggagawa, at hindi sapat na panggastos ng mga maralita, ay nagtitiis na lang sa mga walang sustansyang pagkain, tulad ng mumurahing tuyo, noodles at sardinas na kadalasang ibinibigay lang na pantawid gutom sa mga nasalanta ng kalamidad;

Sapagkat nagpapatuloy pa rin ang kalbaryo ng manggagawa't maralita, kaya nananawagan na sila ng pagtatayo ng isang lipunang makataong hindi etsapuwera ang maralita't manggagawa; Kaya sa panahon ngayon ng Kalbaryo ng Manggagawa't Maralita, nananawagan ang KPML na patuloy nating ipaglaban ang karapatang pantao at panlipunang hustisya nang walang maiiwan kahit isang dukha.

Para sa pakikipag-ugnayan, mangyaring kontakin si Ka Kokoy Gan, pangulo ng KPML, sa 09281876700

Pahayag ng KPML sa International Day of Epidemic Preparedness

PAHAYAG NG KPML SA INTERNATIONAL DAY OF EPIDEMIC PREPAREDNESS

Disyembre 27, 2020

Kami sa Kongreso ng Pagkakaisa ng Maralitang Lungsod (KPML) ay nakikiisa sa mamamayan ng buog daigdig sa pagdiriwang ng kauna-unahang International Day of Epidemic Preparedness (Pandaigdigang Araw ng Paghahanda sa Epidemya) ngayong Disyembre 27, 2020. Sadyang napapanahon ang ganitong mga araw lalo na’t nasa panahon tayo ng pandemya o yaong pananalasa ng coronavirus na mas kilala sa COVID-19. Halina’t ating itaguyod ang kahalagahan ng kalusugan ng bawat mamamayan, maging sila man ay mahihirap at kalunos-lunos ang kalagayan, laban sa mga epidemya.

Kasabay nito, magsanay na tayo sa pang-araw-araw na aksyon na pag-iwas upang makatulong na maiwasan ang pagkalat ng virus: Maghinaw ng kamay nang madalas sa sabon at tubig nang hindi bababa sa 20 segundo. Kung hindi magagamit ang sabon at tubig, gumamit ng sanitizer ng kamay na nakabatay sa alkohol. Iwasan ang hawakan ang iyong mga mata, ilong, at bibig. Iwasan ang malapit na pakikipag-ugnay sa mga taong maysakit. Laging magsuot ng face mask at face shield.

Mahalagang palakasin ang pag-iwas sa epidemya sa pamamagitan ng paglalapat ng mga natutunan natin sa panahong ito ng COVID-19, kung paano maiiwasan ang pagtigil ng mga pangunahing serbisyo, at itaas ang antas ng kahandaan upang magkaroon ng pinakamaaga at sapat na tugon sa anumang epidemyang maaaring lumitaw.

Tingin din namin sa KPML na kinakailangan na ng isang bagong sistema, di lang sa usaping kalusugan, kundi sa lipunan sa pangkalahatan, na magtataguyod ng kapakanan ng tao para sa kapwa tao, at sistemang hindi na kailangan ang pagsasamantala ng tao sa tao.

* Unang nalathala sa Taliba ng Maralita, ang opisyal na publikasyon ng pambansang organisasyon ng Kongreso ng Pagkakaisa ng Maralitang Lungsod (KPML), isyu ng Disyembre 16-31, pahina 7.

Pahayag ng KPML sa pagpaslang ng isang pulis sa mag-inang Gregorio

PAHAYAG NG KPML SA PAGPASLANG NG ISANG PULIS SA MAG-INANG GREGORIO

Disyembre 21, 2020

HUSTISYA SA MAG-INANG SONYA AT FRANK GREGORIO!

HUSTISYA SA MGA PINASLANG NG PULIS NA TARANTADO!

Mahigpit na kino-kondena ng buong Kongreso ng Pagka-kaisa ng Maralitang Lungsod (KPML) ang pagpatay sa sibilyan at walang armas na mag-inang Sonya, 52, at Frank Gregorio, 25, nii Police   Senior   Master  

Sargeant Jonel Nuezca sa Purok 2, Barangay Cabayaoasan, Paniqui, Tarlac noong Disyembre 20, 2020.

Isang video mula sa mobile phone ang nag-viral na nagpakita kay Nuezca sa harap mismo ng kanyang anak na babae ang pagbaril niya sa pamilya Gregorio.

Ayon sa panayam ng DZBB kay Police Lieutenant Colonel Noriel Rombaoa, "Pumunta doon para i-confront sila then naungkat na ang usapin sa right of way, hanggang napunta sa insidente na iyon. Parang na-trigger ang galit ng suspek nang magkasagutan iyong anak niya at ang biktimang matanda". Ang usapin ng right of way ay isa sa mga isyu ng KPML, lalo na sa usapin ng pakikibaka para sa karapatan sa pabahay. 

Kaya sa  pagpaslang sa mag-inang Gregorio, dapat tugunan din ng pamahalaan ang katiyakan sa right of way para sa mga naninirahan doon upang maging ganap na maayos at napapakinabangan ng masa.

Dalawa lamang ang mag-inang Gregorio sa libo-libong buhay na nawala dahil sa tokhang, dahil sa tindig at patakaran ng rehimeng Duterte mula nang ito’y umupo sa pwesto noong 2016. Dapat na tuligsain natin, kung hindi man mapigilan natin, ang walanghiya at walang katuturang kultura ng karahasang ipinamamana ng rehimeng Duterte sa sambayanan. Huwag nating hayaang makawala at makatakas sa pananagutang ito, hindi lang ang pulis na pumaslang, kundi ang nagpasimuno ng ganitong kutura ng karahasan. 

* Unang nalathala sa Taliba ng Maralita, ang opisyal na publikasyon ng pambansang organisasyon ng Kongreso ng Pagkakaisa ng Maralitang Lungsod (KPML), isyu ng Disyembre 16-31, 2020, pahina 16.

Pahayag ng KPML sa International Human Solidarity Day

PAHAYAG NG KPML SA INTERNATIONAL HUMAN SOLIDARITY DAY

Disyembre 20, 2020

MAKAURING PAGKAKAISA AT KAMALAYANG MAKAURI

Kami sa Kongreso ng Pagkakaisa ng Maralitang Lungsod (KPML) ay taas-kamaong nakikiisa sa mga maralita at manggagawa sa lahat ng bansa sa paggunita sa International Human Solidarity Day (Pandaigdigang Araw ng Pagkakaisa ng mga Tao). 

Ang mga manggagawa’t maralita, kasama ang iba pang mga aping sektor ng lipunan, ay dapat magkapitbisig, magtulungan, at magkaisa, upang labanan ang kahirapan, at itayo ang isang lipunang makatao na walang pagsasamantala ng tao sa tao. Ito’y sa pamamagitan ng makauring pagkakaisa at kamalayang makauri.

Dapat palawakin at palalimin ang ating makauring pagkakaisa kasama ng masang manggagawa. Kung mulat tayo sa layuning ito, sa bawat sandali ng ating pagkilos, di mangyayaring maiimbudo ang pag-oorganisa sa kaparaanan ng pag-uunyon, at siguradong ikokombina ito sa iba pang paraan. 

Hangga’t hindi umaabot ang kamalayan ng mga maralita sa kanilang pag-iral sa kapitalistang lipunan bilang kapatid-sa-uri ng uring mangaggawa, imposible ang kanilang malawak at matatag na pagkakaisa at pagkakaorganisa bilang isa sa pangunahing pwersa ng pagbabagong panlipunan. Kaya ang KPML ay nagsisikap upang maabot ng kasapian nito at ng iba pang maralita sa komunidad ang makauring pagkakaisa at pagkakaroon ng kamalayang makauri.

* Unang nalathala sa Taliba ng Maralita, ang opisyal na publikasyon ng pambansang organisasyon ng Kongreso ng Pagkakaisa ng Maralitang Lungsod (KPML), isyu ng Disyembre 16-31, 2020, pahina 6.

Pagpupugay at pagbati ng BMP sa ika-34 anibersaryo ng KPML

(Ang pahayag at ang litrato sa ibaba ay mula sa BMP page sa facebook.)

Bukluran ng Manggagawang Pilipino

December 18, 2020 at 11:18 AM

Pagpupugay at pagbati sa ika-34 anibersaryo ng Kongreso ng Pagkakaisa ng Maralitang Lungsod (KPML).

Ang sektor ng maralitang lungsod ay kapatid-sa-uri ng mga manggagawa.

Komon ang ating kalagayan sa panahon ng pandemya, resesyon at kalamidad. Binabatbat ng mga krisis sa kalusugan, kabuhayan, at klima. Parehong walang pag-aari kundi ang sipag at tiyaga, bisig at isip, talino at diskarte. Ipinagsasakripisyo ngayong panahon ng krisis kahit hindi nabiyayaan sa dating pagsigla ng ekonomiya. Ipinagkakait ang pinakabatayang mga karapatan ng napakareaksyonaryong rehimeng nagpapanggap na maka-mahirap at para sa pagbabago. 

Iisa ang ating laban. Singilin ang bulok at palpak na gobyerno sa kabiguan nitong  proteksyunan ang taumbayan mula sa mga krisis. Ibagsak ang kapitalismo at ipundar ang lipunang tunay na makatao at makamanggagawa.

Pahayag ng KPML sa International Universal Health Coverage Day

PAHAYAG NG KPML SA INTERNATIONAL UNIVERSAL HEALTH COVERAGE DAY 

Disyembre 12, 2020

Ngayong panahon ng pananalasa ng COVID-19 sa iba’t ibang panig ng daigdig, kami sa Kongreso ng Pagkakaisa ng Maralitang Lungsod (KPML) ay mahigpit at taos-pusong nakikiisa sa pagdiriwang ng International Universal Health Coverage Day tuwing Disyembre 12. Nakakatuwa, internasyunal na, unibersal pa, subalit ganito inilarawan ito sa internet.

Noong Disyembre 12, 2012, ang United Nations General Assembly ay nag-endorso ng isang resolusyon na hinihimok ang mga bansa na mapabilis ang pag-unlad patungo sa universal health coverage (UHC) - ang ideya na ang bawat isa, saanman naroon ay dapat may akses sa kalidad at abot-kayang pangangalagang pangkalusugan - bilang priyoridad para sa pag-unlad sa internasyonal. Noong Disyembre 12, 2017, ipinahayag ng United Nations ang Disyembre 12 bilang International Universal Health Coverage Day (UHC Day) sa pamamagitan ng resolusyon 72/138. Nilalayon ng International Universal Health Coverage Day na itaas ang kamalayan sa pangangailangan para sa malakas na sistemang pangkalusugan at unibersal na saklaw ng kalusugan. Ang taon 2020 ay isang mahabang sandali ng pagtutuos para sa mga sistemang pangkalusugan sa buong mundo. Habang pinagninilayan ang panahon ng pananalasa ng COVID-19 sa daigdig, ipinakikita ang pang-araw-araw na katotohanang laksa-laksang kaso ng pandemya ang umuutas sa maraming buhay. Mas maraming mga nam

umuno kaysa dati ang nagbibigay ng pansin, at mas maraming tao kaysa dati na ang humihiling ng pagbabago. 

Sa ating bansa, naisabatas na ang R.A. 11223 o ang Universal Health Care Act noong Pebrero 20, 2019. Subalit paano ito magagamit ng mga mahihirap. Kaya sa isyembre 12, hilingin natin ang agarang aksyong pangkalusugan. Nakasalalay dito ang ating buhay, kabuhayan at kinabukasan.

* Unang nalathala sa Taliba ng Maralita, ang opisyal na publikasyon ng pambansang organisasyon ng Kongreso ng Pagkakaisa ng Maralitang Lungsod (KPML), isyu ng Disyembre 1-15, 2020, pahina 9.

Pahayag ng KPML sa International Year of Plant Health (IYPH)

PAHAYAG NG KPML SA INTERNATIONAL YEAR OF PLANT HEALTH (IYPH)

Disyembre 12, 2020

Kami sa Kongreso ng Pagkakaisa ng Maralitang Lungsod (KPML) ay taospusong nakikiisa sa pagdiriwang ng International Year of Plant Health) ngayong 2020. Isang malaking bagay na mayroon nang ganitong pagdiriwang lalo na ngayong nananalasa ang pandemya at kailangan ng mga mamamayang nawalan ng trabaho ang magtanim na ng kanilang mga kakainin upang makaligtas sa nakaambang gutom dulot ng pandemya.

Noong Disyembre 2018, pinagtibay ng Pangkalahatang Asembliya ng United Nations ang Resolusyong nagdeklara ng 2020 bilang International Year of Plant Health. Ang layunin ng IYPH ay upang taasan ang pandaigdigang kamalayan sa kung paano ang pagprotekta sa kalusugan ng halaman ay makakatulong na wakasan ang gutom, mabawasan ang kahirapan, maprotektahan ang kapaligiran, at mapalakas pag-unlad ng ekonomiya.

At dahil idineklara ng United Nations ang 2020 bilang International Year of Plant Health (IYPH), ito’y isang beses lang sa buong buhay na binigyang pagkakataon upang itaas ang pandaigdigang kamalayan sa kung paano makakatulong sa pagprotekta sa kalusugan ang mga halaman na wakasan ang gutom, bawasan ang kahirapan, protektahan ang kapaligiran, at palakasin ang pag-unlad ng ekonomiya.

 

* Unang nalathala sa Taliba ng Maralita, ang opisyal na publikasyon ng pambansang organisasyon ng Kongreso ng Pagkakaisa ng Maralitang Lungsod (KPML), isyu ng Disyembre 1-15, 2020, pahina 8.

Pahayag ng KPML sa Pandaigdigang Araw ng Karapatang Pantao

PAHAYAG NG KPML SA INTERNATIONAL HUMAN RIGHTS DAY (PANDAIGDIGANG ARAW NG KARAPATANG PANTAO)

Disyembre 10, 2020

Mahigpit na nakikiisa ang Kongreso ng Pagkakaisa ng Maralitang Lungsod (KPML) sa pagdiriwang ng Pandaigdigang Araw ng Karapatang Pantao. Sa temang “Karapatan, Kagalingan, at Kaligtasan, Itaguyod! Wakasan ang Kahirapan, Panunupil at Inhustisya!”, kami sa KPML ay nagkakaisang itaguyod at ipagpatuloy ang laban ng mga maralita tungo sa pagtatayo ng isang lipunang makatao na walang pagsasamantala ng tao sa tao, pagpawi ng pribadong pag-aari bilang ugat ng kahirapan, at pagwawakas sa lipunang pinaghaharian ng iilan.

Sa paggunita sa Pandaigdigang Araw ng Karapatang Pantao, singilin natin ang lahat ng may kagagawan ng mga mapanligalig na mga pangyayaring unti-unting kumikitil sa ating dignidad bilang tao. Dapat tayong kumilos na tangan sa dibdib at puso ang adhika ng pagbabago, pagkakapantay-pantay, pagkakapatiran, karapatang pantao, sosyalismo!

Sa kabila ng pandemya kung saan pinagsusuot tayo ng face mask at face shield, dapat mag-social distancing ng isang metro ang pagitan, mag-alkohol, patuloy pa rin tayong nakikibaka upang maibsan ang gutom at kahirapan at maipagpatuloy ang ating layunin at adhikain para sa sambayanan. Hindi tayo titigil hangga't di naipagwawagi ang isang lipunan at sistemang makatao, kung saan pangunahin ang kapakanan ng kapwa tao at hindi ng tubo. Patuloy tayong makibaka hanggang sa tagumpay!

* Unang nalathala sa Taliba ng Maralita, ang opisyal na publikasyon ng pambansang organisasyon ng Kongreso ng Pagkakaisa ng Maralitang Lungsod (KPML), isyu ng Disyembre 1-15, 2020, pahina 7.

Balita Maralita: HLURB at NHA, niralihan ng maralita

BALITA MARALITA

HLURB AT NHA, NIRALIHAN NG MARALITA

Nagkakaisang kumilos ang mga maralita mula sa iba’t ibang samahan sa harapan ng mga ahensya ng pabahay ng Disyembre 9, 2020, isang araw bago ang Daigdigang Araw ng Karapatang Pantao.

Pinuntahan nila ang tanggapan ng National Housing Authority (NHA) sa Elliptical Road, at sa Housing and Land Use Regulatory Board (HLURB) sa Kalayaan Ave., sa Lungsod Quezon. Hapon naman ay nagtungo sila sa Senado. Ipinahayag nila ang mga isyu ng bayarin sa mga relokasyon, ang RA 9507 hinggil sa resruktura at kondonasyon, ang mga bantang demolisyon sa Manila Bay, ang mga isyu ng pribadong lupa, ang kawalan ng pagkakitaan dulot ng pandemya, ang manggagawa nawalan ng tahanan dahil nawalan ng trabaho dahil wala nang pang-upa, ang kalagayan sa relokasyon sa isyu ng pagsapribado ng tubig, atbp.

Lumahok sa aktibidad na ito ang Kongreso ng Pagkakaisa ng Maralitang Lungsod (KPML), Sanlakas, Zone One Tondo Organization (ZOTO), Piglas Maralita, ALMA - QC, Koalisyon Pabahay ng Pilipinas (KPP), at ang Philippine Movement for Climate Justice (PMCJ) na nagsasabing ibatay din sa kalagayan ng klima ang mga batas at patakaran hinggil sa pabahay. Inihalimbawa nila ang relokasyon sa Kasiglahan Village sa Montalban, Rizal na binaha dahil sa bagyo.

* Unang nalathala sa Taliba ng Maralita, ang opisyal na publikasyon ng pambansang organisasyon ng Kongreso ng Pagkakaisa ng Maralitang Lungsod (KPML), isyu ng Disyembre 1-15, 2020, pahina 12-13.

Pahayag ng KPML - Pagpapakawala ng Tubig sa Magat Dam; Pagbaha sa Cagayan at Isabela

PAHAYAG NG KPML HINGGIL SA PAGPAPAKAWALA NG TUBIG SA MAGAT DAM KAYA LUMUBOG ANG CAGAYAN AT ISABELA 

Disyembre 9, 2020

Ang Kongreso ng Pagkakaisa ng Maralitang Lungsod (KPML) ay lubos na nababahala sa nangyaring pagpapakawala ng tubig sa Magat Dam kasunod ng pananalasa ng bagyong Ulysses na nagdulot naman ng malawakang pagbaha. Ano ba ang protocol sa pagpapakawala ng tubig sa dam? Nakita natin sa telebisyon ang pagpapakawala ng tubig mula sa Magat Dam na sumalanta at nagpalubog sa rehiyon ng Cagayan Valley at Isabela. Libo-libong pamilya ang apektado at inilubog sa tubig ang kanilang mga bahay. Ang mga pag-ulang dinulot ng bagyong Ulysses ay nakatulong sa pagtaas ng tubig ng Magat Dam ngunit tumaas ang antas nito, na nagtulak sa dam upang palabasin ang labis na tubig. Ayon sa mga eksperto, ang labis na paglabas ng tubig ay nag-ambag sa pagbaha sa Rehiyon II. 

Ayon sa mga ulat, sinabi ng National Irrigation Administration (NIA) na sinunod nito ang protocol sa pagpapalabas ng tubig sa Magat Dam. Ayon naman sa PAGASA, naglabas sila ng mga babala sa pagbaha sa National Irrigation Administration ilang araw bago tumama ang Ulysses.

Dapat suriin ang kapasidad na nagdadala ng tubig ng mga dam at kundisyon sa naturang mga pasilidad sa mga lugar tulad niyon dahil malamang na nagbago ito sa mga nagdaang panahon. Nagbabago na ang klima, na kahit noong kasagsagan ng bagyong Rolly ay naulit ang pananalasa ng bagyong Ondoy ng Setyembre 26, 2009.

May climate emergency na dapat tugunan. Ayusin ang protokol hinggil sa pagpapakawala ng tubig mula sa mga dam, lalo na’t may mga nananalasang matitinding bagyo. Itigil na ang pagpapakawala ng usok at maruruming enerhiya mula sa mga coal fired power plants, na nagdulot ng matitinding epekto sa klima, na siyang dahilan ng matitinding bagyo. Nawa’y makinig ang mga kinauukulan sa panawagang ito ng KPML.

* Unang nalathala sa Taliba ng Maralita, ang opisyal na publikasyon ng pambansang organisasyon ng Kongreso ng Pagkakaisa ng Maralitang Lungsod (KPML), isyu ng Disyembre 1-15, 2020, pahina 6.

Pahayag ng KPML sa World Soil Day

PAHAYAG NG KPML SA WORLD SOIL DAY

Disyembre 5, 2020

Sa panahon nitong pandemya, marami na sa atin ang natuto nang magtanim. Kinilala na rin natin ang kahalagahan ng mga magsasaka. Ika nga, hindi natin kailangan ng mga doktor o abugado araw-araw, subalit kailangan natin ang magsasaka tatlong beses sa isang araw.

Kaya ngayong World Soil Day (Pandaigdigang Araw ng Lupa), kami sa Kongreso ng Pagkakaisa ng Maralitang Lungsod (KPML) ay lubos na nakikiisa sa pagdiriwang ng araw na ito. Kaisa kami ng mga magsasaka sa pangangalaga ng ating mga lupang pinagtataniman ng mga gulay, palay, kawayan, puno, halaman, at iba pa, na dahilan upang tayo’y mabuhay ng malusog, di nagugutom, at may payapang puso’t isipan.

Saan ba nagsimula ang World Soil Day (WSD)? Ipinagdiriwang ang WSD taun-taon tuwing Disyembre 5 bilang paraan upang ituon ang pansin sa kahalagahan ng malusog na lupa at upang itaguyod para sa napapanatiling pamamahala ng mga mapagkukunan ng lupa. Ang araw a ito’y inirekomenda ng International Union of Soil Science (IUSS) noong 2002. Sa ilalim ng pamumuno ng Kaharian ng Thailand at sa loob ng balangkas ng Global Soil Partnership, suportado ng Food and Agriculture Organization (FAO) ng United Nations) ang pormal na pagtatatag ng WSD bilang pandaigdigang plataporma ng pagpapalawak ng kamalayan tungkol sa lupa. Nagkaisa sa FAO Conference na iendorso ang World Soil Day noong Hunyo 2013 at hiniling ang opisyal na pagpapatibay nito sa 68th UN General Assembly. Noong Disyembre 2013, tumugon ang UN General Assembly sa pamamagitan ng pagtatalaga ng Disyembre 5, 2014 bilang unang opisyal na World Soil Day.

Ang petsang Disyembre 5 ay bilang pagpupugay sa kaarawan ng yumaong H.M. Si Haring Bhumibol Adulyadej, Hari ng Thailand, na isa sa pangunahing tagapagtaguyod ng inisyatibang ito.

* Unang nalathala sa Taliba ng Maralita, ang opisyal na publikasyon ng pambansang organisasyon ng Kongreso ng Pagkakaisa ng Maralitang Lungsod (KPML), isyu ng Disyembre 1-15, 2020, pahina 5.

Pahayag ng KPML sa ika-157 Kaarawan ni Gat Andres Bonifacio

PAHAYAG NG KPML SA IKA-157 KAARAWAN NI GAT ANDRES BONIFACIO

Nobyembre 30, 2020

Mahigpit na nakikiisa ang Kongreso ng Pagkakaisa ng Maralitang Lungsod (KPML) sa pagdiriwang ng ika-157 kaarawan ng ating bayaning si Gat Andres Bonifacio, habang sa panahong ito ng pandemya dulot ng COVID-19 at sunud-sunod na matitinding bagyo, nababahala ang mga maralita dahil sa libu-libong apektado ng kalamidad, na nagdulot ng pagkawala ng maraming gamit at buhay, at pagkawasak ng tahanan dahil sa bagyo’t baha.

Gayundin naman, sinasamantala ng mga employer ang kasalukuyang krisis sa pamamagitan ng pagwawakas ng kanilang regular na mga manggagawa at unyonista at pinapalitan ito ng mga kontraktwal na manggagawa. Ang mga manggagawa naman ay nahaharap sa krisis na nagbabanta sa kalusugan, trabaho at kabuhayan, mga karapatan at kalayaan, at mismong buhay ng ating mga pamilya. Habang nananalasa rin ang pasistang pag-atake laban sa mga unyon ng manggagawa at karapatang pantao. 

Kaya ipinaglalaban ng KPML ang isang komprehensibong pagsusuri at pagsasaayos ng mga patakaran ng estado at mga batas upang mapangalagaan ang karapatan, kagalingan, at kapakanan ng mga maralita, manggagawa at ng kanilang pamilya.

Ngayong Araw ni Bonfacio, patuloy ang pakikibaka para sa kagalingan at karapatan ng ating kapwa maralita tungo sa tunay na pagbabago ng sistema. Sugod, mga kapatid! Tuloy ang laban!

* Unang nalathala sa Taliba ng Maralita, ang opisyal na publikasyon ng pambansang organisasyon ng Kongreso ng Pagkakaisa ng Maralitang Lungsod (KPML), isyu ng Nobyembre 16-30, 2020, pahina 6.