Pahayag ng KPML sa ika-50 anibersaryo ng Earth Day

PAHAYAG NG KPML SA IKA-50 ANIBERSARYO NG EARTH DAY

Abril 22, 2020

Pulos plastik na ang naglipana sa karagatan, tulad ng mga yosi, lighterm straw; mga upos na nagkalat sa lansangan; mga nagamit na face mask at guwantes na nasa basurahan.

Ayaw na ng marami sa atin ang plastik dahil tambak na ang plastik sa mga land fill, dagat, lansangan, at dahilan upang magbara sa mga kanal kung magbaha.

Subalit dahil sa COVID-19 at patakarang social distancing upang di magkahawaan, muling naglipana ang plastik sa mga tindahan, kainan, at iba pang lugar bilang panangga laban sa coronavirus.

Di rin dapat mainitan ang plastik, lalo na'y huwag itong gamiting pambalot sa pagkain, pagkat pag nainitan ang plastik, ang mga latak na kemikal nito'y sasama sa pagkain, na maaaring makasama sa kalusugan ng tao. Ang mga Annex I Countries ay kalampagin pa rin sa usapin ng climate justice. Tiyakin pa ring napaghihiwalay natin ang mga nabubulok na basura sa mga hindi nabubulok.

Kaya sa araw na ito ng ikalimampung anibersaryo ng Earth Day, nakikiisa ang Kongreso ng Pagkakaisa ng Maralitang Lungsod (KPML) sa lahat ng nakikibara upang magkaroon tayo ng sariwang hangin at kumikilos para maalagaan ang ating kalikasan at kapaligiran.

Pahayag ng KPML sa World Creativity and Innovation Day

PAHAYAG NG KPML SA WORLD CREATIVITY AND INNOVATION DAY

Abril 21, 2020

Taas-kamaong nakikiisa ang Kongreso ng Pagkakaisa ng Maralitang Lungsod (KPML) sa pagdiriwang ngayon ng Pandaigdigang Araw ng Pagkamalikhain at Inobasyon (World Creativity and Innovation Day). Lalo sa panahon ngayon ng pananalasa ng COVID-19 sa iba't ibang panig ng mundo, nasa bahay lang tayo, at di na maglimayon, makapunta sa pulong, o pumunta sa iba't ibang lugar.

Napapansin ang mga bagay sa bahay na di pinapansin. Ang mga walang lamang bote at garapa ay ipunin at linisin, at matapos ang lockdown ay maaaring ibenta. Ang mga walang lamang lata ay ating pagtaniman ng mga halaman. Mag-urban gardening upang sa kalaunan ay may mapitas na makakain, tulad ng gulay na alugbati, okra, kamatis, talbos ng kamote.

Magkutingting ng mga sirang gamit, baka sakaling mapaandar muli. Sa araw na ito'y maging malikhain upang di laging balisa sa panahon ng lockdown.

Statement: Live the spirit of Bayanihan ang Unleash the Power of the Organized Masses

A CHALLENGE TO THE DUTERTE REGIME:

LIVE THE SPIRIT OF BAYANIHAN AND UNLEASH THE POWER OF THE ORGANIZED MASSES

The President appeals for Bayanihan to combat the menace of COVID 19. But asking the people to timidly stay at home and practice physical distancing belies the true spirit of Bayanihan.

Bayanihan is not just about cooperation nor simply conforming to rules. It is more about solidarity and action of the people to overcome enormous challenges in life such as the COVID 19 pandemic.

Much has been said about the weaknesses of current government efforts to effectively fight the growing COVID 19 epidemic. More than oneness and adequacy in our government efforts, the colossal task of defeating an invincible adversary like the COVID 19 can only be accomplished by both government and the people willing to survive and return to their normal daily lives.

The urgency to end and be victorious against the current health challenge will need more than funds but physical power. Our front liners have been extended to its limits. Doctors and other health workers have succumbed to infections and died. Even our state forces have been likewise susceptible to the dreaded disease. The protracted war against COVID 19 is taking its toll on the health and lives of all of those in the frontline. No one is safe and imperishable at this time unless we truly flatten the curve.

Hence, we call on the Duterte government to live up to the true spirit of Bayanihan. Unleash the enormous power of the organized masses in the community. The workforce of the organized masses is society’s reserve army against such social menace. Unleash it and utilize it to supplement our current frontline. A community based-approach that taps the reserved force of the organized working people can help government effort to effectively combat COVID 19 at the community level. Much can be done at the community level to augment our front liners. All is needed is to unleash it and make it part of our social warriors against the epidemic.

⚫️ Utilize our organized communities to make masks, gloves and makeshift protective gear. Supply them with materials and procure it for our mass consumption;

⚫️ Organize community laundry washers to provide service to our front liners;

⚫️ Utilize organized workers in the community to augment our barangay forces, in maintaining not only peace and order but ensuring that we maintain effective social distancing and quarantine;

⚫️ Create community kitchens in every community not only to feed our frontlines but also our poor people;

⚫️ Tap our displaced workers to act as logistics volunteers to ensure more efficient deliveries of goods and services;

⚫️ Encourage farmers and fishers’ groups to engage in community gardens for local food production; and,

⚫️ Task our LGUs to utilize our stranded construction workers to build quarantine facilities.

More can be said and done if you unleash this potent force sitting in our communities The spirit of BAYANIHAN is the spirit of united collective action. The true spirit of Bayanihan is believing in the capacity and power of the people.

Meanwhile, as to funding requirements, we suggest that the employers sector - especially the top ten billionaires that is collectively worth P1.6 trillion - to finance the anti-COVID drive. You were the first to benefit during times of economic prosperity. Is it too much to ask for you to be first to sacrifice in times of crisis? Do consider the proposal of purchasing billions worth of zero interest government securities. The odds are not even a loss nor a breakeven (tabla-talo). You own most firms that produce the people's needs and facilitate the circulation of money and commodities. All of this will eventually end up to line your pockets but before it does, it will trickle down to feed and cater to the needs of a hungry and quarantined population. #

Ang Manggahan Low Rise Building Project sa Pasig

Ang Manggahan Low Rise Building Project sa Pasig

Saliksik at sanaysay ni Greg Bituin Jr.

Sa isang blog ay tinalakay ng dalawang babaeng awtor ang tungkol sa Manggahan Low Rise Building Project na umano'y isang climate-resilient na gusali. Ibig sabihin, matatag na itinayo ang gusali anumang klima pa ang magdaan, tulad ng matinding bagyo at pagtaas ng tubig. Halina't hanguan natin ng aral ang kwentong ito.

Ipinaliwanag ito nina Talia Chorover and Jessica Arriens sa kanilang artikulong pinamagatang "Faced with Forced Relocation, the People of One Philippine City Designed Their Own Climate-resilient Neighborhood" na nalathala sa kanilang blog noong Enero 6, 2020.

Nang tumama ang Bagyong Ondoy sa Pilipinas noong 2009, 40,000 katao ang nakatira sa mga iskwater, tulad ng Manggahan Floodway, isang artipisyal na daanan ng tubig na itinayo upang mabawasan ang peligro ng baha. Nagtapon ng isang buwang dami ng tubig ang bagyong Ondoy sa ilang oras lamang. Biglaan. Maraming nawalang buhay at ari-arian.

Matapos nito, nagpasya ang pamahalaan na alisin agad ang mga nakatira sa danger zones, at nagbanta ang mga awtoridad na wasakin ang mga bahay ng mga taong ayaw umalis. 

Kaya nabuo bilang tugon ang Alliance of Peoples’ Organizations Along Manggahan Floodway (APOAMF). Ipinaglaban nila ang karapatan ng mga pamilya sa pabahay at lupain, at manatili sa kanilang lungsod.

Noong 2010, inilunsad ng APOAMF ang People’s Plan, isang prosesong nakabatay sa partisipasyon ng maralita na bumuo ng alternatibong pabahay. Pinayagan ng plano ang mga residente ng Manggahan na magplano ng isang bagong anyo ng pabahay na hindi malayo sa kanilang komunidad.

Nakipagtulungan ang mga residente sa isang arkitekto at sa lokal at pambansang mga opisyal ng gobyerno para sa lokasyon at disenyo, na nakapwesto sa lugar na mababawasan ang peligro sa pagbaha. Nagtatampok ito ng mga matitibay na materyales, makapal na dingding at kisame, nakataas na tangke ng tubig, at estratehikong paglagay ng mga istraktura upang matatag na nakatayo pa rin kahit sa matinding pagbaha o bagyo.

Nakipag-usap ang APOAMF sa gobyerno at itinaguyod nila ang kanilang plano sa lokal, pambansa at internasyonal na antas bago nila opiyal na lagdaan ang kasunduan. Nagsimula ang konstruksyon noong 2017. Kapag nakumpleto, dapat ang proyekto’y magkaroon ng kabuuang 15 mga gusali na may 900 mga yunit, o 60 yunit bawat gusali. Sa ngayon, 480 na pamilya na ang nakalipat sa mga rent-to-own na mga apartment.

Habang binibigyan nito ng pagkakataon ang maraming pamilya na manatili sa Lungsod ng Pasig, di nito kayang mapagbigyan ang lahat. Lalo na't maraming tao na ang nailipat sa mga lugar na higit isang oras ang layo. Gayunpaman marami pa rin ang maaaring matutunan ng ibang mga komunidad mula sa proyekto. Nabanggit ng dalawang awtor sa kanilang artikulo ang  Global Commission on Adaptation’s Action Tracks on Cities and Locally Led Action, na maganda rin na ating alamin kung ano ito. Sa People’s Plan, nakipagtulungan sa proyekto ang mga miyembro ng komunidad at tiniyak ang pagiging matatag o resiliency ng komunidad, nang may nagkakaisang pananaw at malinaw na mga layunin.

Noong panahong buhay pa si Ka Roger Borromeo ng Kongreso ng Pagkakaisa ng Maralitang Lungsod (KPML), napuntahan namin itong Manggahan Floodway matapos ang Ondoy. Kaya nakita ko kung paano nasalanta ng Ondoy ang maraming lugar, tulad ng Santolan at Manggahan Floodway. Kaya naging interesado agad ako sa balitang ito.

Suriin natin at aralin ang mga ito at kung kinakailangan ay magawa rin natin sa ating mga komunidad.

Pinaghalawan: https://www.wri.org/blog/2020/01/faced-forced-relocation-people-one-philippine-city-designed-their-own-climate-resilient

Tingnan din ang kawing na:

http://countrysafeguardsystems.net/sites/default/files/Manggahan%20Floodway%20In-City%20Resettlement%20for%20Informal%20Settler%20Families.pdf

* Unang nalathala sa pahayagang Taliba ng Maralita, ang opisyal na pahayagan ng Kongreso ng Pagkakaisa ng Maralitang Lungsod (KPML), isyu ng Abril 1-15, 2020, pp. 10-11.

Ang karapatan natin sa sapat na pagkain

ANG KARAPATAN NATIN SA SAPAT NA PAGKAIN

Maikling saliksik at sanaysay ni Greg Bituin Jr.

Sinasabi nilang dalawa lang umano ang dahilan o sitwasyon kung bakit ka pakakainin ng gobyerno - sa panahon ng digmaan o sa panahon ng kalamidad. Kung wala isa man sa mga ito, kumilos ka o magtrabaho upang makakain. Ang panahon ngayon ay pumapatak sa dalawa - digmaan laban sa COVID-19, at kalamidad dahil hindi na makapagtrabaho ang tao dahil sa ipinatutupad na community quaran-tine, kung saan pinapayuhan ang mga tao, upang hindi mahawa ng sakit, na huwag lumabas ng bahay.

Ang karapatan sa pagkain ang isa sa limang karapatang nakasaad sa International Covenant on Economic, Social and Cultural Rights o ICESCR. Ang apat na iba pa ay ang pabahay, kalusugan, trabaho, at edukasyon. Ang karapatang ito'y nakasulat din sa dokumentong The Right to Adequate Food, OHCHR Fact Sheet No. 34, OHCHR/FAO (2010). Ang OHCHR ay Office of the High Commissioner on Human Rights ng United Nations. 

Sa General Comment No. 12 ng UN Committe on Economic, Social and Cultural Rights (CESCR), nagbigay sila ng detalyadong patnubay sa mga bansa hinggil sa kanilang obligasyong igalang, protektahan at tuparin ang karapatang magkaroon ng sapat na pagkain. Nabanggit din ng Komite na kasama ang karapatan sa mga sumusunod na magkakaugnay at mahahalagang salik o elemento ng karapatan sa sapat na pagkain: Availability, Accessibility, Adequacy, at Sustainability. 

AVAILABILITY o pagkakaroon ng agarang suplay ng pagkain. Ang bawat tao'y dapat makakuha ng sapat at dekalidad na pagkain, na maaaring mula sa palengke o direkta mula sa tanim, alagang hayop o sa dagat, at iba pang likas na yaman. Pagkaing nakapagpapalusog, at dapat walang nakakapinsalang sangkap at naaangkop sa kultura.

ACCESSIBILITY o madaling makuhang pagkain. Dapat ang pagkakaroon ng sapat na pagkain, ay walang diskriminasyon, na ang pagkain ng mayaman ay kaya ring kainin ng mahihirap. At ang presyo ng pagkain ay abotkaya ng mga bulnerableng sektor ng ating lipunan.

ADEQUACY o pagiging sapat ng pagkain. Dapat hindi kulang, at sapat ang pagkain kung saan kayang kumain ng tao, kahit na dukha, ng tatlong beses sa isang araw, at busog sila.

SUSTAINABILITY o tuloy-tuloy na paglikha ng pagkain. Dahil ang mga tao'y kumakain araw-araw, dapat na patuloy din ang paglika ng pagkain. Dapat nating pasalamatan ang lahat ng magsasaka dahil kung wala sila, wala tayong kakainin araw-araw. 

Sabi nga, di natin kailangan ng abugado o doktor araw-araw, ngunit kailangan natin ng magsasaka araw-araw. Kaya salamat sa lahat ng magsasaka, mangingisda, magtutubo, magninyog, at mga manggagawang patuloy na lumilikha ng pagkain. Mabuhay kayo! 

Pinaghalawan: 

https://www.escr-net.org/rights/food

https://www.ohchr.org/EN/Issues/ESCR/Pages/Food.aspx

* Ang maikling artikulong ito'y inihanda at unang nilathala sa pahayagang Taliba ng Maralita, ang opisyal na publikasyon ng Kongreso ng Pagkakaisa ng Maralitang Lungsod (KPML), isyu ng Abril 1-15, 2020, pahina 2.
* Ang mga litrato ay mula sa fb, at nauna nang nalathala sa Taliba ng Maralita, isyu ng Marso 16-31, 2020.

Pahayag ng KPML sa Araw ng Kagitingan

PAHAYAG NG KPML SA ARAW NG KAGITINGAN

Abril 9, 2020

Kami sa Kongreso ng Pagkakaisa ng Maralitang Lungsod (KPML) ay taospusong nakikiisa sa pagdiriwan ng Araw ng Kagitingan. 

Ayon sa kasaysayan, noong madaling araw ng ABril 9, 1942, nang bumagsak ang lalawigan ng Bataan sa kamay ng mananakop na Hapones, kung saan 67,000 Pilipino  1,000 Tsinoy, at 11,796 Amerikano ang dinakip, at pinaglakad sa 140 kilometrong Bataan Death March patungo sa Capas, Tarlac. Nakikiisa rin kami sa lahat ng kasapi ng Hukbong Bayan Laban sa Hapon (Hukbalahap) na natayo ilang araw lang nang bumagsak ang Bataan.

Ang Araw ng Kagitingan, na sa orihinal ay Araw ng Bataan, ay naisabatas muna ng Kongreso noong 1961 bilang Batas Republika 3022. Noong 1987, sa pamamagitan ng Executive Order 203, ang Abril 9 ay naging Araw ng Kagitingan (Bataan and Corregidor Day). Noong 2007, ipinasa ng Kongreso ang Batas Republika Blg. 9492. Noong 2010, sa pamamagitan ng Presidential Proclamation Blg. 84, ang Abril 9, na isa nang holiday, ay naging "Araw ng Kagitingan".

Sa araw na ito'y pinagpupugayan namin lahat ng magigitng na Pilipi-nong nakibaka para sa kalayaan. At nagpupugay rin kami sa lahat ng mga frontliner laban sa COVID-19 dahil sa kanilang kagitingang magpatuloy sa pagtatrabaho, tulad ng mga doktor at nars upang magamot ang mga maysakit, at maging maayos din ang mga komunidad sa kabila ng lockdown, tulad ng mga basurero, at nasa barangay. Mabuhay kayo!

Pahayag ng KPML sa World Health Day

PAHAYAG NG KPML SA WORLD HEALTH DAY

Abril 7, 2020

FREE MASS TESTING NOW!

Kami sa Kongreso ng Pagkakaisa ng Maralitang Lungsod (KPML) ay taospusong nagpupugay sa lahat ng mga frontliners na ibinubuwis ang kanilang buhay, ayaw man nila o gusto, na biglaang nasadlak sa kalagayang di pa nakikita sa kasaysayan - ang pananalasa ng salot na COVID-19. Marami nang namatay na doktor sa ating bansa, dulot ng COVID-19. Estremelenggoles, ika nga ng makatang Rio Alma sa isa niyang tula tungkol sa salot noon na pumaslang ng maraming tao. Subalit nang magbigti ang hari, agad nawala ang peste, ayon sa tula.

Mariin din naming tinutuligsa ang sinabi ni Pangulong DUterte na maswerte ang mga namatay pagkat namatay silang bayani. Sa aming pagtingin, naging pambala sila sa kanyon sa panahon ng digmaan laban sa COVID-19, dahil na rin sa kakulangan ng paghahanda ng pamahalaan at kakapusan ng mga materyales sa mga ospital.

Nananawagan din kami ng agarang FREE MASS TESTING sa lahat ng lugar, upang maibsan ang sakit at pag-aalala, at malayang makakilos ang mga taong nais magtrabaho at maghanap ng maipapakain sa pamilya.

Pahayag ng KPML sa International Day of Conscience

PAHAYAG NG KPML SA INTERNATIONAL DAY OF CONSCIENCE

Abril 5, 2020

"Makonsensya ka naman." Ito ang kadalasang sinasabi natin sa ating mga kakilalang gumagawa ng mali, o yaong krimen na at katiwalian ang ginagawa, imbes na magpakatao at makipagkapwa. 

"Mga maiitim ang budhi!" Ito naman ang sinasabi natin sa mga taong walang konsensya dahil sa ginagawa nilang kasalanan sa tao, tulad ng pagtokhang o pagkitil ng buhay ng dukhang walang kalaban-laban, at sasabihing nanlaban sa mga may matitinding training sa pakikibaglaban. 

"Papatayin ko kayo!" Ito ba'y salita ng isang pinunong may konsensya, o walang budhi, dahil di iginagalang ang wastong proseso ng batas? 

Sa pamamagitan ng A/RES/73/329, ipinahayag ng United Nations General Assembly na ang Abril 5 taun-taon ay International Day of Conscience. Ito'y dahil sa pangangailangan para sa paglikha ng mga kondisyon ng katatagan at kagalingan at mapayapa at palakaibigang relasyon batay sa paggalang sa mga karapatang pantao at pangunahing kalayaan para sa lahat nang walang pagkakaiba sa lahi, kasarian, wika o relihiyon. 

Kaya sa araw na ito, mahigpit na nakikisa ang Kongreso ng Pagkakaisa ng Maralitang Lungsod (KPML) sa lahat ng nakikibaka para sa karapatang pantao, anumang bansa, anumang lahi, nang walang anumang diskriminasyon. Ayon nga sa ating bayaning si Gat Emilio Jacinto, "Iisa ang pagkatao ng lahat."

Pahayag ng KPML sa Buwan ng Panitikan

PAHAYAG NG KPML SA BUWAN NG PANITIKAN

Abril 2, 2020

Mahigpit na nakikisa ang Kongreso ng Pagkakaisa ng Maralitang Lungsod (KPML), lalo na ang bumubuo ng pahayagang Taliba ng Maralita, sa pagdiriwang ng Abril bilang Buwan ng Panitikan. 

Sa bisa ng Proklamasyon Blg. 968, s. 2015, ang Abril ay pinagtibay bilang Buwan ng Panitikan. Marahil ay dahil tuwing Abril 2 ang kaarawan ng dakilang makatang Francisco Balagtas, na kinikilala sa kanyang walang kamatayang Florante at Laura.

Mahigpit na kinikilala ng KPML ang mahalagang papel ng panitikan sa paghubog ng kabataan ngayon at susunod pang henerasyon, bilang mabu-ting mamamayan, na may paggalang sa karapatang pantao’t dignidad, at pagbaka laban sa mapang-api’t mapagsamantala.

Pahayag ng KPML sa World Tuberculosis Day

PAHAYAG NG KPML SA WORLD TUBERCULOSIS DAY
Marso 24, 2020

Bawat taon, ginugunita natin ang World Tuberculosis (TB) Day tuwing Marso 24 upang madagdagan ang kamalayan ng publiko tungkol sa TB, at magkaroon ng pagsisikap na wakasan ang pandaigdigang epidemya ng TB. Itinakda ang petsa noong 1882 nang ipinahayag ni Dr. Robert Koch na natuklasan niya ang bakteryang nagdudulot ng TB, na nagbukas ng daan tungo sa paglutas at pagpapagaling ng sakit na ito.

Sa ating bansa, namatay si dating Pangulong Manuel Luis Quezon noong 1944 dahil sa tuberkulosis. Dahil nitong Marso 21 ay World Poetry Day, nais nating sabihing batay sa pananaliksik, marami ring makata ang namatay dahil sa tuberkulosis, tulad ng mga sikat na makatang sina John Keats, Elizabeth Barrett Browning, Robert Burns, Paul Eluard, Saima Harmaja, atbp. Namatay rin sa TB ang mga manunulat na sina Anton Chekhov, Stephen Crane, Maxim Gorky, Dashiell Hammett, Franz Kafka, Jules Laforgue, William Somerset Maugham, Guy de Maupassant, George Orwell, Alexander Pope, Voltaire, at ang mga rebolusyonaryong sina Simon Bolivar at John Reed.

Sa natuklasan ni Dr. Koch hinggil sa TB, nawa'y matuklasan na rin ang bakteryang nagpasulpot sa COVID-19 at malutas na rin ito sa lalong madaling panahon. Nawa'y agaran nang magamot ang mga may TB, lalo na yaong tinamaan ng COVID-19, at malunasan na ang mga karamdamang ito sa lalong madaling panahon.

Pahayag ng KPML sa International Day for the Right to the Truth Concerning Gross Human Rights Violations and for the Dignity of Victims

PAHAYAG NG KPML SA INTERNATIONAL DAY FOR THE RIGHT TO THE TRUTH CONCERNING HUMAN RIGHTS VIOLATIONS AND FOR THE DIGNITY OF VICTIMS

Marso 24, 2020

Ginugunita tuwing Marso 24 taun-taon ang International Day for the Right to the Truth Concerning Gross Human Rights Violations and for the Dignity of Victims. Ang taunang paggunitang ito ay bilang pagbibigay-pugay sa alaala ni Monsignor Óscar Arnulfo Romero, na pinatay noong ika-24 ng Marso 1980. Aktibo si Monsignor Romero sa pagtuligsa sa mga paglabag sa karapatang pantao sa El Salvador. 

Dito rin sa ating bansa ay maraming naging biktimang inosente ang War on Drugs ng pamahalaan. Ilan sa mga biktima nito ay sina Danica Mae Garcia, 5 taong gulang,  Francisco Manosca, 5, at Althea Barbon, 4. 

Kaya kami sa Kongreso ng Pagkakaisa ng Maralitang Lungsod (KPML) ay nananawagan: Nawa'y magkaroon ng katarungan ang mga inosenteng batang biktima ng walang awang tokhang at War on Drugs. Panagutin lahat ng ngingisi-ngising kriminal! Hustisya sa lahat ng inosenteng biktima!

Pahayag ng KPML sa World Water Day

PAHAYAG NG KPML SA WORLD WATER DAY

Marso 22, 2020

Sa okasyon ng pagdiriwang sa Pandaigdigang Araw ng Tubig o World Water Day, kami sa Kongreso ng Pagkakaisa ng Maralitang Lungsod (KPML) ay nananawagan sa Maynilad at Manila Water, pati na sa Prime Water na pag-aari ng Villar, na ilibre na ang pagbabayad ng tubig ng mga maralita sa panahong ito ng COVID-19. 

Sobra-sobra na ang kanilang tinutubo sa tubig na ginawa na nilang negosyo, imbes na ito’y serbisyo sa mamamayan. 

Napakasimpleng panawagan ng mga maralitang isang kahig, isang tuka na nga, at may pananalasa pa ng sakit, ay nariyan pa ang mataas na bayaring tubig. 

Nawa ang aming munting kahilingan ay mapakinggan at mapagbigyan ng kinauukulan.

Pahayag ng KPML sa International Day of Forest

PAHAYAG NG KPML SA INTERNATIONAL DAY OF FORESTS

Marso 21, 2020

Mahalaga ang kagubatan sa ating buhay bilang tao, kahit tayo man ay wala sa bundok o lalawigan, kundi pawang nasa kalunsuran, o iskwater sa sariling bayan. Pagkat sinasaklaw ng kagubatan ang maraming mahahalagang likasyaman sa buong mundo. 

Subalit marami nang kagubatan ang nakakalbo dahil sa kapitalismo at pagiging ganid ng tao sa salapi. Gayunpaman, ayon sa United Nations, nasa 1.6 bilyong tao - kabilang ang higit sa 2,000 mga katutubong kultura - ang umaasa sa kagubatan para sa kanilang kabuhayan, gamot, gasolina, pagkain at tirahan. 

Nang dineklara ng United Nations ang Marso 21 bilang International Day of Forest noong 2012, kami sa Kongreso ng Pagkakaisa ng Maralitang Lungsod (KPML) ay mahigpit na nakikiisa sa pamawagang pangalagaan natin ang ating mga kagubatan.

Pahayag ng KPML sa International Day for the Elimination of Racial Discrimination

PAHAYAG NG KPML SA INTERNATIONAL DAY FOR THE ELIMINATION OF RACIAL DISCRIMINATION (PANDAIGDIGANG ARAW UPANG MAPAWI ANG DIKSRIMINASYON SA LAHI)

Marso 21, 2020

Ang International Day for the Elimination of Racial Discrimination ay ginugunita taun-taon dahil sa nangyaring pag-atake at pagpaslang ng mga pulis sa Sharpeville, South Africa sa 69 katao sa isang mapayapang demonstrasyon laban sa "ipinasang batas" hinggil sa apartheid noong 1960. Tulad din ito ng naganap na Mendiola massacre, na ikinamatay ng mga magsasakang nagmartsa sa Mendiola noong Enero 22, 1987, at Kidapawan massacre kung saan mga magsasakang nagugutom ang nagsagawa ng demonstrasyon sa Kidapawan noong Abril 1, 2016. Hindi lang racial discrimination, kundi class discrimination ang naganap. Mahirap lang kasi ang mga magsasakang pinagsasamantalahan ng mayayaman.

Noong 1979, pinagtibay ng United Nations General Assembly ang Marso 21 taun-taon bilang pagmumulat laban sa rasismo at anumang diskriminasyon. Mahigpit na nakikiisa ang KPML sa paggunita ng araw na ito upang matigil na ang diskriminasyon batay sa balat, kasarian, lahi o anupamang pagkakaiba.

Pahayag ng KPML sa World Poetry Day

PAHAYAG NG KPML SA WORLD POETRY DAY

(PANDAIGDIGANG ARAW NG TULA)

Marso 21, 2020

Kami sa Kongreso ng Pagkakaisa ng Maralitang Lungsod (KPML) ay taos-pusong nakikiisa sa pagdiriwang ng World Poetry Day tuwing, Marso 21 sa buong daigdig. Kinikilala ng United Nations Educational, Scientific and Cultural Organization (UNESCO) ang natatanging kakayahan ng tula upang maging malikhain ang diwa ng tao. Pinagtibay sa ika-30 sesyon ng UNESCO na ginanap sa Paris noong 1999 ang desisyong ipahayag ang Marso 21 bawat taon bilang World Poetry Day (Pandaigdigang Araw ng Tula).

Bagamat ipinagdiriwang sa ating bansa ang buwan ng Abril bilang Buwan ng Panitikan, kasabay ng pagdiriwang ng kaarawan ni Francisco Balagtas tuwing Abril 2, ang World Poetry Day tuwing Marso 21 ay isang malaking hakbang upang muli nating balikan ang mga dakilang makata ng ating bayan, tulad nina Francisco Balagtas, Jose Corazon de Jesus, Florentino Collantes, Emilio Mar. Antonio, Benigno Ramos, at marami pang iba. Nais nating balikan ang ating mga katutubong pagtula, tulad ng dalit, tanaga, diona, talindaw, gansal, ambahan, bugtong, at marami pang iba upang ipaalala sa mga susunod pang henerasyon na tayo’y may katutubong pagtulang may sukat at tugma na dapat nilang maunawaan, at kung maaari ay lumikha at kumatha rin sila ng tula.

Ang tulang likha ng maralita, karaniwan, ay ekspresyon ng kanilang pagdurusa sa karukhaan, at tapang na makibaka upang maalpasan ang kahirapan, at pangarap na magkaroon ng pagbabago sa lipunan, at kamtin ang ginhawang ipinaglaban ng mga Katipunero noon pa man. Nawa, ngayong World Poetry Day, patuloy nating isulat sa malikhaing pagtula ang ating pagnanasang pagbabago para sa ikabubuti ng lahat.

Ang Hasik ng Katipunan, ang Buklod ng BMP, at ang KASAMA ng KPML

ANG HASIK NG KATIPUNAN, ANG BUKLOD NG BMP, AT ANG KASAMA KPML

Maikling sanaysay ni Gregorio V. Bituin Jr.

May ninuno pala ang BUKLOD ng Bukluran ng Manggagawang Pilipino (BMP) at ang dating KASAMA ng grupong Kongreso ng Pagkakaisa ng Maralitang Lungsod (KPML). Ito ang HASIK ng KKK o Katipunan nina Gat Andres Bonifacio.

Sa aklat na "Kartilyang Makabayan: Mga Tanong at Sagot Ukol Kay Andres Bonifacio at sa KKK" na sinulat ni Hermenegildo Cruz, ay nabanggit ang pagbubuo ng Hasik na maihahalintulad sa pagbubuo ng Buklod ng BMP, at dating KASAMA (Kapatiran ng mga Sosyalistang Aktibistang Maralita), ng KPML na binago na't ginawa na ring Buklod na ibinatay sa BMP. Sa pahina 21 ng nasabing aklat ay nasusulat: 

25. - Sa papaanong paraan ginagawa ang pagkuha ng kasapi? - Sa bawa't pook ay nagtatayo ng isang wari'y lupon na kung tawagin ay "Hasik" na binubuo ng tatlo katao na parang tatlong tungko. Ang "Hasik" na ito ang siyang sa inot-inot ay nanghihikayat upang may sumapi sa "Katipunan". Pagdamidami na ng mga kasangayon ay saka pa lamang itinatayo ang "Balangay" na pinamumunuan ng isang lupon na ang mga tungkulin ay tulad din ng sa Kataastaasang Lupon. Ang mga "Hasik" na yaon ay di na ipinagpatuloy ng malapit na ang tangkang panahon sa paghihimagsik, pagka't ang mga taong baya'y halos naguunahan nang sila'y mapabilang sa "Katipunan".

Ang pagbubuo ng Buklod ng BMP ay naisulat ng namayapang Ka Popoy Lagman sa akda niyang PAGKAKAISA na nalathala sa magasing Tambuli ng BMP noong Disyembre 1998. Halina't sipiin natin ang ilang bahagi nito:

"Dapat ay mas madali ang magbuo ng grupo o sirkulong pampulitika ng lima hanggang sampu katao sa bawat kompanya (tawagin natin na mga buklod) kaysa magbuo ng unyon na kinakailangang dumaan sa mga ligal at teknikal na proseso. Upang mapatampok ang pampulitikang tungkulin at katangian ng BMP, mas wasto at mas mahusay na ang magiging ispesyalisasyon nito ay ang pagbubuo ng network ng mga grupo o sirkulong pampulitika sa pinakamaraming kompanyang maaabot nito na mas nakatuon sa pampulitikang pagkamulat, pagkakaisa, pagkakaorganisa at pakikibaka ng masang manggagawa bilang uri."

"Oryentasyon ng mga buklod na ito ang aktibong paglahok sa pang-unyong pakikibaka nang hindi binabago ang prinsipal na diin sa pampulitikang pag-oorganisa. Bawat lider, organisador at aktibista ng BMP ay dapat magkaroon ng mga target na kompanyang tatayuan nila ng mga buklod. Dapat ay walang tigil ang araw-araw na pagbubuo ng mga buklod na ito hanggang sa malatagan natin ang mayorya ng mga kompanya sa buong bansa ng ganitong network ng sosyalistang pagkakaisang makauri bilang preparasyon sa paglubha ng krisis ng globalisasyon at pag-igpaw ng kilusan ng uring manggagawa sa antas ng pampulitikang pakikibaka."

Sa bahagi naman ng KPML, binuo noon ang KASAMA upang maipalaganap ang makauring pagkakaisa ng mga maralita bilang proletaryado at ng uring manggagawa sa kabuuan. Katatampukan ang KASAMA ng pag-oorganisa at pampulitikang pagmumulat. Ayon sa Oryentasyon ng KASAMA: "Ang KASAMA ay isang pampulitikang grupo o sirkulo (mga 5-10 katao) ng mga mulat na maralita sa loob ng isang lokal na organisasyon at komunidad na kinikilusan ng KPML, o kaya'y mga indibidwal na maralitang wala pang organisasyon sa isang komunidad."

"Binuo ang KASAMA bilang katuwang ng KPML sa pagkokonsolidad sa ating mga kinikilusang komunidad. Pagkat sila ang mga mulat (may mataas na pampulitikang kamalayan) na maralita sa loob ng kanilang mga lokal na organisasyon, pangungunahan nila ang kanilang samahan sa mga pagkilos sa loob at labas ng kanilang mga komunidad, at magsasagawa ng pagmumulat sa hanay ng kasapian at maging sa iba pang organisasyon at mga kalapit pang komunidad. Ang mga KASAMA ang siyang magiging gulugod sa pag-oorganisa at pagkokonsolida ng ating organisasyon at mga komunidad na kinikilusan."

Sa ngayon, napagpasyahan na ng KPML na mas mainam na gamitin ang Buklod, at nawala na ang pag-oorganisa ng Kasama bilang pagtalima sa atas ng BMP, kung saan kasaping organisasyon ang KPML, na magtayo ng Buklod sa mga komunidad ng maralita upang palakasin ang sosyalistang kilusan.

Maraming salamat sa Katipunan, at may pinagmanahan pala ang BMP at KPML bilang mga mapagpalayang organisasyon tungo sa pagtatayo ng lipunang walang pang-aapi at pagsasamantala ng tao sa tao.

Mga pinaghalawan:

aklat na "Kartilyang Makabayan: Mga Tanong at Sagot Ukol Kay Andres Bonifacio at sa KKK" na sinulat ni Hermenegildo Cruz, (inilimbag, 1922), pahina 22

http://popoylagman.blogspot.com/2009/07/pagkakaisa-akda-ni-ka-popoy-lagman.html

https://kpml-org.blogspot.com/2008/04/ang-pagbubuo-ng-kasama.html

* Unang nalathala sa pahayagang Taliba ng Maralita, ang opisyal na publikasyon ng Kongreso ng Pagkakaisa ng Maralitang Lungsod (KPML), isyu ng Marso 16-31, 2020, pahina 18-19.

Pahayag ng KPML sa International Day of Mathematics

PAHAYAG NG KPML SA PAGDIRIWANG NG KAUNA-UNAHANG INTERNATIONAL DAY OF MATHEMATICS (PANDAIGDIGANG ARAW NG MATEMATIKA) NGAYONG 2020

Marso 14, 2020

Kaakibat na ng mga maralita sa pang-araw-araw nilang pamumuhay. Mula sa pagbibilang ng baryang pamasahe ng mga anak, pagbibilang kung magkano ang badyet ng pagkain sa bahay, mga bayarin sa araw-araw, bayad sa matrikula ng anak, ang matematika’y karugtong na ng buhay. 

Ipinahayag ng United Nations Educational, Scientific and Cultural Organization (UNESCO) ang Marso 14 bilang International Day of Mathematics (IDM).  Ito ay inilunsad ng UNESCO sa ika-40 sesyon ng Pang-kalahatang Kumperensya nito noong Nobyembre 26, 2019. Unang ipinag-diwang ang International Day of Mathematics ngayong Marso 14, 2020.

Layunin nitong ipagdiwang ang kagandahan at kahalagahan ng matematika at ang mahalagang papel nito sa buhay ng lahat. Pinangunahan ng International Mathematical Union (IMU) ang proyekto hanggang sa ipahayag ng UNESCO ang Marso 14 bilang International Day of Mathematics. Ipinagdiriwang din ang Marso 14 sa maraming bansa bilang Pi Day (Araw ng Pi) dahil ang nasabing petsa ay nakasulat bilang 3/14 sa ilang bansa, at dahil ang mathematical constant na Pi ay tinatayang nasa 3.14.

Kaya sa mga susunod pang Marso 14, sa Pandaigdigang Araw ng Matematika, mahigpit na nakikiisa ang KPML sa pagdiriwang nito.

Pahayag ng KPML hinggil sa Anti-Terrorism Bill

PAHAYAG NG KPML HINGGIL SA ANTI-TERRORISM BILL

Marso 10, 2020

IPAGTANGGOL ANG KARAPATAN NG MAMAMAYAN!

Ang KPML, bilang sosyalistang organisasyon, ay naniniwalang dapat baguhin ang sistemang mapang-api at mapagsamantala. At ito’y lagi naming ipinapahayag. Nakasaad mismo ito sa Saligang Batas ng KPML, Deklarasyon ng mga Prinsipyo, Artikulo 2, Seksyon 4. “Bilang sosyalistang organisasyon, itinatakwil ng KPML ang pribadong pagmamay-ari ng mga kasangkapan sa produksyon, dahil ito ang pinag-uugatan ng malaganap na kaapihan, kahirapan at pagsasamantala ng tao sa kapwa tao.”

Sa harap ng mga problema sa lipunan, tulad ng kahirapan at pagsasamantala sa aming mga maralita, nangangarap kami ng isang lipunang makakaranas ng ginhawa ang aming mga anak, at walang pang-aapi, pandarahas o pagsasamantala. Subalit sa kalagayang may mga naghaharing uri sa lipunan, na siyang dahilan ng mga pang-aapi, kaming mga maralita ay nangangarap at nagsisikap maitayo ang lipunang walang mapagsamantala. Subalit hinahadlangan ang mga pagsisikap na ito ng bantang pagpasa ng Anti-Terrorism Bill, na inamyendahan ang Human Security Act of 2007.

Kami bang may pangarap na marangal para sa aming maralita, at lumalaban sa mga maling polisiya ng naghaharing uri’t elitista sa lipunan, dahil ba kaiba ang aming paniniwala, ituturing agad kaming terorista? Terorismo na ba ang magnais ng isang lipunang pantay at walang pagsasamantala ng tao sa tao? Nasaan na ang kalayaan at karapatan ng simpleng mamamayan, na ang pinagtatanggol lang ng nasabing panukala ay ang mga elitistang takot maghimagsik ang kanilang mamamayan, at nais manatili ng habambuhay sa kapangyarihan. Dapat ibasura ang Anti-Terrorism Bill dahil proteksyon lang ito sa mayayaman, habang ginigipit nito ang karapatang pantao ng mahihirap na mamamayan!

Pahayag ng KPML hinggil sa World Wildlife Day

PAHAYAG NG KPML HINGGIL SA WORLD WILDLIFE DAY (PANDAIGDIGANG ARAW NG MGA BUHAY NA ILAHAS)

Marso 3, 2020

HUWAG MAGTAPON NG BASURA KUNG SAAN-SAAN

Ngayong World Wildlife Day, ating isipin ang kapakanan ng ating mga kapwa nilalang, ang mga hayop sa lupa, ang mga ibon sa papawirin, at mga isda sa ilog at dagat. Maraming isda ang nakakakain ng mga plastik at upos ng sigarilyo, na nagdudulot ng kanilang kamatayan, gayong hindi sila ang nagkalat ng mga plastik at hindi rin sila nagyoyosi.

Noong ika-20 ng Disyembre 2013, ipinasa ng United Nations General Assembly ang resolusyong 68/205 sa ika-68 na sesyon nito na ipinahayag ang Marso 3, na siyang pandaigdigang araw ng pagpapatibay ng Convention on International Trade in Endangered Species of Wild Fauna and Flora (CITES). Iminungkahi ng Thailand na ideklara itong World Wildlife Day upang ipagdiwang at itaas ang kamalayan ng tao hinggil sa mga mga ligaw na fauna at flora sa mundo. At upang mapangalagaan ito, dapat nating baguhin ang ating maling pag-uugali sa kalikasan, na siyang nagiging dahilan upang ito’y masira o mawala.

Pahayag ng KPML hinggil sa Zero Discrimination Day

PAHAYAG NG KPML HINGGIL SA ZERO DISCRIMINATION DAY (ARAW NG KAWALAN NG DISKRIMINASYON)

Marso 1, 2020

Kami sa Kongreso ng Pagkakaisa ng Maralitang Lungsod (KPML) ay taospusong nakikiisa sa lahat ng mamamayang nakikibaka upang mawala na ang diskriminasyon. Sa akdang “Liwanag at Dilim” ni Gat Emilio Jacinto ay kanyang sinabi: “Iisa ang pagkatao ng lahat!” Napakalinaw na sinabi na niya sa ating wala dapat diskriminasyon sa sinuman, pagkat iisa lamang tayo, bilang taong may dangal, bilang taong magkakapatid. At di dapat pag-usapan ang uring pinanggalingan, kung mayaman ka ba o mahirap pa sa daga.

Tuwing Marso 1, maraming tao sa mundo ang nagsasama-sama upang ipagdiwang ang Zero Discrimination Day. Unang ipinagdiwang ng United Nations ang Zero Discrimination Day noong Marso 1, 2014, pagkatapos ng UNAIDS, isang programa ng UN sa immunodeficiency virus (HIV) at Acquired Immune Deficiency Syndrome (AIDS), nang inilunsad ang Zero Discrimination Campaign,World AIDS Day 2013.

Kaya kami sa KPML ay taas-kamaong nagpupugay sa lahat ng nakikibaka para palitan na ang bulok na sistema ng lipunan at itayo ang isang lipunang pantay-pantay at walang pagsasamantala ng tao sa tao.