Pahayag ng KPML hinggil sa Zero Discrimination Day

PAHAYAG NG KPML HINGGIL SA ZERO DISCRIMINATION DAY (ARAW NG KAWALAN NG DISKRIMINASYON)

Marso 1, 2020

Kami sa Kongreso ng Pagkakaisa ng Maralitang Lungsod (KPML) ay taospusong nakikiisa sa lahat ng mamamayang nakikibaka upang mawala na ang diskriminasyon. Sa akdang “Liwanag at Dilim” ni Gat Emilio Jacinto ay kanyang sinabi: “Iisa ang pagkatao ng lahat!” Napakalinaw na sinabi na niya sa ating wala dapat diskriminasyon sa sinuman, pagkat iisa lamang tayo, bilang taong may dangal, bilang taong magkakapatid. At di dapat pag-usapan ang uring pinanggalingan, kung mayaman ka ba o mahirap pa sa daga.

Tuwing Marso 1, maraming tao sa mundo ang nagsasama-sama upang ipagdiwang ang Zero Discrimination Day. Unang ipinagdiwang ng United Nations ang Zero Discrimination Day noong Marso 1, 2014, pagkatapos ng UNAIDS, isang programa ng UN sa immunodeficiency virus (HIV) at Acquired Immune Deficiency Syndrome (AIDS), nang inilunsad ang Zero Discrimination Campaign,World AIDS Day 2013.

Kaya kami sa KPML ay taas-kamaong nagpupugay sa lahat ng nakikibaka para palitan na ang bulok na sistema ng lipunan at itayo ang isang lipunang pantay-pantay at walang pagsasamantala ng tao sa tao.

Pahayag ng KPML hinggil sa pag-abruba ng Kongreso sa 100% foreign ownership

PAHAYAG NG KPML LABAN SA PAG-APRUBA NG KONGRESO NA PINAHIHINTULUTANG MAG-ARI NG PAMPUBLIKONG SERBISYO ANG MGA DAYUHAN

Pebrero 28, 2020

MGA KONGRESISTANG TAKSIL SA BAYAN

BINEBENTA ANG BANSA SA DAYUHAN

Mahigpit na tinutuligsa ng Kongreso ng Pagkakaisa ng Maralitang Lungsod (KPML) ang mga bentador na kinatawan ng Mababang Kapulungan ng Kongreso dahil sa pag-apruba nila sa panukalang batas na maaari nang mag-ari ang mga dayuhan ng mga pampublikong utilidad at serbisyo sa ating bansa.

Nakasaad sa Konstitusyon ng Pilipinas (1987) na hanggang 40% lang ang pag-aari ng dayuhan habang 60% ay pag-aari ng Pilipino sa anumang pampublikong utilidad at serbisyo sa bansa, subalit bakit pinayagan ng mga kinatawan, o kawatan, ang ganitong panukalang dapat mag-ari ng 100% ang dayuhan sa lupain ng Pilipinas. Dehado ang Pinoy. Lyamadong lyamado ang mga dayuhan!

Kita agad natin na hindi talaga nagsisilbi sa masang Pilipino ang mga "halal" na kongresista sa ating bansa. Sila'y mga bentador na dapat lang tuklawin ng kapwa nila ahas sa Kongreso. Pahirap sila sa mamamayan. Hindi sila dapat kinatawan, pagkat sila'y mga kawatan. Kawatang ibinebenta ang ating bayan sa mga dayuhan. Dapat na silang sipain sa pwesto!

Pahayag ng KPML sa ika-34 anibersaryo ng Pag-aalsang Edsa

PAHAYAG NG KPML SA IKA-34 ANIBERSARYO NG PAG-AALSANG EDSA

Pebrero 25, 2020

HINDI BIGO ANG AKTO NG SAMA-SAMANG PAGKILOS

Walang ipinangakong pagbabago ang mga nagpasimula ng Pag-aalsang Edsa. Nagpartisipa ang maraming tao roon dahil sawa na sila sa diktadura. Hindi bigo ang Edsa pagkat natanggal nila ang isang diktador. Hindi bigo ang mamamayan sa pagpapatalsik sa pamilya Marcos sa pwesto.

Kung sinasabi nilang bigo ang Edsa, iyon ay dahil hindi na natanaw ng masa ang panibagong pag-asang inaasam nila, gayong walang nangako ng pagbabago kung sasama sa pag-aalsang Edsa. Nangyari iyon dahil sa kagustuhan ng mga taong mapaalis ang diktador. Kung bigo ang pag-aalsang Edsa, aba'y okey pala ang diktadura.

Ang mismong akto ng pag-aalsa ay hindi kabiguan, kundi pinatunayan lang nito na sa sama-samang pagkilos ng mamamayan, ay maibabagsak ang isang gahaman sa kapangyarihan. Ang aral na ito ng sama-samang pagkilos ay dapat aralin ng uring manggagawa at mga maralita’t api sa lipunan upang mabago ang bulok na sistema.

Ang bigo sa Edsa ay di nakamit ng mamamayan ang isang bagong sistema pagkat inagaw lamang ng isang paksyon ng naghaharing uri ang kapangyarihang dapat ay sa mamamayan.

Pahayag ng KPML hinggil sa bantang pagsasara ng ABS-CBN, apektado ang nasa 11,000 manggagawa

PAHAYAG NG KPML SA BANTANG PAGSASARA NG ABS-CBN, APEKTADO ANG NASA 11,000 MANGGAGAWA

Pebrero 21, 2020

PROTEKSYUNAN ANG MGA MANGGAGAWA NG ABS-CBN!

KARAPATAN SA TRABAHO AT MAGPAHAYAG, IPAGLABAN!

Kami sa Kongreso ng Pagkakaisa ng Maralitang Lungsod (KPML) ay taas kamaong nakikiisa sa laban ng mga manggagawa ng malaking network na ABS-CBN, lalo na’t nagbabantang mawalan ng trabaho ang nasa labing-isang libong manggagawa nito.

Ginigipit ng "pangulo" ng bansa ang ABS-CBN, at nais niyang hindi na maaprubahan ng bagong prangkisa ang nasabing network, dahil hindi niya ito kakampi, at patuloy siyang tinutuligsa nito dahil sa kanyang mga polisiyang tokhang at kawalan ng paggalang sa karapatang pantao at wastong proseso. Ginigipit niya ang nasabing network upang hindi na nito maipagpatuloy ang gawaing magpahayag. Ginigipit niya ang ABS-CBN dahil may balak siyang ipalit na network dito na agad niyang mapapasunod at aayon sa kanya sa anumang polisiyang kanyang gawin.

Sa mga manggagawa ng ABS-CBN, patuloy tayong makibaka at ipaglaban ang ating karapatan bilang manggagawa, at isulong natin ang tunay na pagbabago. Sama-sama nating palitan ang bulok na sistemang  elitista sa bansa. Halina’t magkapitbisig tungo sa isang lipunang tunay na malaya mula sa pang-aapi, pandarahas, at pagsasamantala! 

Mabuhay kayo!

Pahayag ng KPML sa International Mother Language Day

PAHAYAG NG KPML SA INTERNATIONAL MOTHER LANGUAGE DAY (PANDAIGDIGANG ARAW NG INANG WIKA)

Pebrero  21, 2020

IPAGTANGGOL ANG WIKANG FILIPINO

SA LAHAT NG MGA NAIS YUMURAK NITO

Kami sa Kongreso ng Pagkakaisa ng Maralitang Lungsod (KPML) ay taas-kamaong nakikiisa sa pagdiriwang ng International Mother Language Day (Pandaigdigang Araw ng Inang Wika) na idineklara ng United Nations na gunitain tuwing Pebrero 21 ng bawat taon. 

Nakikiisa rin kami sa lahat ng nagproprotesta sa pagtatanggal ng Wikang Filipino sa kolehiyo. Hindi makatarungan na tinanggal ang wikang Filipino habang pinanukalang pag-aralan sa paaralan ang wikang Koreano. Bakit ganito? Dagdag pa, tayo lang yata ang bansang ang lahat ng dokumento at powerpoint presentation ay nakasulat sa wikang Ingles, habang nagsasalita tayo sa sariling wika. Hindi ba’t mas nagkakaunawaan tayo sa ating sariling wika? Bakit ang mga dokumento at presentasyon ay laging nasa wikang dayo? Dahil ba karespe-respeto ang nagsasalita ng wikang Ingles at mababang uri ng tao ang nagsasalita ng wikang Filipino? 

Sa araw na ito, halina’t ipaglaban natin ang ating sariling wika, habang pinapayabong pa natin ang wikang ito sa ating bansa. Mabuhay ang wikang Filipino at lahat ng tagapagtanggol nito!

Pahayag ng KPML hinggil sa mga hinuli't ikinulong na vendors

PAHAYAG NG KPML HINGGIL SA MGA HINULI’T IKINULONG NA VENDORS (ELLIPTICAL 5)

Pebrero 20, 2020

Hindi krimen ang maghanapbuhay!

Palayain ang Elliptical 5, ngayon na!

Kami sa Kongreso ng Pagkakaisa ng Maralitang Lungsod (KPML) ay taas-kamaong nananawagang pa-layain na ang ating mga kapatid na vendor na hinuli ng mga pulis-Quezon City. Ngayong Pebrero 20 ay World Day of Social Justice o Pandaigdigang Araw ng Panlipunang Hustisya.

Hindi makatarungan ang ginawang paghuli sa mga vendor pagkat hindi nila kasalanang maghanapbuhay upang pakainin ang kanilang pamilya. Hindi makataru-ngang dakpin sila dahil hindi krimen ang maghanapbuhay. Bakit itinuring na sagabal sa daan o obstruksyon ang mga vendor? Bakit ba tiningnan sila bilang mga nakahamba-lang sa bangketa? Di na ba makatao ang mga tagapag-patupad ng batas?

Ang mga vendor ay mara- rangal na taong naghaha-napbuhay? Sila’y kapwa tao natin! Di sila mga basura o  dagang basta na lang itaboy! Subalit dahil sa inilabas na memo ng Department of Interior and Local Government (DILG) na ang lahat ng mga obstruksyon sa kalsada ay tanggalin, aba’y pati kapwa tao nila ay sapilitang dinakip dahil sagabal sa kalsada!

Illegal vending ang kaso, krimen na ba ang paghahanapbuhay ng marangal? Krimen na ba ang magtinda upang hindi magutom ang kanilang pamilya?

Ngayong Pebrero 20, na pinagdiriwang ang World Day of Social Justice, hinihiling namin sa kinauukulan, palayain na ang Elliptical 5, ngayon na!

Pahayag ng KPML sa World Day of Social Justice

PAHAYAG NG KPML SA WORLD DAY OF SOCIAL JUSTICE (PANDAIGDIGANG ARAW NG KATARUNGANG PANLIPUNAN)

02.20.2020

SA PANDAIGDIGANG ARAW NG PANLIPUNANG HUSTISYA,

KATARUNGAN SA LAHAT NG BIKTIMA NG PAGSASAMANTALA!

Konsepto para sa uring manggagawa ang panlipunang hustisya. Una, ito'y nakasaad sa dalawang talumpati ni Pangulong Manuel Quezon. Una, sa talumpating may pamagat na Social Justice for the Laborers, Pebrero 17, 1938, at ikalawa, Social Justice, Labor Unions, and Public Works, Hunyo 8, 1938. Dalawang talumpating iniukol sa mga manggagawa. Dalawang talumpating tinalakay kung ano ang panlipunang hustisya. Ikalawa. pinagtibay ng International Labor Organization noong Hunyo 10, 2008 ang ILO Declaration on Social Justice for a Fair Globalization. Ibinatay ito sa Philadelphia Declaration of 1944 hinggil sa layunin ng ILO, at sa Declaration on Fundamental Principles and Rights at Work of 1998. 

Nagkakaisang pinagtibay ng International Labor Organization noong ika-10 ng Hunyo 2008 ang kanilang ILO Declaration on Social Justice for a Fair Globalization (Deklarasyon ng ILO para sa Katarungang Panlipunan para sa isang Makatarungang Globalisasyon. Ito ang pangatlong pangunahing pahayag ng mga prinsipyo't patakarang pinagtibay ng International Labor Conference mula nang pinagtibay Konstitusyon ng ILO noong 1919. Ibinatay din ang nasabing deklarasyon mula sa Philadelphia Declaration of 1944 and the Declaration on Fundamental Principles and Rights at Work of 1998. 

Noon namang ika-26 ng Nobyembre 2007, ipinahayag ng United Nations General Assembly na, simula sa ikaanimnapu't ikatlong sesyon ng General Assembly, ang 20 Pebrero ay ipagdiriwang taun-taon bilang World Day of Social Justice.

Subalit para sa aming mga maralita, mas karapat-dapat ipagdiwang ang araw na ito kung may tunay na katarungang panlipunang nararanasan ang ating mga kapatid na dukha, at hindi basta pinapaslang dahil sa War on the Poor. May katarungang panlipunan kung may pagkain sa hapag-kainan, may trabahong may nakabubuhay na sahod sa pamilya, may maayos at ligtas na pabahay para sa lahat, hindi nagugutom ang pamilya, hindi mahal ang presyo ng pagpapagamot sa ospital, hindi na naninibasib ang salot na kapitalismo sa buhay ng manggagawa’t karaniwang mamamayan. 

Makakamit lang ba ng mga maralita ang katarungang panlipunan kung mapapalitan na ang bulok na sistema? Kailangan pa bang kunin ng maralita ang kapangyarihang pampulitika upang makamit din ang panlipunang hustisya? Kailangan na ba ng maralitang maghimagsik?

Pahayag ng KPML sa Sexual and Reproductive Health Awareness Day

PAHAYAG NG KPML SA SEXUAL AND REPRODUCTIVE HEALTH AWARENESS DAY

Pebrero 12, 2020

KALUSUGAN NG KABABAIHAN, PANGALAGAAN!

Tuwing Pebrero 12 ng bawat taon ay may araw para sa kalusugang sekswal ng mga kababaihan. Ito ang Sexual and Reproductive Health Awareness Day na idineklara naman ng Canadian Federation for Sexual Health.

Dahil dito, kami sa Kongreso ng Pagkakaisa ng Maralitang Lungsod (KPML) ay taos pusong nakikiisa sa lahat ng kabababaihan sa paggunita at pagdiriwang ng  araw ng kalusugan ng kababaihan. Ang Sexual and Reproductive Health Awareness Day (Araw ng Sekswal at Reproduktibong Pangkalusugan) ay inorganisa upang pataasin ang kamalayan ng mamamayan tungkol sa sekswal at reproduktibong kalusugan (SRH). Ang SRH ay sumasaklaw sa pisikal, emosyonal, mental at panlipunang kagalingan na may kaugnayan sa sekswalidad; hindi lamang ito kawalan ng sakit, o pagkamasasakitin (World Health Organization).

Upang mapanatili ang sekswal at reproduktibong kalusugan, kailangan ng mga tao ng tumpak na impormasyon at ang ligtas, epektibo, abot-kayang at katanggap-tanggap na kontraseptibong kanilang napili. Dapat silang bigyang kaalaman at kapangyarihan upang maprotektahan ang kanilang sarili mula sa mga impeksyong dulot ng sexually transmitted infection (STI), HIV / AIDS, di sadyang pagbubuntis at hindi ligtas na pagpapalaglag. At ang mga kababaihan ay dapat magkaroon ng akses sa mga serbisyo kapag nagpasya silang magkaroon ng mga anak at makakatulong sa kanila na magkaroon ng isang malusog na pagbubuntis, ligtas na panganganak at malusog na sanggol.

Pahayag ng KPML hinggil sa ikatlong United Nations Decade for the Eradication of Poverty (2018-2027)

PAHAYAG NG KPML HINGGIL SA IKATLONG U.N. DECADE FOR THE ERADICATION OF POVERTY (2018-2027)

Pebrero 10, 2020

Kami sa Kongreso ng Pagkaka-isa ng Maralitang Lungsod (KPML) ay mahigpit na nakikiisa sa pagdeklara ng United Nations ng Ikatlong Dekada upang Mapawi ang Kahirapan o Third United Nations Decade for the Eradication of Poverty (2018-2027).

Ayon sa kasaysayan, ang Unang Decade for the Eradication of Poverty ay noong 1997-2006, ang Ikalawang Decade for the Eradication of Poverty ay noong 2008-2017), at sa dekadang ito nagaganap ang ikatlo. Nakatatlong deklarasyon na ang United Nations, ibig sabihin ay tatlum-pung taon na silang nananawa-gang dapat mapawi ang kahirapan. Subalit tila pulos deklarasyon lang ito at walang kongkretong aksyon ng pagpawi ng kahirapan.

Ayon sa taya ng UN, upang mapawi ang kahirapan sa taon 2030, na kung pagbabatayan ang ratio ng paglaki ng populasyon, kinakailangan mabawasan ng halos 110 milyon bawat taon ang bilang ng mga taong nabubuhay nang mas mababa sa $190 sa isang araw. May mahalagang papel ang United  Nations upang  matugunan ang pandaigdigang hamong ito. Subalit pagtingin natin sa KPML, hangga't hindi pantay ang hatian ng yaman sa lipunan, hangga't patuloy ang kapitalismo, hangga't isang pribilehiyo ang pribadong pagmamay-ari, hindi mawawakasan ang kahirapan. Dapat nating pagsikapang palitan ang ganitong bulok na sistema ng lipunan kung nais nating mapawi ang kahirapan, at iluklok ang uring manggagawa sa tuktok ng lipunan.

Ngunit hindi ito gusto ng mga kapitalistang bansa, ang tanggalan sila ng pribadong pag-aari upang maging pag-aari ng buong lipunan, nang sa gayon ay wala nang mahirap at mayaman, ay hindi nila magagawang tanggapin. Tanging sa rebolusyon ng mga uring api makakamit ito.

Pahayag ng KPML sa ika-19 anibersaryo ng kamatayan ni Ka Popoy Lagman

PAHAYAG NG KPML SA IKA-19 NA ANIBERSARYO NG KAMATAYAN 

NG BAYANI NG URING MANGGAGAWANG SI KA POPOY LAGMAN

Pebrero 6, 2020

Kami sa Kongreso ng Pagkakaisa ng Maralitang Lungsod (KPML) ay taos kamaong nagpupugay kay Ka Popoy Lagman. Labinsiyam na taon na mula nang siya'y mapaslang at hanggang ngayon ay patuloy ang paghahanap ng katarungan.

Isa si Ka Popoy Lagman sa mga batikang lider na nakibaka upang palayain ang manggagawa't maralita mula sa kuko ng kapitalismo. Siya'y dakilang guro at lider-manggagawang nagpapatuloy ng pakikibaka sa tradisyon ng mga naunang lider-manggagawang namuno sa mga naganap, tulad ng Paris Commune at ng Rebolusyong Oktubre.

Si Ka Popoy ay hinuli at ikinulong ng estado noong Mayo 26, 1994, dalawang araw matapos ang isang rali sa Makati kung saan labingdalawang aktibista ang nahuli. Dinakip din siya sa kasagsagan ng SLAM APEC Conference noong Nobyembre 1996. Siya'y isang masigasig na chairman ng Bukluran ng Manggagawang Pilipino (BMP) mula 1995 hanggang sa siya'y mapaslang noong Pebrero 6, 2001.

Si Ka Popoy ay isang maaasahang giya upang tayo’y hindi makalimot na tanging sa ating sama-samang pagkilos ay makakamit natin ang ninanais nating lipunang malaya, walang pang-aapi at pantay-pantay. Ibinuwis niya ang kanyang buhay para lamang ituro sa atin na sa ating nagkakaisang lakas ay mapagtagumpayan natin ang anumang laban na ating susuungin, upang ipatimo sa ating isipan, na tayo at tayong mga maralita ang siyang may kakayahan at may karapatang ituloy ang ikot ng gulong ng kasaysayan at siyang tanging may kakayahang pamunuan ang susunod na lipunan. Lipunang tayo ang siyang bubuo. Lipunang tayo ang siyang huhugis.

Si Ka Popoy Lagman, na gaya ng sulong naglalagablab, ay nagpaalab sa ating pakikibaka para sa tunay na kalayaan at pagbabago.

Ang KPML bilang kasapi ng BMP, Sanlakas, at pundadores ng Partido Lakas ng Masa (PLM) ay patuloy na nakikibaka upang ang mga pangarap ni Ka Popoy na isang lipunang malaya at walang pagsasamantala, tulad din ng aming pangarap, ay makamit ng uring manggagawa at masa ng sambayanan.

Hustisya para kay Ka Popoy Lagman! Mabuhay ang uring manggagawa! Tuloy ang laban!

Pahayag ng KPML hinggil sa ika-50 anibersaryo ng makasaysayang FQS

PAHAYAG NG KPML HINGGIL SA IKA-50 ANIBERSARYO 

NG MAKASAYSAYANG FIRST QUARTER STORM

Enero 30, 2020

Taas-kamaong nagpupugay ang Kongreso ng Pagkakaisa ng Maralitang Lungsod (KPML) sa mga nakibaka at bahagi ng makasaysayang First Quarter Storm o Sigwa ng Unang Sangkapat. Ang FQS ay naganap noong Enero hanggang Marso 1970, ayon sa kasaysayan. Naganap iyon dahil sa walang humpay na pagkilos at pagdaraos ng malawakang demontrasyon na pinangungunahan aktibistang estudyante. Tinuligsa nila noon ang kutsabahan ng mga politiko dahil sa malapit nang maganap noong Kumbensiyong Konstitusyonal at dahil sa panukalang magbibigay ng karapatan kay dating Pangulong Marcos upang tumakbo sa ikatlong termino.

Ang FQS ang isa sa mga dahilan ng pagdeklara ni Marcos ng martial law noong 1972. Noong Enero 26, 1970, nagrali sa labas ng Malakanyang ang mga estudyante matapos ang talumpati ni Marcos sa Kongreso. Nagsimula umano ang kaguluhan nang papasakay na si Marcos sa kaniyang limosin nang may nagtapon ng isang munting effigi ng buwaya. Hindi naman natamaan si Marcos subalit rumesponde ang mga pulis at pinagpapalo ng batute ang mga aktibista.

Sumunod dito'y naglunsad ng mga kilos-protesta sa iba't ibang paaralan na tumungo sa isang malakawang martsa ng mga estudyante mula Plaza Miranda hanggang Malakanyang. Sinalubong ang mga raliyista ng mga militar at pulis. Nagkaroon ng karahasan, dahil nagpang-abot ang mga pulis at miltar, at ang mga estudyanteng raliyista. Namatay umano ay apat na estudyante at maraming nasugatan.

"Makibaka, Huwag Matakot!" ang kanilang hiyaw, at hanggang ngayon, ito pa rin ang panawagan ng mga maralita. Makibaka, Huwag Matakot! Sulong mga kapatid, ipaglaban at itayo ang isang lipunang walang pagsasamantala ng tao sa tao! Sulong tungong sosyalismo!

Pahayag ng KPML laban sa rebisyon ng mga history books

PAHAYAG NG KPML LABAN SA REBISYON NG MGA HISTORY BOOKS

Enero 29, 2020

HUWAG SALAULAIN ANG KASAYSAYAN!

ILANTAD NATIN AY KATOTOHANAN!

Sa isang balita sa pahayagang Philippine Daily Inquirer, na may petsang Enero 11, 2020 ay mababasa ang balitang ito: "Tañada on Marcos’ bid to revise history books: ‘We must not let the lies prevail’ "

Ayon kay human rights lawyer Erin Tañada, ang panawagan ni dating senador Ferdinand “Bongbong” Marcos Jr. na muling sulatin ang mga teksbuk pangkasaysayan ay isang maliwanag na isang pagtatangka upang rebisahin ang kasaysayan o historical revisionism, katagang pumapatungkol sa pagmamali ng nakasulat na kasaysayan upang pabanguhin ang pangalan ng kanilang angkan. Gayong ang kanyang ama ang dahilan ng malagim na diktadura noon.

“This is a clear move at historical revisionism and another desperate attempt by the Marcoses to erase the memory of the horrors of Martial Law and absolve the sins of their father.”

Kami sa Kongreso ng Pagkakaisa ng Maralitang Lungsod (KPML) ay mahigpit na nakikiisa sa samba-yanang Pilipinong naniniwalang hindi dapat baguhin ang kasaysayan. Nang ilibing si dating Pangulong Marcos sa Libingan ng mga Bayani, isa ang KPML sa agad na nagprotesta dahil hindi naman bayani ang diktador. Patuloy naming haharangin ang anumang pagtatangka ng mga Marcos na baligtarin ang kasaysayan upang bumango ang kanilang pangalang may bahid ng dugo ng mga biktima ng karahasan noong panahon ng batas-militar.  

Hindi kami papayag na baligtarin at babuyin ng mga Marcos ang ating kasaysayan. Patuloy kaming magmamatyag at kung kinakailangan ay agarang kumilos laban sa sinumang sasalaula sa kasaysayan ng ating bayang tinubuan. No to historical revisionism!

Dapat climate resilient ang On-Site, In-City or Near-City Resettlement Bill

DAPAT CLIMATE RESILIENT ANG ON-SITE, IN-CITY OR NEAR-CITY RESETTLEMENT BILL

Munting saliksik ni Greg Bituin Jr.

May mga nakasalang na panukalang batas sa Senado at Kongreso hinggil sa relokasyon ng mga maralita na on-site (ang relokasyon ay sa mismong kinatitirikan ng kanilang tahanan), in-city (ang relokasyon ay sa loob lang ng lungsod kung saan sila naroon) or near-city (sa pook na katabi ng kinapapaloobang lungsod). May Senate Bill si Senadora Grace Poe (SBN 582) at Senadora Risa Hontiveros (SBN 167). 

Mayroong katumbas na panukalang batas sa Kongreso sina Rep. Kiko Benitez (HB00042), Kit Belmonte (HB00156), Alfred Vargas (HB00236), Yul Servo (HB03227), Francis Abaya (HB04245), at Rufus Rodriguez (HB02564).

Sa ating Saligang Batas ay nakasaad sa Seksyon 9 at 10 ng Artikulo XIII ang karapatan sa pabahay. Dahil dito'y naisabatas ang Republic Act 7279 o Urban Development and Housing Act (UDHA). Subalit makalipas ang halos tatlong dekada, hindi pa rin ganap na naisasakatuparan ang disente at abotkayang pabahay sa maralita. Tinatayang nasa 6.8 milyon ang backlog sa housing sa taon 2022.

Dahil dito, nangangailangan pa rin ng pabahay ang maraming maralita. Kaya nagsulputan ang mga planong on-site, in-city at near-city na resettlement o relokasyon ng pabahay. Subalit sa kanilang mga panukala, kailangan itong pag-aralan pang mabuti dahil hindi sapat ang on-site na pabahay kung binabaha ang lugar tulad sa Malabon o Navotas.

Dapat kahit ang mga panukalang batas sa pabahay ay maging climate resilient, batay sa adaptation, na dahil may mga senaryo nang lulubog ang maraming lugar sa taon 2030 pag hindi naagapan ang climate change na nagaganap. Ayon sa mga siyentipiko, dapat na masawata ang lalo pang pag-iinit ng mundo, na huwag itong umabot sa 1.5 degri Centigrade, dahil kung hindi maraming lugar ang lulubo sa tubig. Basahin nyo at pag-aralan ang ulat ng UNFCCC (United Nations Framework Convention on Climate Change), at ng IPCC (Intergovernmental Panel on Climate Change), na noong Oktubre 2018 ay nagsabing may labingdalawang taon na lang tayo upang masawata ang 1.5 degri C. Dahil kung hindi, lulubog ang maraming lugar.

At pag lumubog ang maraming lugar sa tubig, nang halos anim na talampakan dulot ng 1.5 degri C na lalo pang pag-iinit ng mundo, ano pang esensya ng on-site at in-city relocation? Titira ka pa ba sa on-site relocation na ibinigay sa iyo kung alam mo namang lulubog ito.

Ang dapat pag-aralan, pagdebatihan, at isabatas ay ang isang Public Housing Act, kung saan ang pabahay ay hindi pribadong pag-aari kundi babayaran lang ang gamit nito, hindi upa.

Ang mga pag-aaral na ito hinggil sa klima at pabahay ay mula sa pakikipagtalakayan ng Kongreso ng Pagkakaisa ng Maralitang Lungsod (KPML) sa mga grupo tulad ng Philippine Movement for Climate Justice (PMCJ). May mga mapa pang ipinakita kung ano ang mga lugar na lulubog sa ganitong taon pag hindi binago ng mga mayayamang bansa ang kanilang paggamit ng enerhiya. Pag patuloy pa sila sa paggamit ng coal-fired power plants at mga enerhiyang mula sa fossil, lalong mag-iinit ang mundo, at pag lumampas na tayo sa limit na 1.5 degri Centigrade, hindi na tayo makakabalik pa sa panahong mababa sa 1.5.

Kaya dapat maipasok din sa mga panukalang batas sa pabahay na mabago na rin ang ating sistema ng enerhiya, at huwag nang umasa pa sa fossil fuel kundi sa renewable energy.

Kailangang maging aktibo rin tayong maralita sa usapin ng klima, climate change at climate justice, at manawagan tayo sa mga mayayamang bansa na bawasan na ang paggamit ng coal plants at gumamit na tayo ng renewable energy.

Sa madaling salita, dapat nakabatay din sa usaping pangklima ang on-site, in-city, at near-city resettlement bill. Para kung sakaling lumubog na ang mga bahaing lugar, may opsyon ang mga maralita. Hindi na uubra ang on-site relocation sa lulubog na mga lugar. Baka hindi na rin umubra ang in-city at near-city relocation sa kalaunan. Dapat ay climate resilient na batas para sa pabahay ang dapat pagtuunan ng pansin ng mga mambabatas.

* Unang nalathala sa Taliba ng Maralita, ang opisyal na publikasyon ng Kongreso ng Pagkakaisa ng Maralitang Lungsod (KPML), isyu ng Enero 16-31, 2020, pahina 9-9

Pahayag ng KPML sa ika-33 anibersaryo ng Mendiola Massacre

KATARUNGAN SA MGA BIKTIMA NG MENDIOLA MASSACRE

Kami sa Kongreso ng Pagkakaisa ng Maralitang Lungsod (KPML) ay nananawagan ng katarungan para sa lahat ng biktima ng Mendiola massacre noong Enero 22, 1987. Isa ang KPML sa mga grupong nakasaksi sa karumal-dumal na krimeng iyon ng administrasyon ni dating Pangulong Cory Aquino. Labingtatlong magsasaka ang napaulat na namatay sa pagkilos na iyon, dahil pinagbabaril ng mga pulis at military ng administrasyon doon sa makasaysayang tulay ng Mendiola.

Ayon sa ulat, kasama ang ilang mga lider ng KPML sa naganap na pagkilos na nagdulo sa Mendiola massacre. Ayon sa wikipedia: "On January 22, 1987, the farmers decided to march to Malacañang Palace in order to air their demands instead of negotiating with Heherson Alvarez. Marching from the Quezon Memorial Circle, Tadeo's group was joined by members of other militant groups: Kilusang Mayo Uno (May One Movement), Bagong Alyansang Makabayan (New Patriotic Alliance), League of Filipino Students and Kongreso ng Pagkakaisa ng Maralitang Lungsod (Unity Congress of the Urban Poor). At 1:00 in the afternoon, the marchers reached Liwasang Bonifacio and held a brief presentation. At around the same time, anti-riot personnel under the command of Capital Regional Command commander Gen. Ramon Montaño, Task Force Nazareno under the command of Col. Cesar Nazareno and police forces under the command of Western Police District Chief Brig. Gen. Alfredo Lim were deployed around the vicinity of Malacañang."

mula sa https://en.wikipedia.org/wiki/Mendiola_massacre

Muli, bilang pag-alala sa mga biktima ng Mendiola massacre: Katarungan sa lahat ng mga pinaslang sa Mendiola!

Pahayag ng KPML hinggil sa deadline na Pebrero 1, 2020 ng NHA Memo 23

PAHAYAG NG KPML HINGGIL SA DEADLINE NA PEBRERO 1, 2020 NG NHA MEMO 23

Enero 18, 2020

Sa Pebrero 1, 2020 ay tapos na ang labingwalong buwang palugit na ibinigay ng National Housing Authority (NHA) mula Agosto 1, 2018 hanggang Pebrero 1, 2020 hinggil sa mga hindi nakapagbayad ng kanilang pabahay lalo yaong nasa low cost housing, batay sa NHA Memo 23. Ang nasabing memo ay ibinatay sa Republic Act 9507 o Socialized and Low Cost Housing Loan Restructuring and Condonation Act of 2008.

Sa mga hindi nakapagbayad, anong gagawin? Basta na lang ba sila palalayasin? Ipa-padlocked na ba agad ng NHA ang kanilang mga bahay?

Isa ito sa mga dapat pagtuunan ng pansin ng pamahalaan, pagkat marami nang nakakuha ng bahay ang nawalan ng trabaho kaya hindi na makapagpatuloy ng bayad. Marami na ang mawawalan ng bahay, na tiyak na apektado ang kanilang mga anak, at ang buong pamilya. 

Nang magpasa ng NHA Memo 23, hindi ito nabalitaan ng mga maralita, buti’t nasaliksik natin ito. Dapat maghanda ang mga mara-litang tatamaan ng pagtatapos ng nasabing memo sa Pebrero 1, 2020.

 

Pahayag ng KPML sa World Logic Day

PAHAYAG NG KPML SA WORLD LOGIC DAY

Enero 14, 2020

WALANG LOHIKA SA DEMOLISYON AT MATAAS NA BAYARIN!

MGA POLISIYANG PAHIRAP SA MARALITA’Y DAPAT TANGGALIN!

Mahigpit na nakikiisa ang Kongreso ng Pagkakaisa ng Maralitang Lungsod (KPML) sa pagdiriwang o paggunita sa World Logic Day (Pandaigdigang Araw ng Lohika) na idineklara ng United Nations na maganap tuwing ika-14 ng Enero taun-taon mula 2019. Kaya ngayong 2020 ang ikalawang taon ng pagdiriwang nito.

Subalit bilang mga maralita ay maitatanong natin marahil: Nasa lohika ba ng karapatang pantao ang pagdemolis ng mga bahay ng maralita? Nasa lohika ba na basta mo palalayasin ang mga maralita nang hindi muna nasa maayos na kalagayan ang lugar na paglilipatan sa kanila kung mayroon man? Ano nga ba ang esensya ng pagdiriwang ng World Logic Day, at ano ang maitutulong nito sa atin bilang mga maralita?

Sa anumang pakikibaka ng mga maralita, iniisip din natin ang lohika ng ating bawat galaw sapagkat nakasalalay dito ang ating estratehiya’t taktika upang magwagi tayo sa laban, tulad ng demolisyon. Para sa mga kapitalista’t naghaharing uri sa lipunan, lohikal lang sa kanila na itaboy tayo dahil masakit tayo sa kanilang mga mata. Subalit para sa tulad nating dukha, hindi ito lohikal, dahil hindi makatao, at niyuyurakan nito ang ating dignidad bilang tao.

Wasto lang na ipagdiwang ang World Logic Day, upang maunawaan natin kung bakit ganito ang lipunang ating ginagalawan at kinasadlakan.

Pahayag ng KPML hinggil sa bulkang Taal

PAHAYAG NG KPML HINGGIL SA ASHFALL AT ANG BANTANG PAGPUTOK NG BULKANG TAAL SA BATANGAS

Enero 14, 2020

MAGTULUNGAN AT MAGBAYANIHAN

SA GITNA NG NAPIPINTONG KALAMIDAD

Bumuga ng gabok ang bulking Taal, at maraming pamayanan sa gilid ng bulkan ang natabunan ng gabok. Kaya nagbayanihan ang marami nating kababayan upang saklolohan ang mga naapektuhan nito. At dahil sa gabok, marami ang bumili ng pantakip sa ilong, o mga facemask kaya agad nagkaubusan nito sa mga botika. 

Nagpadala ng libreng gulay ang mga taga-Benguet. Nagpadala ng mga kahon-kahong delata, pagkain at mga damit para sa mga nasalanta. Subalit sa kabila ng kalagayang ito, marami ang nagsamantala kaya nagmahal agad ang mga facemask. Ang halagang sampung pisong facemask ay pumalo sa dalawang daang piso. Ganito na ba kaganid ang mga kapitalista sa ating bansa? Dahil nagkakaubusan ay tinaasan nila ng sampung doble ang presyo upang agad silang kumabig ng limpak-limpak na tubo! Mgg ganid na kapitalista!

Ang mga nasalanta ay ating tulungan bilang pagpapahayag ng ating bayanihan at pakikipagkapwa. Kaya kami sa Kongreso ng Pagkakaisa ng Maralitang Lungsod (KPML) ay nagtutulong-tulong upang may maiabot kahit paano sa ating mga kapatid na nasalanta. Tulad ng pagbibigay din nila sa amin ng tulong nang kami naman ang nasalanta ng bagyo tulad ng Ondoy. Halina’t tayo’y tumulong at magtulungan, lalo na’t nagbabanta ang pagsabog ng bulkang Taal.

3 Senate Bills & 9 House Bills on Housing in the 18th Congress

TATLONG SENATE BILL AT SIYAM NA HOUSE BILL HINGGIL SA PABAHAY ANG NAKASALANG NGAYON SA 18TH CONGRESS

Sinaliksik ng KPML Research Team

May tatlong Senate Bill at siyam na House Bill hinggil sa pabahay na dapat aralin din ng maralita. Maglalagay ba tayo ng komite na mag-aaral ng mga panukalang batas na ito? Sino ang ating lobbying officer? Ang mga ito'y matatagpuan sa website ng Senado at Kongreso sa https://www.senate.gov.ph at sahttp://www.congress.gov.ph/legisdocs.

Sa senado, dalawang babae ang may panukala ng On-Site or Near-City Resettlement Act, ang Senate Bill No. 582 ni Senadora Grace Poe at Senate Bill No. 167 ni Senadora Risa Hontiveros. Si Senador Francis Tolentino naman ay may Senate Bill No. 1053, na ang panukala ay Local Human Settlement and Housing Officer Act of 2019.

Sa Kongreso, may siyam na panukala hinggil sa karapatan ng mamamayan sa pabahay. Anim dito ay hinggil sa On-Site or Near-City Strategy for Informal Settlers. Dalawang panukalang batas naman hinggil sa mga naapektuhan ng demolisyon sa mga  mapanganib na lugar o danger areas. At isa naman ang tumutukoy naman sa mga homeless citizens.

Mahahaba ang pamagat ng kanilang mga panukalang batas, kaya hinalaw lang natin sa artikulong ito yaong mga importanteng sinasaad ng kanilang panukalang batas. Halina't tunghayan natin ang mga ito:

Senate Bill No. 582

ON-SITE, IN-CITY OR NEAR-CITY RESETTLEMENT ACT OF 2019

Filed on July 17, 2019 by Poe, Grace

Senate Bill No. 167

ON-SITE, IN-CITY OR NEAR-CITY RESETTLEMENT PROGRAM ACT

Filed on July 2, 2019 by Hontiveros, Risa

Senate Bill No. 1053

LOCAL HUMAN SETTLEMENTS AND HOUSING OFFICER ACT OF 2019

Filed on September 16, 2019 by Tolentino, Francis "Tol" N.

HB00042

AN ACT ESTABLISHING A LOCAL GOVERNMENT RESETTLEMENT PROGRAM THAT IMPLEMENTS AN ON-SITE, IN-CITY OR NEAR-CITY STRATEGY FOR INFORMAL SETTLER FAMILIES

Principal Author/s: BENITEZ, JOSE FRANCISCO "KIKO" B.

HB00156

AN ACT ESTABLISHING A LOCAL GOVERNMENT RESETTLEMENT PROGRAM THAT IMPLEMENTS AN ON-SITE, IN-CITY OR NEAR-CITY STRATEGY FOR INFORMAL SETTLER FAMILIES

Principal Author/s: BELMONTE, JOSE CHRISTOPHER Y.

HB00236

AN ACT ESTABLISHING AN ON-SITE, IN-CITY OR NEAR-CITY RESETTLEMENT PROGRAM FOR INFORMAL SETTLER FAMILIES

Principal Author/s: VARGAS, ALFRED

HB03227

AN ACT ESTABLISHING A LOCAL GOVERNMENT RESETTLEMENT PROGRAM THAT IMPLEMENTS AN ON-SITE, IN-CITY OR NEAR-CITY STRATEGY FOR INFORMAL SETTLER FAMILIES

Principal Author/s: NIETO, JOHN MARVIN "YUL SERVO" C.

HB04245

AN ACT ESTABLISHING AN ON-SITE, IN-CITY OR NEAR-CITY RESETTLEMENT PROGRAM FOR INFORMAL SETTLER FAMILIES

Principal Author/s: ABAYA, FRANCIS GERALD AGUINALDO

HB04869

AN ACT ESTABLISHING A LOCAL GOVERNMENT RESETTLEMENT PROGRAM THAT IMPLEMENTS AN ON-SITE, IN-CITY OR NEAR-CITY STRATEGY FOR INFORMAL SETTLER FAMILIES

Principal Author/s: RODRIGUEZ, RUFUS B.

HB02564

AN ACT PROVIDING FOR THE RESETTLEMENT, AID AND REHABILITATION SERVICES FOR THE UNDERPRIVILEGED AND HOMELESS CITIZENS AFFECTED BY THE DEMOLITION OF HOUSES/DWELLINGS ALONG DANGER AREAS

Principal Author/s: CASTELO, PRECIOUS HIPOLITO

HB04902

AN ACT PROVIDING FOR THE RESETTLEMENT, AID AND REHABILITATION SERVICES FOR THE INFORMAL SETTLERS AFFECTED BY THE DEMOLITION OF HOUSES / DWELLINGS ALONG DANGER AREAS

Principal Author/s: NIETO, JOHN MARVIN "YUL SERVO" C.

HB03041

AN ACT ESTABLISHING A COMPREHENSIVE RESETTLEMENT PROGRAM FOR THE UNDERPRIVILEGED AND HOMELESS CITIZENS

Principal Author/s: AGUINALDO, NAEALLA BAINTO

* Nalathala ang artikulong ito sa publikasyong Taliba ng Maralita, ang opisyal na publikasyon ng Kongreso ng Pagkakaisa ng Maralitang Lungsod (KPML), isyu ng Enero 1-15, 2020, mp. 6-7.

Pahayag ng KPML sa Welga ng Manggagawa ng Cosmic

PAHAYAG NG KPML SA WELGA NG MANGGAGAWA NG COSMIC

Enero 7, 2020

GAWING REGULAR ANG MGA MANGGAGAWA NG COSMIC!

HALINA’T SUPORTAHAN ANG WELGA NG MANGGAGAWA!

Kami sa Kongreso ng Pagkakaisa ng Maralitang Lungsod (KPML) ay mahigpit at taas-kamaong nakikiisa sa pakikipaglaban ng mga nakawelgang manggagawa ng Cosmic sa Lungsod ng Caloocan upang maging regular ang mga manggagawang kontraktwal. Ang unyon ng mga manggagawa ng Cosmic ay pinamumunuan ni Ka Rico Marcellana, na siyang pangulo ng unyon.

Nakawelga ang mga manggagawa ng Cosmic dahil sa unfair labor practice, at tinanggal ang mga opisyales ng unyon dahil isa sa ipinaglaban nila ang pagiging regular ng mga kontraktwal na manggagawa. Sa ngayon, hindi pa rin natitinag ang lakas ng loob nilang ipaglaban ang karapatan nilang mag-unyon at maregular.

Bumisita sa picketline sa 7 Lugmoc st., NY Compound, Bagbaguin, Caloocan. Maaari ring kumontak sa 0995 581 8650 para sa suporta at pagbibigay ng donasyon sa mga nakawelgang manggagawa. Mabuhay ang mga manggagawa ng Cosmic! Mabuhay ang uring manggagawa!

#StopUnionBusting

#ReinstateAndRegularizeAllCosmicWorkers

#WorkersUprising2020

Pahayag ng KPML hinggil sa pag-atake ng U.S. sa Iran

PAHAYAG NG KPML HINGGIL SA PAG-ATAKE NG U.S. SA IRAN

Enero 6, 2020

Kapayapaan at isang lipunang walang pagsasamantala ang pangarap ng Kongreso ng Pagkakaisa ng Maralitang Lungsod (KPML). Subalit ang naganap na pag-atake ng Amerika, sa utos ni Pangulong Donald Trump, na naging sanhi upang mapaslang si Iranian Lieutenant General Qassem Soleimani sa Baghdad ng mga military drone ng Amerika nitong Enero 3, 2020 ay hindi lamang isang akto ng digmaan ng Washington laban sa Tehran. Ang ganitong hakbang ay isang hangal na reaksyon ng Estados Unidos bilang isang imperyalistang bansa laban sa nangungunang heneral at maestrong estratehista ng Iran.

Isang masalimuot na suliranin ito sa Gitnang Silangan, na dapat pagtuunan natin ng pansin, dahil baka idulot nito ay World War III. Dapat itong mapigilan. Subalit ano nga ba ang nais ng Amerika? Ang manatili sa kapangyarihan? Ang manguna pa rin sa larangan ng militar at ekonomya? Isa sa mga pinakahuling pamana ni Gen. Soleimani ay ang pag-aktibo ng Iranian Corridor, na isang estratehikong plano ng depensa na isinasagawa at pinatutupad ang kalibradong opsyon para sa mga layuning kontra-imperyalista ng patakarang panlabas ng Tehran. 

Ngunit muli, marahil ay nais lamang ng White House na isabotahe ang isa pang inisyatibo ng Iran para sa isang potensyal na tagumpay sa diplomasya para sa kapayapaan, at sa ngayon ay kasama ang Riyadh, Saudi Arabia, na matagal nang karibal ng Tehran sa rehiyon. Kung ito ang kaso, inihudyat na ng mga Amerikano na nais lamang nilang mapanatili ang status quo sa rehiyon para sa sariling makitid na kalamangan ng Washington, partikular ang kanilang matatag na pag-akses sa langis, merkado at base militar.