Pahayag ng KPML sa ika-75 anibersaryo ng pagbagsak ng bomba atomika

PAHAYAG NG KPML SA IKA-75 ANIBERSARYO NG PAGBAGSAK NG BOMBA ATOMIKA

Agosto 6, 2020

Kahindik-hindik na kasaysayan nang nakalipas na pitumpu'tlimang taon nang pinabagsak ng Amerika sa bansang Japan, sa Hiroshima noong Agosto 6, 1945, at sa Nagazaki noong Agosto 9, 1945, sa kasagsagan ng Ikalawang Daigdigang Digmaan o World War Two (WWII).

Ang unang bomba atomika, na may pangalang "Little Boy", ay ibinagsak sa Hiroshima, sakay ng eroplanong Enola Gat, na ang mga piloto's sina Colonel Paul Tibbets at Robert A. Lewis. Ang ikalawang bomba naman ay pinangalanang "Fat Man" na bumagsak sa Nagazaki. Ayon sa pananaliksik, nasa 129,000 hanggang 226,000 ang namatay, na mayorya ay mga sibilyan. Dahil dito'y sumuko ang Japan sa Allied Forces, anim na araw matapos magdeklara ng giyera ang Unyong Sobyet at pagbomba sa Nagazaki. Nilagdaan ng Japan ang pagsuko noong Setyembre 2, 1945, na siyang petsang nagtapos ang WWII.

Libu-libo ang namatay, habang libu-libo rin ang parang patay, at itinuring na hibakusha, o yaong naapektuhan ng bomba atomika, subalit nabuhay. Natagpuang humihinga pa, lapnos ang mga katawan, sunog ang mga balat, naapektuhan ang mga baga. Ang mga hibakusha'y nananawahgan ng "nuclear ban trreaty" at "never again" sa mga armas nukleyar. Sila ay mga karaniwang tao, mga sibiliyang nananawagan ng katarungan, at humihibik na sana'y wala nang ganitong mangyari sa kasaysayan. Itigil ang mga armas-nukleyar, magkaroon ng kapayapaan sa daigdigan. Nanawagan pa silang lumagda sa mga petition upang sabihing "never again" sa mga armas nukleyar.

Ayon nga sa kanila, “So that the people of future generations will not have to experience hell on earth, we want to realize a world free of nuclear weapons while we are still alive.” ("Upang ang mga mamamayan nga susunod na salinlahi ay hindi na maranasan ang impiyerno sa daigdig, nais nating mapagtanto ang isang daigdig na walang mga sandatang nukleyar habang nabubuhay pa tayo.")

Sa ngayon, may ilang mga bansang nag-aangkin ng mga armas nukleyar. Nangunguna ang United States of America, sunod ay ang Russia (na dating nasa Unyong Sobyet), ang United Kingdom, France, China, India, Pakistan, North Korea, at Israel.

Bilang maralita, hinahangad nating maitayo ang isang lipunang makatao, isang lipunang walang pagsasamantala ng tao sa tao, kung saan lahat ay nakikinabang sa produkto ng paggawa at ng kalikasan.

Kung masisira ang ating daigdig dahil sa mga armas-nukleyar, baka ito'y katapusan na ng sangkatauhan. Kaya sa paggunita natin sa ikapitumpu't limang anibersaryo ng pagbagsak ng Hiroshima, kami sa Kongreso ng Pagkakaisa ng Maralitang Lungsod (KPML) ay mahigpit na nakikiisa sa mga panawagan ng mga hibakusha na dapat wala nang armas-nukleyar upang hindi na maranasan ng ating mundo ang isang kahindik-hindik na pangyayari tulad ng kanilang naranasan.

Pahayag ng KPML sa muling pagpapatupad ng MECQ

PAHAYAG NG KPML SA MULING PAGPAPATUPAD NG MECQ

Matindi ang kinakaharap ng mga maralita sa muling paghihigpit ngayong idineklara ang buong National Capital Region (NCR) at apat na probinsya (Bulacan, Laguna, Rizal, at Batangas) sa ilalim ng Modified Enhanced Community Quarantine sa loob ng labinglimang araw, na nag-umpisa noong Agosto 4, 2020.

Maraming eryang may kasapian ng KPML ang nakakaranas ng higpit ng MECQ protocol mula sa militar at pulis. Karamihan o mayorya ng mga maralita ay wala pang natatanggap na 2nd trance at tulong mula sa lokal na pamahalaan. 

Partikular sa San Jose del Monte, Bulacan, walang nakatakdang pasilidad para sa mga PUI (patients under investigation) at PUM (persons under monitoring). Nagpatupad doon ng total lockdown, walang quarantine facility, walang maayos na datos dahil ang mga PUI at PUM ay dinadala sa ibang lugar, tulad ng Malolos. Bawal ding bumiyahe ang mga dyip, subalit ang mayor ay may mga yunit ng transportasyon na pinapasada.

sa tingin ng KPML, lalong nagpapahirap sa mamamayan ang MECQ, dahil sa biglang tigil sa trabaho, at yaong may trabahong nasa malayong lugar ay mahaba ang lalakarin upang makarating sa trabaho dahil walang masakyan. Bagamat ang layunin ng MECQ ay hindi magkahawaan ang mga tao, hindi naman nakakatulong sa mga tao ang pinatutupad na MECQ, dahil naman natitigil sila sa trabaho, na nagdudulot ng kawalan ng perang pambili ng pagkain at pagbabayad sa mga maraming bayarin.

Hindi makatao ang ginawang MECQ, pagkat walang plano ang pamahalaan para sa maralitang nagugutom. Walang pagbabago sa kalagayan ng maralita. Sa kabila nito, patuloy na kumikilos ang KPML upang itaguyod ang karapatang pantao at kabuhayan para sa maralita.

* Nalathala sa pahayagang Taliba ng Maralita, ang opisyal na publikasyon ng pambansang organisasyong Kongreso ng Pagkakaisa ng Maralitang Lungsod (KPML), isyu ng Agosto 1-15, 2020, pahina 9.

Pahayag ng Taliba ng Maralita hinggil sa mga medical frontliners

Pahayag ng Taliba ng Maralita hinggil sa mga medical frontliners

Agosto 4, 2020

Nanawagan ng time out ang mga medical practitioners upang mas mapaghandaan pa ang mga plano laban sa COVID-19. Ito'y panawagan mula sa Philippine Medical Association (PMA), na may kasapiang 40 medikal na samahan. Nais nilang manguna ang Department of Health sa paglaban sa pandemya at huwag lang itong iasa sa mga lokal na pamahalaan at sa mga pulis at militar. Mahigit namang 100 grupong medikal ang sumuporta sa petisyon nilang muling ipatupad ang enhanced community quarantine (ECQ) sa Metro Manila.

Subalit sinabi ni Pangulong Duterte na ang mga medical frontliners na ito'y nananawagan ng rebolusyon at destabilisasyon. Anong klaseng pamunuan ito? Humingi lang ng time out ang mga doktor upang balangkasin ng tama ang paglaban sa coronavirus dahil palpak ang rehimeng Duterte, destabilisasyon at rebolusyon agad? Anong utak ang meron sa berdugong rehimeng ito na natatakot sa sarili nitong anino?

Dapat unawain ni Duterte na mahalaga ang panawagan ng mga medical frontliners dahil ang mga doktor ang nasa harapan upang labanan ang coronavirus. Ang problema, solusyong militar at hindi solusyong medikal ang pinaiiral ng rehimeng Duterte. Panahon naman na pakinggan ng pamahalaan ang mga hinaing ng ating medical frontliners. 

#SolusyongMedikalHindiMilitar #CheckUpHindiCheckpoint

* Nalathala sa pahayagang Taliba ng Maralita, ang opisyal na publikasyon ng pambansang organisasyong Kongreso ng Pagkakaisa ng Maralitang Lungsod (KPML), isyu ng Agosto 1-15, 2020, pahina 8.

Pahayag ng Taliba ng Maralita hinggil sa Pinoy Weekly

Pahayag ng Taliba ng Maralita hinggil sa Pinoy Weekly

Agosto 1, 2020

Nitong Hulyo 26, 2020, pinagkukuha ng mga pulis ang maraming kopya ng pahayagang Pinoy Weekly sa opisina ng Kadamay sa Pandi, Bulacan. Ito na marahil ang resulta ng karima-rimarim na Anti-Terror Law, na pati kalayaan sa pamamahayag ay sapilitang niyuyurakan sa ngalan daw ng paglaban sa terorismo. Na sa aming pagtingin ay instrumento ni Duterte laban sa kanyang mga kritiko. Kung ano ang gusto ng hari ay sinusunod ng mga desusi niyang mga alipin.

Marahil, maaari rin itong mangyari sa pahayagang Taliba ng Maralita, ang opisyal na publikasyon ng pambansang samahang Kongreso ng Pagkakaisa ng Maralitang Lungsod (KPML). Subalit dapat maging handa ang patnugutan ng Taliba ng Maralita sakaling mangyari din sa kanila ang nangyari sa Pinoy Weekly. Huwag nating hayaang mayurakan ang ating pahayagang magpahayag.

* Nalathala sa pahayagang Taliba ng Maralita, ang opisyal na publikasyon ng pambansang organisasyong Kongreso ng Pagkakaisa ng Maralitang Lungsod (KPML), isyu ng Agosto 1-15, 2020, pahina 8.

Pahayag ng KPML laban sa Death Penalty

Pahayag ng KPML laban sa Death Penalty

Hulyo 30, 2020

Nahaharap na naman sa panibagong isyu ng karapatang pantao ang sambayanang nakikibaka upang kamtin ang panlipunang hustisya. Nahaharap na naman ang bayan sa panibagong banta. 

Pagkat binanggit ni Pangulong Duterte sa kanyang State of the Nation Address (SONA) na dapat muling isabatas ang death penalty o parusang kamatayan sa pama-magitan ng lethal injection.

Nitong kamakailan lang, ninais ni DU30 na maisabatas agad ang Anti-Terror Bill, at agad-agad ipinasa ito ng Senado at ng Mababang Kapulungan, at nilagdaan agad ni DU30 noong Hulyo 3, 2020. Malamang ay baka ganito rin kabilis maipasa ang nais niyang Death Penalty. Kung anong gusto ng hari ay agad tumatalima ang mga alipin.

Subalit pawang mahihirap lang naman ang tiyak na tatamaan ng death penalty. Parang inilagay lang sa batas ang nakamumuhing tokhang na pumaslang ng libu-libong mahihirap, kabilang ang napabalitang umano'y 122 bata. Hindi na iginalang ang due process of law. Maraming ina ang lumuha at naghihimagsik ang kalooban.

Tulad ng parehong kasong panggagahasa nina Leo Echegaray at dating Congressman Romeo Jalosjos. Nabitay ang mahirap na si Echegaray. Hindi nabitay ang mayamang si Jalosjos, at nang makalaya ay muling naging kongresista. Noong panahon ni dating pangulong GMA nang ibinasura ang death penalty, na isang tagumpay ng taumbayan. Subalit nais ibalik ng pangulong ang nasa utak lagi ay pagpaslang. Imbes na tutukan ang usapin ng pagresolba sa pandemya ay inuna pa ang ganitong balak.

Ang kailangan natin ay katarungang panlipunan, ang magkaroon ng restorative justice, kung saan naniniwala tayong maaari pang magbago at makalaya ng sinumang nagkasala.

Mga maralita, magkaisa laban sa panibagong banta sa buhay at karapatan ng mga mamamayan! Harangin ang anumang balaking ibalik ang parusang kamatayan. Restorative justice dapat, hindi punitive!

#NoToDeathPenalty

* Nalathala sa pahayagang Taliba ng Maralita, ang opisyal na publikasyon ng pambansang organisasyong Kongreso ng Pagkakaisa ng Maralitang Lungsod (KPML), isyu ng Hulyo 16-31, 2020, pahina 7.

Pahayag ng KPML sa SONA 2020

Pahayag ng KPML sa SONA 2020

Hulyo 27, 2020

Kami, sa Kongreso ng Pagkakaisa ng Maralitang Lungsod (KPML), ay taas-kamaong nakikiisa sa lahat ng nakikibaka para sa panlipunang hustisya, karapatang pantao, at isang lipunang malaya mula sa pagsasamantala ng tao sa tao, at kasama sa mga kilos-protesta ngayong araw ng SONA (State of the Nation Address) ng pangulo ng Pilipinas.

Sa kasalukuyan, ang kalagayan ng maralita ay patuloy na kahirapan, at marami ang nabubuhay pa rin sa kalunos-lunos na kalagayan. Mas tumindi pa ito nang manalasa ang coronavirus, kung saan marami ang nawalan ng trabaho, walang kita, walang sahod, gutom ang pamilya, minsanan lang ang ayuda, na kadalasan pa'y wala. Ang mga bayarin ay isa pa sa mga pahirap sa mga manggagawa't maralita. At mas dadami pa ang maghihirap dulot ng patuloy na lockdown at pagkawala ng maraming trabaho.

Gayunman, marapat lang nating batikusin ang kasalukuyang rehimen, lalo na sa mga nagaganap pa ring pagpaslang ng mga pulis, tulad ng extrajudicial killings, ang pagpatay ng mga pulis kina Winston Ragos, sa apat na sundalo sa Sulu, at sa diumano’y ginahasang dalagitang si Fabel Pineda, edad 15, na pinaslang sa Ilocos Sur, ang kulturang tokhang na dahilan ng mga pagpaslang na ito, ang pagsasabatas ng Anti-Terror Law na instrumento ng pamahalaan laban sa kanyang mga kritiko, ang banta sa kalayaang magpahayag, kaytaas na ng mga bayarin sa kuryente’t tubig, kayrami pa ring mga bayarin sa mga relokasyong di abotkaya ng mga maralita, at marami pang ibang isyung dapat tugunan, pangunahin na ang kalusugan ng mamamayan, at ang pagsaliksik sa lunas sa coronavirus.

Subalit inuna pa ng rehimeng ito ang pagsasabatas ng Terror Law, imbes na iprayoridad ang problema laban sa COVID-19. Mas inuna pa ng rehimeng ito ang pagdepensa sa kanyang sarili laban sa kanyang mga kritiko kaya isinabatas ang Terror Law. Hindi lamang ang karapatang magpahayag ang tinitira ng Anti-Terror Law, kundi higit sa lahat ay ang karapatang pantao.

Tingin namin, ang kulturang tokhang, pananakot at karahasan ang pamana ng administrasyong ito sa kasaysayan. Panahon nang i-isolate ang rehimeng ito, lalo na si Pangulong Duterte, upang panagutan niya ang kanyang mga kapalpakan at karahasan ng kanyang administrasyon. Palpak at bigo ang gobyernong Digong na resolbahin ang health crisis at economic crisis dahil sa mga maling patakaran.

Habang patuloy na itinataguyod ng KPML ang isyu at konsepto ng pampublikong pabahay, patuloy na nakikibaka ang KPML para sa hustisyang panlipunan, karapatang pantao, at kagalingan ng sambayanang maralita. Gayundin naman, patuloy na kumikilos ang KPML upang panagutin ang rehimeng ito sa ipinalaganap nitong kuktura ng karahasan, kulturang tokhang, at patuloy na kapalpakan ng rehimeng ito sa pagtataguyod ng kagalingan ng mamamayan. Makibaka! Lumaban! Huwag Matakot! Manindigan!

#TulongHindiKulong! #FreeMassTestingNow! #AntiTerrorLawIbasura!

Pahayag ng KPML hinggil sa International Day in Support for the Victims of Torture

PAHAYAG NG KPML HINGGIL SA INTERNATIONAL DAY IN SUPPORT FOR THE VICTIMS OF TORTURE

Hunyo 26, 2020

Mahigpit na nakikiisa ang Kongreso ng Pagkakaisa ng Maralitang Lungsod (KPML) sa paggunita sa International Day in Support for the Victims of Torture. Bilang pambansang organisasyong kumikilala at ipinaglalaban ang karapatang pantao, ang araw na ito’y dapat gunitain bilang paalala na wala dapat ma-torture dahil sa kanilang pagkakasala, kundi magkaroon ng due process at igalang ang kanilang karapatan.

Mula nang maisabatas ang Anti-Torture Act of 2009 (RA 9745), iisa pa lang ang napaparusahan. Ito’y sa kaso ng pag-torture kay Jerryme C. Corre ng Angeles City mula Enero 10-11, 2012, ng pulis na nakilalang si PO2 Jerick Jimenez. Ang desisyon na isinulat ni Judge Irineo Pineda Pangilinan Jr. ng Municipal Trial Court sa Cities Branch 1 ng Angeles City, Pampanga, dahil sa paglabag sa RA 9745.

Nanganganib na marami pa ang ma-torture sakaling maisabatas ang Anti-Terror Bill. Nawa’y maging makatao ang ating mga kapulisan sa pagtrato sa sinuman, at dahil may Anti-Torture Law na tayo, ay mawala nang tuluyan ang torture bilang dagdag parusa sa sinumang nahuli, nagkasala man o napagkamalan lamang.

Pahayag ng KPML sa pagpanaw ni Kasamang Milo Ferdinez

Pahayag ng KPML sa pagpanaw ni Kasamang Milo Ferdinez

Hulyo 17, 2020

Taas-kamaong pagpupugay ang ipinaaabot ng Kongreso ng Pagkakaisa ng Maralitang Lungsod (KPML) kay Ka Milo "Miles" Ferdinez, dakilang kasama, rebolusyonaryo, at isang huwarang bayani ng uring manggagawa!

Kadalasan namin siyang natatagpuan sa tanggapan ng Bukluran ng Manggagawang Pilipino (BMP) kapag nagpupulong doon ang KPML. Nakakakwentuhan din namin siya. Magaling siyang magsuri at magpayo hinggil sa mga isyung panlipunan. Nakakasama rin namin sa maraming pagkilos sa lansangan.

Ganyan nakilala ng KPML si Ka Miles, na dating sekretaryo heneral ng BMP. Magaling makisama, palangiti, mahinahon.

Ang kanyang pagkamatay ay simbigat ng bundok dahil nagsilbi siya sa bayan at sa uring manggagawa nang walang pag-iimbot at ng buong katapatan. Ang kanyang mga inambag sa pakikibaka ng masang anakpawis ay nakaukit na sa kasaysayan, at nakaukit din sa aming puso't isipan.

Muli, taospuso at taas-kamaong pagpupugay sa iyo, Ka Miles. 

Hindi ka namin malilimutan. Hanggang sa muli.

Pahayag ng KPML sa isyu ng Freedom of Speech and of the Press

PAHAYAG NG KPML SA ISYU NG FREEDOM OF SPEECH AND OF THE PRESS

Hulyo 14, 2020

DALAWANG MOOG SA PAMAMAHAYAG SA BANSA

ISA’Y KINASUHAN NG CYBERLIBEL, ISA’Y SINARANG SADYA

Sa loob ng wala pang isang buwan, dalawang moog sa masmidya ang pumutok sa balita. Ang nagbabalita ang laman ngayon ng balita. Si Maria Ressa, ang Chief Executive Officer ng Rappler, at naging news editor din sa ABS-CBN, ay kinasuhan ng cyberlibel, habang mahigit labing-isang manggagawa ang nawalan ng trabaho nang hindi bigyan ng Kongreso ng panibagong prangkisa ang ABS-CBN.

Dalawang entidad sa masmidya na umano’y kritikal o marahil ay kinaiinisan din ng administrasyong Duterte. Dalawang ginagawa nila ang paglilingkod sa bayan sa ngalan ng tuloy-tuloy na pag-uulat ng mga nagaganap sa ating bansa, sa ngalan ng kalayaan sa pamamahayag, sa islogang In Service of the Filipino.

Noong Hunyo 15, 2020, si Maria Ressa ay kinasuhan ng cyberlibel, at hinatulan siyang guilty ng hukom na si Rainelda Estacio-Montesa ng Manila Regional Trial Court Branch 46 noong Hunyo 15, 2020.

Noong Hulyo 10, 2020, sa botong 70 ng mga kongresista ay hindi na muling binigyan ng prangkisa upang muli nating mapanood ang mga balita’t palabas sa ABS-CBN.

Dalawang kasong pawang banta sa kalayaan sa pamamahayag. Dalawang isyung nakakapanginig ng laman para sa mga nagmamahal sa karapatang pantao, lalo na sa karapatang magpahayag. Sino ang susunod sa pagsasara ng ABS-CBN? Ang Rappler na ba?

May pakialam ba ang maralita sa nangyaring ito sa dalawa? Malaki. Dahil sila ang simbolo sa ngayon ng karapatang magsalita at kalayaang magpahayag. Kung sila ay ginigipit ng administrasyon, paano pa tayong mga maralitang walang boses sa lipunan.

Maaring di talaga sila naglilingkod sa masa kundi sa burgesya, subalit ang nangyari sa kanila’y mistulang kamatayan sa kalayaan sa pamama-hayag at senyales ng mas matitindi pang paglabag sa karapatang pantao

Kaya nga ang pakikibaka para sa bagong prangkisa ng ABS-CBN ay pakikibaka laban sa anumang pagtatangkang patahimikin ang malayang pamamahayag at sakalin ang ating karapatang makabatid ng iba’t ibang nangyayari sa lipunan at sa kasuluk-sulukan man ng bansa. Ito'y isang pakikibaka upang biguin ang anumang atake sa malayang pagsasalita at pamamahayag.  Ito'y pakikibaka laban sa anumang paniniil at pag-abuso sa kapangyarihan. Ito'y pakikibaka upang ipagtanggol at patuloy na makapagtrabaho ang mahigit labing-isang libong manggagawang doon umaasa ng ikabubuhay, at ngayon ay pawang nawalan ng trabaho.

Sana, habang sila’y ipinagtatanggol natin ay ipagtanggol din nila ang mga api’t pinagsasamantalahan sa lipunan, lalo na ang mga kabataan at kababaihan, ang mga katutubo, ang mga magsasaka’t mangingisda, ang mga manggagawa, ang mga maralita, at iba pang walang boses sa lipunan. Kung ang nangyari kay Maria Ressa at sa ABS-CBN ang mga panggigipit na ito, silang mga may pangalan, kinikilala, higante sa kanilang propesyon, at may sinasabi, paano pa kaya ang mga maralita’t simpleng mamamayang walang tinig sa ating bansa?

Pahayag ng KPML laban sa Anti-Terror Law

Pahayag ng KPML laban sa Anti-Terror Law

Kami sa pambansang organisasyon ng Kongreso ng Pagkakaisa ng Maralitang Lungsod (KPML) ay mahigpit na nakikiisa sa lahat ng mamamayang nakikibaka, nagta-tanggol sa karapatang pantao, at lumalaban para sa hustisyang panlipunan. Dahil dito'y matindi naming tinututulan at aming tinutuligsa ang pagsasabatas ng Anti-Terror Law.

Nitong Hulyo 3, 2020 ay nilagdaan na ni Pangulong Dutete ang Batas Republika Blg. 11479 o Anti-Terrorism Act of 2029, na mas kilala ngayon na Anti-Terror Law.

Nakababahala ang ganitong awtoritaryanismong batas, na sa aming pagtingin, ay balak sikilin ang kalayaan sa pamamahayag at karapatang pantao, ituring na terorista ang sinumang nagpapa-hayag ng pagkadismaya sa mga maling polisiya ng pamahalaan, tulad ng tokhang na nagdulot ng pagpaslang ng walang due process sa libu-libo nating mamamayan, kasama na ang naiulat kamakailan na 122 kabataan, kabilang na sina Danica Mae Garcia, limang taong gulang, at Althea Berbon, apatna taong gulang.

Nang magsimula ang adminis-trasyong Digong, nalikha at luma-ganap na ang kultura ng poot at karahasan. Batay na rin ito sa ulat ng UN Office of the High Commissioner for Human Rights. Saksi rin tayo sa sunud-sunod na balita ng salvaging o pagpaslang, na pawang di na iginalang ang due process of law. Ang pananakop ng bansang Tsina sa mga teritoryo ng Pilipinas ay binabalewala lang ng rehimeng ito, at nais pa ni Pangulong Duterte, pabiro man niyang sinabi o hindi, na maging probinsya lang ng Tsina ang Pilipinas.

Makibaka! Makiisa! Huwag Matakot! Manindigan!

Ligtas daw sa pang-aabuso ang Anti-Terror Act (ATA), subalit ano ang ating garantiya? Ang mga karanasan at karahasan noong martial law, at mga karanasan at karahasan sa panahon ng tokhang hanggang ngayon ay patunay na di hindi tayo dapat manahimik. 

Ang nakaraang apat na taon ng administrasyong Digong ay naglalarawan ang kawalan ng paggalang sa due process of law, pagyurak sa karapatang pantao, at panahon din ng libu-libong pagpaslang.

Ang ATA ay instrumento ng rehimeng Digong upang idepensa ang kanyang sarili laban sa mamamayan, dahil sa kanyang karahasan at kapalpakan sa panahon ng pananalasa ng COVID-19, na imbes unahin ang problema sa coronavirus ay isiningit at isinabatas ang kinamumuhiang Anti-Terror Law.

Ang ATA ay isang desperadong pagtatangka ng rehimeng ito upang isalba ang sarili sakali mang magbunsod ng ala-Edsang pag-aalsa ang sambayanan.

#JunkTerrorLaw

#FightForHumanRightsAndDignity

#DefendDissent

Pahayag ng KPML hinggil sa International Day in support for the victims of torture

PAHAYAG NG KPML HINGGIL SA INTERNATIONAL DAY

IN SUPPORT FOR THE VICTIMS OF TORTURE

Hunyo 26, 2020

Mahigpit na nakikiisa ang Kongreso ng Pagkakaisa ng Maralitang Lungsod (KPML) sa paggunita sa International Day in Support for the Victims of Torture. Bilang pambansang organisasyong kumikilala at ipinaglalaban ang karapatang pantao, ang araw na ito’y dapat gunitain bilang paalala na wala dapat ma-torture dahil sa kanilang pagkakasala, kundi magkaroon ng due process at igalang ang kanilang karapatan.

Mula nang maisabatas ang Anti-Torture Act of 2009 (RA 9745), iisa pa lang ang napaparusahan. Ito’y sa kaso ng pag-torture kay Jerryme C. Corre ng Angeles City mula Enero 10-11, 2012, ng pulis na nakilalang si PO2 Jerick Jimenez. Ang desisyon na isinulat ni Judge Irineo Pineda Pangilinan Jr. ng Municipal Trial Court sa Cities Branch 1 ng Angeles City, Pampanga, dahil sa paglabag sa RA 9745.

Nanganganib na marami pa ang ma-torture sakaling maisabatas ang Anti-Terror Bill. Nawa’y maging makatao ang ating mga kapulisan sa pagtrato sa sinuman, at dahil may Anti-Torture Law na tayo, ay mawala nang tuluyan ang torture bilang dagdag parusa sa sinumang nahuli, nagkasala man o napagkamalan lamang.

Pahayag ng KPML laban sa Waste-to-Energy

Pahayag ng KPML laban sa Waste-to-Energy

Hunyo 22, 2020

AYAW NAMIN SA MALING SOLUSYON!

HUWAG PAYAGAN ANG WASTE-TO-ENERGY O INCINERATION!

Mahigpit na nakikiisa ang Kongreso ng Pagkakaisa ng Maralitang Lungsod (KPML) sa iba't ibang organisasyon, sa pangunguna ng grupong No Burn Pilipinas, sa pagtutol sa balak na pagtatayo ng mga waste incinerator sa bansa. Nakikiisa ang KPML sa panawagang itigil ang planong pagtatayo ng mga waste incinerator at panindigan ang pagbabawal sa mga ito na nakasaad sa RA 8749 (Philippine Clean Air Act of 1999) at RA 9003 (Ecological Solid Waste Management Act of 2000). Alam naming malaki ang epekto ng waste incineration sa kalusugan ng tao, lalo na sa inilalabas nitong nakalalasong dioxin at furan na nagdudulot ng kanser at iba pang sakit. Kaya hindi wastong solusyon ang waste-to-energy sa basura.

Kundi ang tamang paraan pa rin sa paglutas sa problema sa basura ay ang Zero Waste Management. Mas pinagtutuunan nito ang pag-iwas ng paglikha ng basura, pinoprotektahan ang kalusugan at kabuhayan ng mamamayan sa pamamagitan ng paglikha ng mga trabaho at pagpigil sa polusyon. Napakaraming bayan na sa iba't ibang parte ng mundo ang nagsagawa at nagpatunay ng tamang solusyonng zero Waste. Ito ang dapat suportahan, paunlarin at itaguyod upang mapabilis at maging matagumpay ang paglaganap nito sa ating bansa.

Dagdag pa rito, pararamihin lang ng waste incineration ang basura dahil kinakailangan nito ng basura. Araw-gabinitong kailangan ng daan-daang tonelada ng basura upang umayos ang takbo ng mga plantang ito. Bagamat tone-tonelada rin ang mga nalilikhang basura sa mga lungsod at bayan, di naman lahat ng uri ng basura ay dapat sunugin ng incinerator. Huwag din nating payagan ang mga mambabatas na mag-amyenda at tanggalin ang mga pagbabawal ng pagsusunog ng basura na nakasaad sa Philippine Clean Air Act of 1999, at sa Ecological Solid Waste Management Act of 2000. Ayon pa sa ilang ulat, may mga panukalang Waste-to-Energy incinerator sa Quezon City, Davao, Cebu, Pampanga, at iba pang mga probinsya sa bansa. 

Ayon sa grupong No Burn Pilipinas, "Napakabigat ng mga pinansiyal na pangangailangan ng mga incinerators at sa mahabang panahon, maaari ring malugi ang gobyerno sa mga proyektong ito. Daang milyon o ilang bilyon ang gastos para sa pagtatayo, pagpapatakbo at pagpapanatili ng mga planta? Dagdag sa gastusin ang mga mahigpit na patakaran at pananagutang kasama sa mga plano para sa waste-to-energy. Halimbawa na rito ang lock-up period sa mga kontrata, kung saan binibigyan ng garantiya sa kita ang mga investors at technology providers sa takdang panahon sa halip na protektahan ang pinansyal na kakayahan at integridad ng mga lokal na pamahalaan."

Bilang mga maralita, ayaw na namin sa mga dagdag-pasanin pa, at dagdag-buwis, sa mga bagay na makakasira na sa ating kalusugan, at makakasira pa sa ating kapaligiran. 

Sobra na! Tama na ang dagdag pahirap sa masa!

Ayaw namin sa maling solusyon! Tutulan ang waste-to-energy o incineration!

Pahayag ng KPML hinggil sa buwan ng Hunyo bilang National Safety Month

PAHAYAG NG KPML HINGGIL SA BUWAN NG HUNYO BILANG NATIONAL SAFETY MONTH

Hunyo 20, 2020

Kinikilala sa maraming bansa ang buwan ng Hunyo bilang National Safety Month (Pambansang Buwan ng Kaligtasan). Bagamat di pa ito opisyal na kinikilala sa ating bansa, kami sa Kongreso ng Pagkakaisa ng Maralitang Lungsod (KPML) ay taas-kamaong nakikiisa sa pagdiriwang nito, lalo na ngayong panahon ng matinding pandemya.

Nawa’y patuloy tayong magsuot ng facemask, mag-social distancing, palaging mag-alkohol, maghinaw lagi ng kamay, dahil sa panahon ngayong dapat panatilihin nating ligtas ang ating pamilya at sarili laban sa pananalasa ng COVID-19. Nawa’y mag-ingat lagi tayo at hindi magkasakit ang sinuman sa ating pamilya. Palagi nating tingnan ang kalusugan ng ating pamilya, kumain ng masustansya, at wala sanang mahawa ng anumang sakit. Magpalakas lagi tayo ng katawan. Ingat!

Pahayag ng KPML ukol sa taon 2020 bilang International Year of Nurse and Midwife

PAHAYAG NG KPML UKOL SA TAON 2020 BILANG INTERNATIONAL YEAR OF NURSE AND MIDWIFE

Hunyo 16, 2020

Taos-pusong nagpupugay at nakikiisa ang Kongreso ng Pagkakaisa ng Maralitang Lungsod (KPML) sa pagdiriwang ng Taon 2020 bilang Inter-national Year of the Nurse and Midwife. Itinalaga ng World Health Organization (WHO) ang Taon 2020 bilang "International Year of the Nurse and Midwife," bilang pagpupugay sa ika-200 kaarawan ng kilalang nars na si Florence Nightingale (Mayo 12, 1820 – Agosto 13, 1910). 

Mahalaga ang papel na ginagampanan ng mga nars at komadrona sa pagbibigay ng mga serbisyong pangkalusugan. Inaalay nila ang kanilang buhay sa pag-aalaga sa mga nanay at mga anak; pagbibigay ng ligtas na bakuna at payo sa kalusugan; pag-aalaga sa mga matatanda at sa pangkalahatan ay nakaka-tugon sa pang-araw-araw na mahahalagang pangangailangan sa kalusugan, lalo na sa panahon ngayon ng pananalasa nitong pandemyang COVID-19.

Maraming salamat sa ating mga nars at komadrona, na pawang mga frontliners sa iba’t ibang bansa sa kanilang mga tulong. Sila’y mga tunay na bayaning dapat nating kilalanin, hindi lang sa pama-magitan ng mga gantimpala at anumang pagkilala, kundi ito’y sa pamamagitan ng pagbibigay sa kanila ng mga kagamitan at aparato para maging kumpleto ang kanilang gagamitin sa paggampan sa kanilang mga tungkulin, at tiyakin ang mas makatarungang pasahod para sa kanila. 

Mabuhay ang lahat ng mga nars at komadrona sa ating bansa!

Pahayag ng KPML sa World Day Against Child Labor

PAHAYAG NG KPML SA WORLD DAY AGAINST CHILD LABOR

Hunyo 12, 2020

Imbes na ipagdiwang ng Kongreso ng Pagkakaisa ng Maralitang Lungsod (KPML) ang sinasabing Araw daw ng Kalayaan, na sa esensya’y paglaya mula sa Kastila upang magpailalim naman sa mga mananakop na Amerikano, mas nais gunitain ng KPML ang pakikibaka laban sa paggamit ng bata sa mabibigat na trabaho, ngayong Hunyo 12, World Day Against Child Labor.

Marami nang bata ang dapat ay nag-aaral sa kanilang murang edad subalit napipilitang tumulong sa kanilang magulang upang sila’y makakain dahil sa hirap ng buhay. Dapat ang bata ay nasa paaralan at hindi nasa basurahan, o yaong mga namumulot ng basura upang ibenta at may maipambili ng makakain ng pamilya.

Lalo sa panahon ngayon ng COVID-19, na nawalan ng trabaho ang ama, at kailangan ng pambili ng laptop o selpon para sa anak na mag-aaral, baka mas tumindi pa ang child labor. Baka mas dumami ang batang maging biktima nito. Ayon sa International Labor Organization (ILO) Convention No. 82, o Convention concerning the Prohibition and Immediate Action for the Elimination of the Worst Forms of Child Labour, o kilala ring Worst Forms of Child Labour Convention, na pinagtibay noong 1999, na dapat pagtuunan ng maagap na pagkilos ang pangmatagalang layunin ng epektibong pag-aalis ng lahat ng uri ng Child Labor.

Ang child labor ay paglabag sa batayang karapatang pantao at hinahadlangan ang pag-unlad ng mga bata na maaaring  humantong sa panghabambuhay na pisikal o sikolohikal na pinsala. Kaya kami sa KPML, ang aming panawagan ay: STOP CHILD LABOR NOW!

* Unang nalathala sa pahayagang Taliba ng Maralita, ang opisyal na publikasyon ng Kongreso ng Pagkakaisa ng Maralitang Lungsod (KPML), isyu ng Hunyo 1-15, 2020, pahina 9.

Pahayag ng KPML sa World Oceans' Day

PAHAYAG NG KPML SA WORLD OCEANS' DAY

06.08.2020

Dahil sa COVID-19, marami na tayong nababalitang mas lumala pa ang kalagayan ng ating mga karagatan bunsod ng pagtatapon ng mga basura, particular na ang plastik, at nadagdag pa ang mga facemask.

Nabubulunan na ang dagat sa naglipanang basurang likha ng tao, at nangangamatay ang mga isdang kumakain ng plastik. Kaya ngayong World Oceans Day (Pandaigdigang Araw ng mga Karagatan), kami sa Kongreso ng Pagkakaisa ng Maralitang Lungsod (KPML) ay mahigpit na nananawagan sa mga pamahalaan sa mahipit na patakaran laban sa pagtatapon ng basura sa dagat, at sa mamamayan na ayusin ang pagtatapon ng kanilang mga basura upang di ito mapunta sa karagatan.

* Unang nalathala sa pahayagang Taliba ng Maralita, ang opisyal na publikasyon ng Kongreso ng Pagkakaisa ng Maralitang Lungsod (KPML), isyu ng Hunyo 1-15, 2020, pahina 8.

Pahayag ng KPML sa World Food Safety Day

PAHAYAG NG KPML SA WORLD FOOD SAFETY DAY

06.07.2020

Sa panahon ng COVID-19, namigay ng ayuda ang pamahalaan, sa pamamagitan ng barangay, mayor, vice mayor, DSWD, DOLE, at iba pa, sa mga tinamaan ng community quarantine. Sa kadahilanang walang trabaho ang mga manggagawa, at panawagang Stay at Home, nagbigay sila ng ayudang pagkain sa mga mahihirap, tulad ng ilang kilong bigas, noodles at sardinas. Subalit nakapagpapalakas ba ng katawan ang mga iyon, tulad ng noodles? O may epekto ito sa ating katawan dahil sa sangkaterbang betsin sa noodles na may epekto sa ating mga buto?

Sa ikalawang taon ng pagdiriwang ng World Food Safety Day, kami sa Kongreso ng Pagkakaisa ng Maralitang Lungsod (KPML) ay nananawagan sa pamahalaan, na dapat magbigay sila ng ayudang makapagpapalakas pa sa ating mamamayan, hindi ang mga pagkaing pantawid-gutom lang, kundi magbigay sila ng ayudang gulay at bitamina. At hikayatin an gating mamamayan na magtanim ng gulayin, o mag-urban gardening, upang kahit paano’y makatulong upang makaraos sa mga hinaharap.

* Unang nalathala sa pahayagang Taliba ng Maralita, ang opisyal na publikasyon ng Kongreso ng Pagkakaisa ng Maralitang Lungsod (KPML), isyu ng Hunyo 1-15, 2020, pahina 8.

Pahayag ng KPML sa World Environment Day

PAHAYAG NG KPML SA WORLD ENVIRONMENT DAY

06.05.2020

Mahigpit na nakikiisa ang Kongreso ng Pagkakaisa ng Maralitang Lungsod (KPML) sa pagdiriwang at paggunita ng mamamayan ng buong daigdig sa ikalimampung anibersaryo ng Pandaigdigang Araw ng Kapaligiran o World Environment Day. 

Sa kabila ng pananalasa ng COVID-19, marami tayong nakitang dapat baguhin, lalo na't nakita natin ang kahalagahan ng kabukiran kaysa mga mall. Dahil sa bukid nanggagaling ang ating mga pagkain; dahil sa lockdown, sarado ang mga mall; dahil sa kabila ng lockdown, mas nakita natin ang kalahalagan ng ating magsasakang pinagmumulan ng ating mga pagkain, at mga mangingisdang naghirap upang madala sa pamilihan ang mga huli nilang isda.

Sa anibersaryo ng World Environment Day o Pandaigdigang Araw ng Kapaligiran, halina't magsimula tayong magtanim-tanim, kahit nasa kalunsuran, sa pamamagitan ng urban gardening. Upang sa panahong tulad ng nararanasan natin ngayon, may mapipitas tayong mga gulayin, tulad ng alugbati, kangkong, kamatis, petsay, malunggay, at iba pa. Alamin natin ang mga gulay na ilang araw o linggo lang ay  malago na at maaari nang kainin. Mahirap kasing umasa lang sa bigay na sardinas at noodles, kundi tulungan din natin ang ating mga sarili. Magtanim tayo.

Hinggil sa iba pang isyung pangkalikasan at pangkapaligiran, tutulan natin ang pagmiminang nakakasira ng kabuhayan ng ating mga katutubo, at nakawawasak ng kapaligiran. Tutulan natin ang pagtatayo ng mga panibagong coal plants. Alamin natin kung bakit nananawagan tayo ng Climate Justice, at bakit dapat huwag nang lumampas pa ng 1.5 degree ang pag-iinit ng ating mundo. Bakit ba may nagsasagawa ng ekobrik? Bakit naging basurahan na ang ating mga karagatan, kung saan namamatay ang mga isdang nakakain ng mga upos ng sigarilyo, at mga plastik. Bakit hindi tayo dapat magsunog ng basura?

* Unang nalathala sa pahayagang Taliba ng Maralita, ang opisyal na publikasyon ng Kongreso ng Pagkakaisa ng Maralitang Lungsod (KPML), isyu ng Hunyo 1-15, 2020, pahina 7.

Pahayag ng KPML laban sa panukalang Anti-Terror Bill

KAMI AY MAHIGPIT na TUMUTUTOL SA NIRATSADANG PANUKALANG BATAS NA TERROR BILL. #Terrorbillibasura!

Bakit may ganitong panlalansi sa gitna ng may pandemya, kahit anung paliwanag ng spoke person ng Malakanyang na si Harry Roque, kahit anung pang aamo ng Senate President na si Tito Sotto iisa lang ang kanilang mga lengguuwahe na huwag daw tayo mangamba o mabahala kasi hindi naman daw ito maka epekto sa ating mga karapatan na magpahayag ng ating mga saluubin. kailangan lang daw ito dahil matagal na raw itong panukala. pero ano ba ang lohika at intensyon nito bakit ngayon lang nila ito pilit na inilulusot, dahil ba sa umiiral ngayon na bayanihan act, dahil ba sa naka-house arrest ang mga tao na o naka-lockdown na ala martial law. 

Kasi pilay ang mga human right defenders, dahil ba ang masang anak Pawis ay gutom na pinawi sa ibinigay na ayudang 8k-5k na galing sa buwis ng taong bayan, na hanggang sa ngayon ang iba ay unaasa pa namaabutan ng tulong o dahil ayaw nilang masayang ang ganiting pagkkataon lalo ng kanyang mga promotor nito na alam nila na sila ang makikinabang, pero ano ang nasa likod nito? Ito ay paninikil, preparation sa nalalapit na election sa taong 2022, panunupil sa mga oposisyon at sa mga kritiko. 

Sa panahon ngayon ay inaasahan ng mga maralita o ng uring masang anakpawis na matugunan ang suliraning pangkalusugan, matugunan ang kagutuman, masolusyunan ang libu-libo, kundi man milyun-milyong nawalan ng trabaho. Huwag kaming lansihin at ipilit ang kanilang maitim na balak. Junk Terror bill now na! 

* Unang nalathala sa pahayagang Taliba ng Maralita, ang opisyal na publikasyon ng Kongreso ng Pagkakaisa ng Maralitang Lungsod (KPML), isyu ng Hunyo 1-15, 2020, pahina 6

Pahayag ng KPML sa World Bicycle Day sa panahon ng COVID-19

PAHAYAG NG KPML SA WORLD BICYCLE DAY SA PANAHON NG COVID-19

Hunyo 3, 2020

Malaking problema ng manggagawa ang transportasyon ngayong unti-unting tanggalin ang community quarantine. Subalit nang payagan nang makapagtrabaho ang mga manggagawa, dagdag-problema naman nila ang kawalan ng transportasyon patungo sa trabaho, at yaong may motorsiklo’y bawal naman ang angkas. Kaya ang iba’y natuto nang magbisikleta.  Tulad din sa ibang bansa na bisikleta ang sasakyan papunta sa trabaho, dapat maglaan ng kaukulang pondo ang pamahalaan at mga kumpanya, na magbigay ng libreng bisikleta sa ating manggagawa. Gayunpaman, dapat isaalang-alang din ang layo ng panggagalingan dahil nakakapagod din sa manggagawa ang magbisikleta papuntang trabaho, lalo’t pisikal din ang kanyang ginagawa sa pabrika.

Kaya ngayong World Bicycle Day (na batay sa UN General Assembly Resolution (A/RES/72/272), nananawagan ang Kongreso ng Pagkakaisa ng Maralitang Lungsod (KPML) sa pamahalaan at mga pinagtatra-bahuhan ng mga manggagawa na maglaan ng pondo para sa bisikleta bilang batayang sasakyan ng kanilang manggagawa patungong trabaho. 

* Unang nalathala sa pahayagang Taliba ng Maralita, ang opisyal na publikasyon ng Kongreso ng Pagkakaisa ng Maralitang Lungsod (KPML), isyu ng Hunyo 1-15, 2020, pahina 5