Martes, Oktubre 4, 2022

Pahayag ng KPML sa World Animal Day

PAHAYAG NG KPML SA WORLD ANIMAL DAY
Oktubre 4, 2022

KUNG PINANGANGALAGAAN NATIN ANG KALIKASAN
AT PANINIRAHAN NG MGA TAO, HAYOP, IBON, AT ISDA,
PROTEKTAHAN DIN NATIN ANG MGA HAYOP, 
LALO ANG NASA KATEGORYANG ENDANGERED SPECIES!

Mahigpit na nakikiisa ang Kongreso ng Pagkakaisa ng Maralitang Lungsod (KPML) sa paggunita sa World Animal Day o Pandaigdigang Araw ng mga Hayop. Isang araw bago ang World Animal Day ay inalala natin ang World Habitat Day, at binigyang diin na pangalagaan ang paninirahan ng mga hayop. Kung ang ating kalikasan ay ating dapat protektahan, dapat din nating protektahan ang mga hayop, lalo na ang mga nasa kategorya ng endangered species, tulad ng tamaraw sa Mindoro.

Ang World Animal Day, ay pinangunahan ng cynologist na si Heinrich Zimmermann. Inorganisa niya ang unang World Animal Day noong Marso 24, 1925, sa Sport Palace sa Berlin, Germany. Mahigit 5,000 katao ang dumalo sa unang kaganapang ito. Ang aktibidad ay orihinal na naka-iskedyul ng Oktubre 4, upang iayon sa araw ng kapistahan ni San Francisco ng Assisi, ang patron ng ekolohiya. Gayunpaman, hindi available ang venue sa araw na iyon. Ang kaganapan ay inilipat sa Oktubre 4 sa unang pagkakataon noong 1929. Bawat taon, si Zimmermann ay walang pagod na nagtrabaho sa pagsulong ng World Animal Day. Sa wakas, noong Mayo 1931 sa isang kongreso ng International Animal Protection Congress sa Florence Italy, ang kanyang panukala na gawing unibersal ang World Animal Day noong Oktubre 4 ay nagkakaisang tinanggap at pinagtibay bilang resolusyon.

Sa ating bansa ay kinikilala rin ang Oktubre 4 bilang Kindness to Animals Day sa pamamagitan ng Proklamasyon Blg. 537 na nilagdaan ni dating Pangulong Carlod P. Garcia noong 1958. Ayon sa nasabing batas, "SAPAGKAT, ito ay para sa kabutihan ng bansa na paunlarin sa puso ng mga tao ang  pakiramdam ng pananagitan sa mga di nagsasalitang hayop na tumutulong at naglilingkod sa sangkatauhan; SAPAGKAT, kinakailangang itanim sa isipan at puso ng ating mga kabataan ang mga kabutihan ng kabaitan, katarungan, at awa sa lahat ng buhay na nilalang upang kamumuhian nila ang lahat ng uri ng kalupitan sa kapwa tao at sa hayop." (salin mula sa Ingles ng KPML)

Ayon nga sa isang kasabihan, "Be kind to animals." Kaya ang mga kalabaw ng mga magsasaka ay dapat pangalagaan, ang ating Philippine eagle at iba pang hayop na nasa kategorya ng endangered species, ay tiyakin nating napoprotektahan. Huwag din nating sipa-sipain ang mga pusa o aso, kundi gawan ng paraan ang mga asong pag-aari na maturukan ng anti-rabis, at itali kung kinakailangan.

Mga pinaghalawan:
https://www.worldanimalprotection.org/world-animal-day
https://en.wikipedia.org/wiki/World_Animal_Day
https://www.officialgazette.gov.ph/1958/09/30/proclamation-no-537-s-1958/

Lunes, Oktubre 3, 2022

Pahayag ng KPML sa World Habitat Day


PAHAYAG NG KPML SA WORLD HABITAT DAY
Oktubre 3, 2022

PANGALAGAAN ANG MGA BUNDOK, GUBAT, DAGAT,
AT TAHANAN NG MGA HAYOP, IBON, ISDA, MGA
ENDANGERED SPECIES, AT IBA PANG ORGANISMO!
PROTEKTAHAN ANG MGA LUPAING NINUNO 
AT TAHANAN NG MGA KATUTUBO!
PUBLIC HOUSING PARA SA MANGGAGAWA'T MARALITA!

Mahigpit na nakikiisa ang Kongreso ng Pagkakaisa ng Maralitang Lungsod (KPML) sa pagkilala at pag-alala sa World Habitat Day o Pandaigdigang Araw ng Paninirahan. 

Ayon sa UP Diksyonaryong Filipino, pahina 420, ang habitat ay "katutubong tahanan ng isang organismo o hayop." Ayon naman sa Webster's Dictionary, ang habitat ay "a. the place or environment where a plant or animal naturally or normally lives and grows; b: the typical place of residence of a person or a group; c: a housing for a controlled physical environment in which people can live under surrounding inhospitable conditions (as under the sea).

Kaya ang habitat ay hindi lamang tumutukoy sa katutubong tahanan ng isang organismo o hayop, kundi sa mga tao rin, lalo na yaong mga dukhang walang tahanan. May nabuo ngang grupong Habitat for Humanity, na ang layunin ay pagtatayo ng mga pabahay para sa mga walang tahanan. Ayon sa Habitat for Humanity Philippines, layunin nilang alisin ang mga pamilyang Pilipino na may mababang kita mula sa masikip, hindi malusog na kondisyon ng pamumuhay o displacement sa mga kalunsuran sa pamamagitan ng pagbibigay sa kanila ng disenteng tirahan sa malusog na komunidad.

Noong 1985, itinalaga ng United Nations ang unang Lunes ng Oktubre bawat taon bilang World Habitat Day. Ang ideya ay pagnilayan ang kalagayan ng ating mga bayan at lungsod at ang pangunahing karapatan ng lahat sa sapat na tirahan. Nilalayon din nitong ipaalala sa mundo ang kolektibong responsibilidad nito para sa kinabukasan ng tirahan ng tao.

Unang ipinagdiwang ang World Habitat Day noong 1986 na may temang "Shelter is My Right". Ang Nairobi ang host city para sa pagdiriwang noong taong iyon. Kasama sa iba pang mga nakaraang tema ang: "Shelter for the Homeless" (1987, New York); "Shelter and Urbanization" (1990, London); "Mga Lungsod sa Hinaharap" (1997, Bonn); "Safer Cities" (1998, Dubai); "Mga Babae sa Pamamahala sa Lungsod" (2000, Jamaica); “Cities without Slums” (2001, Fukuoka), “Water and Sanitation for Cities” (2003, Rio de Janeiro), “Planning our Urban Future” (2009, Washington, D.C.), “Better City, Better Life” (2010, Shanghai, China) at Cities and Climate Change (2011, Aguascalientes, Mexico).

Ayon naman kay Ka Kokoy Gan, pambansang pangulo ng KPML, nais ng KPML na maipatupad ang isang konsepto ng Public Housing o pampublikong pabahay sa ating bansa, sa konsepto ng pagkilala sa karapatan sa pabahay ng lahat, kung saan maglalaan ang pamahalaan ng mga disente at sapat na pabahay sa mga walang tahanan, nang may kumpletong serbisyong panlipunan. Ang pampublikong pabahay, na tinutustusan ng pamahalaan, ay magbibigay ng mga tahanan sa mga taong kumikita nang kaunti kaysa sa karaniwang pambansang kita, at sa mga maralitang nabubuhay lang sa kakarampot na kita dahil sa diskarte, tulad ng paglalako ng mga paninda.

Dagdag pa, ang mga bahay ng mga katutubo ay hindi dapat wasakin sa ngalan daw ng kaunlaran, tulad ng mapaminsalang pagbuldoser ng mga bundok at pagmimina, na winawasak din ang tahanan ng mga hayop at iba pang endangered species. Kaya ang pangangalaga sa kalikasan ay kaakibat din ng World Species Day.

Mga Pinaghalawan:
UP Diksiyonaryong Filipino
https://www.merriam-webster.com/dictionary/habitat
https://www.un.org/en/observances/habitat-day
https://www.habitat.org.ph/

Linggo, Oktubre 2, 2022

Pahayag ng KPML sa International Day of Non-Violence

PAHAYAG NG KPML SA INTERNATIONAL DAY OF NON-VIOLENCE
Oktubre 2, 2022

KATARUNGAN, HINDI KARAHASAN! 
KARAPATANG PANTAO, RESPETUHIN!
HUSTISYA KAY ALDRIN CASTILLO, 
AT SA LAHAT NG BIKTIMA NG EJK!
ICC, MAGPATULOY SA IMBESTIGASYON!
KASUHAN NG CRIME AGAINST HUMANITY ANG DAPAT KASUHAN!

Mahigpit na nakikiisa ang Kongreso ng Pagkakaisa ng Maralitang Lungsod (KPML) sa International Day of Non-Volence o Pandaigdigang Araw ng Kawalan ng Karahasan tuwing Oktubre 2, kasabay ng kaarawan ni Mahatma Gandhi, pinuno ng Indian independence movement at pioneer ng pilosopiya at istratehiya ng non-violence.

Ayon sa General Assembly resolution A/RES/61/271 ng 15 June 2007, na nagtatag ng paggunita, ang International Day ay isang okasyon para "ipalaganap ang mensahe ng walang karahasan, kabilang ang sa pamamagitan ng edukasyon at kamalayan ng publiko". Ang resolusyon ay muling pinagtitibay "ang unibersal na kaugnayan ng prinsipyo ng di-karahasan" at ang pagnanais na "matiyak ang isang kultura ng kapayapaan, pagpaparaya, pag-unawa at walang karahasan".

Oktubre 2, 2017, kasabay ng International Day of Non-Violence, ay marahas na pinaslang si Aldrin Castillo, na biktima ng War on Drugs ni dating Pangulong Duterte. Ayon sa kanyang inang si Nanette, hindi niya maubos-maisip bakit ang kanyang anak ay pinaslang, gayong hindi naman adik, kundi mabuting anak si Aldrin. Ang sigaw ng maraming ina, katarungan! Hustisya sa kanilang mga anak na pinaslang!

Napakarami ng napapaslang, ayon sa Philippine Alliance of Human Rights Advocates (PAHRA). Ayon sa ulat ng Rappler noong Setyembre 2020, nasa 7,884 drug suspects ang napatay ng pulisya mula nang maupo si Duterte sa pwesto hanggang Agosto 31, 2020. Ayon sa datos ng gobyerno, 6,229 katao ang napatay sa mga operasyon kontra droga ng pulisya mula Hulyo 1, 2016, hanggang Enero 31, 2022. Hindi kasama sa bilang na ito ang mga biktima ng vigilante-style killings, na tinatantya ng mga human rights group na nasa pagitan ng 27,000 at 30,000. Sa mga pangyayaring ito, dapat may managot! Maraming ina ang lumuluha, maraming pamilya ang naghahanap ng hustisya! 

Dapat patuloy na mag-imbestiga ang International Criminal Court (ICC) hinggil sa mga kasi ng extrajudicial killings, o pag-salvage, o pagrampa sa mga inosenteng biktima kaugnay sa War on Drugs.

Para sa KPML, ngayong paggunita sa International Day of Non-Violence, dapat nang matigil ang mga pagpaslang sa ngalan ng War on Drugs, at dapat managot ang mga taong pumatay sa mga inosenteng walang kalaban-laban! Dapat nang matigil ang mga karahasan!

Pinaghalawan:
https://www.un.org/en/observances/non-violence-day
https://paalam.org/homepage/victims/aldrin-castillo/
https://www.dailymail.co.uk/news/article-4940670/Church-protect-Philippine-officers-talk-drug-killings.html
https://newsinfo.inquirer.net/1664962/crimes-against-humanity-justice-out-of-reach-for-ejk-victims-in-ph-drug-war
https://humanrightsmeasurement.org/extrajudicial-killings-in-the-philippines/
https://idpc.net/alerts/2022/04/philippines-lack-of-accountability-paves-way-for-more-killings-in-duterte-drug-war-amnesty-international

Sabado, Oktubre 1, 2022

Pahayag ng KPML sa International Day of Older Persons

PAHAYAG NG KPML SA INTERNATIONAL DAY OF OLDER PERSONS
Oktubre 1, 2022

BENEPISYO SA MGA SENIOR CITIZEN! 
RESPETO SA MGA MATATANDA!
AMYENDAHAN ANG RA 10868 (CENTENARIAN ACT OF 2016)
NA IMBES EDAD 100 AY IBABA SA EDAD 80!

Mahigpit na nakikiisa ang Kongreso ng Pagkakaisa ng Maralitang Lungsod (KPML) sa pagdiriwang ng International Day of Older Persons o Pandaigdigang Araw ng mga Matatanda tuwing Oktubre 1 bawat taon.

Noong Disyembre 14, 1990, idineklara ng United Nations General Assembly ang Oktubre 1 bilang International Day of Older People na nakatala sa Resolution 45/106. Ang holiday ay ipinagdiwang sa unang pagkakataon noong Oktubre 1, 1991. Layunin ng araw na ito na mapataas ang kamalayan tungkol sa mga isyu na nakakaapekto sa mga matatanda, tulad ng senescence at pang-aabuso sa nakatatanda. Ito rin ay isang araw upang pahalagahan ang mga ambag na ginawa ng mga matatanda sa lipunan. Ang holiday na ito ay katulad ng National Grandparents Day sa United States at Canada pati na rin ang Double Ninth Festival sa China at Respect for the Aged Day sa Japan. Ang pagdiriwang ay isang pokus ng mga tumatandang organisasyon at ng United Nations Programme on Ageing.

Sa ating bansa, pinahalagahan ang mga senior citizen sa pamamagitan ng 20% diskwento sa mga bilihin at serbisyong nakalaan para sa kanila. Gayunpaman, kaiba sa kultura ng ibang bansa, ang mga matatanda sa Pilipinas ay kabilang pa rin sa pamilya, at hindi natin ipinadadala sa mga Home for the Aged. Kadalasan ay sila ang nag-aalaga sa ating mga anak pag tayo'y nasa trabaho, o kung wala mang regular na trabaho ay nagtitinda ng kung anu-ano para lang mabuhay. Patuloy nating iginagalang ang mga matatanda. Kaya hindi nauso sa atin ang konsepto ng kanluran na Home for the Aged, maliban kung wala nang pamilya ang mga matatandang ito, at kailangan silang dalhin sa Home for the Aged upang mapangalagaan.

Kung ano man ang mga serbisyong nakalaan sa mga edad 60 pataas, sana'y maibigay sa mga senior citizens. Kung sakaling malakas pa ang mga senior citizen at nais pa ring magtrabaho para sa kanilang pamilya, sana'y may batas para sa kanila. Dahil tiyak na nais pa rin nilang makatulong sa pamilya kahit sila'y matanda na ngunit malalakas pa. Pababain ang edad ng Centenarian Gift mula edad 100 ay gawing 80 upang mas ma-enjoy pa ng mga matatanda ang bigay ng pamahalaan. Dahil kung edad 100 ay baka hindi na ito ma-enjoy ng matatanda dahil baka uugod-ugod na sila upang i-enjoy ang gantimpala nilang makakamit, kundi ang makikinabang na lang ay ang mga anak at apo ng edad 100. Ayon sa Republic Act No. 10868 o ang “Centenarians Act of 2016,” lahat ng Pilipino na umabot sa edad na isang daang (100) taong gulang, naninirahan man sa Pilipinas o sa ibang bansa, ay dapat parangalan ng Liham ng Papuri mula sa Pangulo ng Pilipinas na binabati ang matatandang edad 100 para sa kanyang mahabang buhay. Bibigyan sila ng Centenarian Gift sa halagang isandaang libong piso (P100,000.00) mula sa Department of Social Welfare and Development (DSWD).

Sa mungkahing amyenda ng KPML, paagahin sa edad 80 ang makakatanggap ng kaukulang salapi, na kung sa edad 100 ay P100,000, sa edad 80 ay P80,000. Nang sa gayon, hindi pa uugod-ugod ang matatanda ay mas ma-enjoy pa nila ang salaping inilaan para sa mga matatandang nakaabot ng edad 80.

Pinaghalawan:
https://www.un.org/en/observances/older-persons-day
https://en.wikipedia.org/wiki/International_Day_of_Older_Persons
https://pvao.gov.ph/home/centenarian-gift/

Biyernes, Setyembre 30, 2022

Pahayag ng KPML hinggil sa mga namatay na rescuer sa kasagsagan ng bagyong Karding


PAHAYAG NG KPML HINGGIL SA MGA NAMATAY NA RESCUER SA KASAGSAGAN NG BAGYONG KARDING
Setyembre 30, 2022

PAGPUPUGAY SA LIMANG NAMATAY NA RESCUER!
MAGDEKLARA NA ANG PAMAHALAAN NG CLIMATE EMERGENCY!
CLIMATE JUSTICE, NOW!

Dapat na talagang magdeklara ng climate Emergency ang pamahalaan upang mas matutukan ang isyung ito sa lalong madaling panahon upang mapaliit natin ang tsansa ng mga kamatayan dulot ng mga bagyo.

Nitong nakaraan lamang, limang rescuer ang namatay sa Bulacan sa kasagsagan ng bagyong Karding. Ayon sa ulat ni Bise Gobernador ng Bulacan Alex Castro, nasawi  ang limang rescuer mula sa PDRRMO (Provincial Desaster Risk Reduction and Management Office) sa gitna ng pagtupad sa kanilang tungkulin sa bayan ng San Miguel. "Sa kanilang paghahanda ng life boats ay rumagasa ang flash flood sa kanilang lokasyon na nagpaguho ng isang pader at siyang dahilan ng pagdaloy ng tubig baha na umanod sa ating mga rescuers." Ang mga rescuer ay nakilalang sina George Agustin, Troy Justin Agustin, Marby Bartolome, Jerson Resurreccion, at Narciso Calayag, Jr.

Nagpupugay ang KPML sa kabayanihan ng ating mga rescuers na namatay sa paggampan ng tungkuling iligtas ang ating mga kababayan sa pananalasa ng bagyo. Gayunpaman, hindi sapat ang papuri sa kanila, kundi pag-isipan at pag-usapan din ang nagaganap na pagbabago ng klima na nagdulot ng ganitong katitinding bagyo, na siyang dahilan ng kamatayan ng mga tulad nila.

Sa pananaliksik at pag-aaral ng KPML, dapat nang agarang kumilos ang pamahalaan at magdeklara ng climate emergency upang mas mapag-usapan sa pambansang antas ang mga nagaganap na ito. Sa ngayon, napapag-usapan sa pandaigdigang antas na nagbabago na ang klima, at noong Oktubre 2018 ay nagdeklara na ang mga siyentipiko mula sa United Nations Framework Convention on Climate Change (UNFCCC) na kung hindi magagawan ng paraan ang pagbabago ng klima, sa 2030 ay magtutungo na tayo sa tinatawag nilang "point of no return". 

Siyamnapu't isang awtor at review editor mula sa 40 bansa ang naghanda ng ulat ng IPCC (Intercontinental Panel on Climate Change) bilang tugon sa UNFCCCnoong pinagtibay nito ang Paris Agreement noong 2015. Ang buong pangalan ng ulat ay "Global Warming of 1.5°C, an IPCC special report on the impacts of global warming of 1.5°C above pre-industrial levels and related global greenhouse gas emission pathways, in the context of strengthening the global response to the threat of climate change, sustainable development, and efforts to eradicate poverty."

Kaya naninindigan at nananawagan ang KPML na bawasan na ang paggamit ng mga fossil fuel, natural gas, at coal plants, at tumungo na tayo sa paggamit ng mga renewable energy upang maiwasan natin ang mas matitinding delubyong kakaharapin pa natin. Sa ngayon ay dapat kumilos at magkaisa ang iba't ibang bansa sa buong daigdig sa pagdeklara ng climate emergency upang hindi natin maabot ang mas pag-iinit pa ng mundo sa 1.5 degrees celsius hanggang 2030.

Mga pinaghalawan:
https://www.rappler.com/nation/luzon/fallen-heroes-bulacan-mourns-rescuers-died-due-typhoon-karding/
https://www.ipcc.ch/2018/10/08/summary-for-policymakers-of-ipcc-special-report-on-global-warming-of-1-5c-approved-by-governments/

Huwebes, Setyembre 29, 2022

Pahayag ng KPML sa International Day of Awareness on Food Loss and Waste Reduction

PAHAYAG NG KPML SA INTERNATIONAL DAY OF AWARENESS ON FOOD LOSS AND WASTE REDUCTION
Setyembre 29, 2022

Stop Food Waste! For People and Planet!
Itigil ang Pag-aksaya ng Pagkain! 
Para sa Tao at Planeta!

Mahigpit na nakikiisa ang Kongreso ng Pagkakaisa ng Maralitang Lungsod (KPML) sa pag-alala sa International Day of Awareness on Food Loss and Waste Reduction o Pandaigdigang Araw ng Kamalayan sa Pagkawala ng Pagkain at Pagbabawas ng Basura. Ito na ang ikatlong pagkakataon na inaalala ang araw na ito mula noong una itong inalala noong Setyembre 29, 2020.

Sa ating bansa, halos walang makain ang maralita, na kung may pagkain mang mabibili ay kaymahal, dahil bukod sa isang kahig, isang tuka, ay wala halos pambili ng pagkain. Kaya marami ang nagtitiyaga sa pagpag o yaong mga tira-tirang pagkain sa mga restoran na huhugasan lang ay muling iluluto.

Ayon sa United Nations Environment Programme (UNEP), "Ang suplay ng pagkain sa maraming bansa ay nasa landas na aabutan ang pagsasaka at paggamit ng lupa bilang pinakamalaking kontribyutor sa greenhouse gases (GHGs). Ang pagpoproseso at pag-iimpake ng pagkain, kasama ng transportasyon at basura ng pagkain, ay nagtutulak sa food supply chain sa tuktok ng listahan ng mga tagabuga  ng GHG sa buong mundo. Nabubuuo ang GHG sa bawat hakbang ng sistema ng suplay ng pagkain, hindi alintana kung ang pagkain na ginawa ay nasira. Sa partikular, ang mga naaksayang pagkain na nabubulok sa mga landfill ay gumagawa ng methane, isang malakas na greenhouse gas na may 84 na beses na lakas ng pag-init ng carbon dioxide sa loob ng 20 taon."

"Ang pagkawala at pag-aaksaya ng pagkain ay sumisira sa pagpapanatili ng ating mga sistema ng pagkain. Kapag ang pagkain ay nawala o nasayang, ang lahat ng mga mapagkukunan na ginamit upang makagawa ng pagkain na ito - kabilang ang tubig, lupa, enerhiya, paggawa at kapital - ay nasasayang. Bilang karagdagan, ang pagtatapon ng pagkawala ng pagkain at basura sa mga landfill, ay humahantong sa mga greenhouse gas emissions, na nag-aambag sa pagbabago ng klima. Ang pagkawala at pag-aaksaya ng pagkain ay maaari ring negatibong makaapekto sa seguridad ng pagkain at pagkakaroon ng pagkain, at makatutulong sa pagtaas ng halaga ng pagkain."

Bigyang pansin natin kung paano naaaksaya ang ating mga pagkain. At kung paano naman ang ekonomya ng pagkaing pagpag ay pansamantalang lumulutas sa problema ng gutom sa maraming tahanan ng mga maralita. Na dapat ay hindi pagpag ang kanilang kainin bilang tao, kundi ang mga pagkaing masustansya at bago. At hindi ang itinapon na ng mga mayayaman ay kukunin upang iluto upang gawing pagkain ng kapwa tao.

Dapat kahit sa pagkain ay maging tao tayo, na may dignidad at hindi api o pinagsasamantalahan.

Pinaghalawan:
https://www.unep.org/events/un-day/international-day-awareness-food-loss-and-waste-2022
https://www.un.org/en/observances/end-food-waste-day

Lunes, Setyembre 26, 2022

Pahayag ng KPML sa ika-13 anibersaryo ng Ondoy at pananalasa ng Karding

PAHAYAG NG KPML SA IKALABINTATLONG ANIBERSARYO NG BAGYONG ONDOY AT SA PANANALASA NG BAGYONG KARDING
Setyembre 26, 2022

Mag-ingat po tayo, mga kababayan, sa pananalasa ng matinding bagyong Karding sa kasalukuyan, habang nagdeklara naman ng walang pasok sa mga paaralan ang maraming lungsod.

Sa petsang ito'y magugunita rin natin ang biglaang paglubog ng maraming lungsod sa National Capital Region (NCR) at mga karatig lalawigan dahil sa biglaang pananalasa ng bagyong Ondoy noong Setyembre 26, 2009, labintatlong taon na ang nakararaan. Nabasa ang maraming kagamitan, lumubog sa baha ang maraming kabahayan, at marami ring namatay. 

Ayon pa sa ulat, nagbuhos ang Bagyong Ondoy ng 334 milimetrong ulan sa unang anim na oras, ang pinakamataas na naitala na pag-ulan sa metropolis. Kumbaga, ang isang buwang bagyo ay naganap lang ng anim na oras na nagpabaha sa maraming lungsod at karatig lalawigan. Ang dating rekord ay 341 milimetro sa loob ng 24 oras noon pang 42 taon na ang nakararaan. Nilubog ni Ondoy ang hanggang 80% ng lungsod, at tinakpan ang mga lugar na hindi pa nakaranas ng pagbaha, napadpad ang mga tao sa mga bubungan at naghatid ng kamatayan at paghihirap sa ilang mayaman at laksa-laksang mahihirap. Kahit na humupa na ang tubig, ang Metro Manila at ang mga nasa labas na rehiyon ay nakitang hindi handa sa pangangasiwa ng mga natamaan ng bagyo, nasugatan, at pati sa kontaminasyon na dulot ng tubig-baha.

Sinasabi ng mga eksperto sa klima na kung hindi mapapag-usapan ang mga mapagpasyang solusyon, baka mas matindi pang unos ang darating, tulad ng naganap na Yolanda noong Nobyembre 8, 2013. Gayunpaman, ang mga industriyalisadong bansa, na siyang dahilan ng karamihan sa mga emisyon ng karbon sa mundo - ang pinakamalaking kontribyutor sa pagbabago ng klima - ay hindi pa rin talaga umaako ng responsibilidad at nagpapakita ng pamumuno tungo sa mga tunay na solusyon.

Sa paggunita sa Ondoy at habang nananalasa ang bagyong Karding, gunitain natin ang mga aral ng nakaraan. Nagbabago na ang klima. Napakaliit na panahon na lamang ang nalalabi upang magsagawa ng matitinding pagbabago sa mga aktibidad ng tao upang maiwasan ang panganib ng pabagu-bagong klima. Gayunpaman, hindi dapat sisihin ang pagkakagamit lamang ng fossil fuel; hindi ang tipo ng pagkukunan ng enerhiya kundi ang malawakan at matinding paggamit ng enerhiyang batay sa fossil fuel na nagmula sa isang ekonomikong sistemang pangunahing itinulak ng pagkakamal ng limpak-limpak na tubo. Sa ganitong lohika, may katangian ang sistemang kapitalismo na nagreresulta sa matinding pagbabago ng klima dahil sa emisyon ng GHG at pagkawasak ng natural na likas-yaman. Pagkat ang likas-yaman at ang mga karaniwang ginagamit sa araw-araw, tulad ng lupa, ay nagiging pribadong pag-aari ng iilan sa kapinsalaan ng higit na  nakararami; ang patuloy at labis-labis na pagpiga sa kalikasan; at sobra-sobrang produksyon na lampas-lampas sa pangangailangan ng tao; ang maaksayang paggamit; paglawak ng pamilihan at pagkuha ng mga materyales; malawakang produksyon para sa pandaigdigang pamilihan na nangangailangan ng enerhiya para sa pagluluwas ng mga produkto. Kaya dapat ang sistemang kapitalismo’y palitan ng mas maunlad na sistemang di makasisira sa kalikasan at di yuyurak sa dangal ng kapwa tao nang dahil lang sa tubo.

Pag-isipan natin ang mga ito, habang nangangaligkig tayo sa ginaw sa pananalasa ng bagyong Karding. Mag-ingat tayo, at tiyaking nasa matataas na lugar ang ating mga mahahalagang kagamitan, tulad ng mga papeles o dokumento, upang kung bumaha man ay bakasakaling makaligtas ang mga iyon sa baha.

Magdeklara na ng Climate Emergency!
Magdamayan, magbayanihan, magtangkilikan, magtulungan!
Climate Justice Now! Baguhin ang sistema!

Miyerkules, Setyembre 21, 2022

Pahayag ng KPML sa ikalimampung anibersaryo ng martial law sa Pilipinas

PAHAYAG NG KPML SA IKALIMAMPUNG ANIBERSARYO NG MARTIAL LAW SA PILIPINAS
Setyembre 21, 2022

Mahigpit na nakikiisa ang Kongreso ng Pagkakaisa ng Maralitang Lungsod (KPML) sa lahat ng mamamayang nakikibaka sa paggunita sa karumal-dumal na panahon ng martial law sa Pilipinas.

Ayon sa datos, nasa 11,103 ang dokumentadong kaso ng paglabag sa karapatang pantao ang naitala, batay sa dokumentasyon ng Human Rights Victims’ Claims Board (HRVCB). Ang HRVCB, na nilikha alinsunod sa Republic Act No. 10368 o  Human Rights Victims Reparation and Recognition Act of 2013, ay isang quasi-judicial body na ipinag-uutos ng batas "upang tumanggap, suriin, iproseso, at imbestigahan" ang mga claim sa reparation na ginawa ng mga biktima ng paglabag sa karapatang pantao sa ilalim ng Martial Law ng yumaong diktador na si Ferdinand Marcos. Sa ngayon ay may dokumentaryong may pamagat na "11,103" na batay sa panulat at direksyon nina Jeannette Ifurung at Mike Alcazaren, ay tumalakay sa kuwento ng mga nakaligtas sa Martial Law.

Noong Setyembre 21, 1972, nilagdaan ni Pangulong Ferdinand E. Marcos ang Proklamasyon Blg. 1081 na nagdedeklara ng batas militar sa buong bansa, na diumano ay tumutugon sa tumataas na "banta ng komunista" noong panahong iyon. Subalit mas nakita ang panggigipit sa mamamayan, at magarbong pamumuhay ng diktadura, na nakitang paglustay sa pera ng bayan, malawakang pang-aabuso sa karapatang pantao, panunupil sa mga batayang kalayaan sa pamamahayag, at walang humpay na katiwalian at pagnanakaw ng mga nasa kapangyarihan na nag-iwan sa malaking bahagi ng bansa sa kahirapan.

Sa ating paggunita sa ika-50 taon ng pagkadeklara ng Batas Militar, ipinaaalala natin sa lahat na ang kasaysayan ay hindi lamang koleksyon ng mga pangalan, petsa at lugar. Ito ay tungkol sa pakikibaka at paghahanap ng katotohanan sa likod ng nakaraan. Ito ay isang buhay na gabay para sa kinabukasan ng ating kabataan at ng ating bansa. Hindi ito katulad ng sinabi ng artistang si Ella Cruz na ang kasaysayan ay tsismis. Ang kasaysayan ay buhay na katotohanan ng mga namatay at nagpakasakit upang labanan ang karumal-dumal na panahon ng diktadurang Marcos.

At ngayong nakapwesto na ang anak ng diktador bilang pangulo, nanganganib ang kasaysayan. Tumindi ang pagkalat ng mga halibyong o fake news. Hawak ng bagong rehimen ang pambura upang pabanguhin ang mabantot nilang nakaraan. Subalit huwag tayong pumayag na baguhin nila ang ating kasaysayan. Lalo't higit ay huwag nating payagang wasakin nila ang mga rekord at nakaimbak na datos sa mga arkibo ng mga kabuktutan ng martial law.

Para sa KPML at iba pang organisasyong nakikibaka para sa karapatan at kagalingan ng mamamayan tungo sa isang lipunang makatao, alalahanin natin ang mga nagsakripisyo para sa kalayaan ng bayan mula sa kamay ng diktadura at kuko ng mga mapagsamantala. Huwag nating kalimutan ang mga nangawala at namatay, tulad nina Hermin Lagman, Liliosa Hilao, Lorena Barros, Jessica Sales, at marami pang ibang bumubuo ng 11,103 dokumentadong biktima ng kahayupan ng diktadura.

No to historical distortion!
Never again! Never forget!
Hustisya sa mga biktima ng martial law!

Pahayag ng KPML sa International Day of Peace

PAHAYAG NG KPML SA INTERNATIONAL DAY OF PEACE
Setyembre 21, 2022

Mahigpit na nakikiisa ang Kongreso ng Pagkakaisa ng Maralitang Lungsod (KPML) sa lahat ng mamamayan ng daigdig sa pag-alala sa International Day of Peace o ang Pandaigdigang Araw ng Kapayapaan. Sa maraming panig ng mundo ay puno ng mga alitan dahil sa relihiyon, usapin ng lahi, at pag-aagawan sa pribadong pag-aari, tulad ng mga lupain, teritoryo, at kalakalan.

Naniniwala ang KPML na mawawala ang mga alitang ito kung mababago ang sistema ng lipunan kung saan pagkakasundo ang nangingibabaw, na anuman ang pagkakaiba sa kulay ng balat at estado sa buhay ay may pagkakapantay sa kalagayan kaya mawawalan ng dahilan ang digmaan at alitan, kaya magkaroon ng kapayapaan. 

Dapat mawala na ang anumang batayan ng pagsasamantala ng tao sa tao, at nang mawala ang kaapihan ng maliliit. Magkakaroon ng tunay na kapayapaan kung mawawala ang pribadong pagmamay-ari ng mga kasangkapan sa produksyon na siyang dahilan ng kahirapan ng mayorya ng lipunan. Magkakaroon ng tunay na kapayapaan kung ang uring manggagawa ang magpapatakbo sa lipunan. 

Sinabi na noon ni Gat Emilio Jacinto na “Iisa ang pagkatao ng lahat!” Kaya dapat walang pagsasamantala ng tao sa tao upang magkaroon ng tunay na kapayapaan sa mundo. 

Para sa asam nating kapayapaan: Baguhin at palitan ang bulok na sistemang umiiral!

Linggo, Setyembre 18, 2022

Pahayag ng KPML sa International Equal Pay Day

PAHAYAG NG KPML SA INTERNATIONAL EQUAL PAY DAY (PANDAIGDIGANG ARAW NG PANTAY NA SAHOD)
Setyembre 18, 2022

P750 MINIMUM WAGE, IPATUPAD!
6 HRS WORK PER DAY AT UNIVERSAL 
BASIC INCOME, ISABATAS, IPATUPAD!
NEOLIBERALISMO, WAKASAN!

Mahigpit na nakikiisa ang Kongreso ng Pagkakaisa ng Maralitang Lungsod (KPML) sa mga sahurang manggagawa sa buong mundo ngayong International Equal Pay Day o Pandaigdigang Araw ng Pantay na Sahod.

Ang International Equal Pay Day (A/RES/74/142) ay idineklara ng United Nations. Ang pagkamit ng pantay na suweldo ay isang mahalagang tungkong bato o milestone para sa karapatang pantao at pagkakapantay-pantay ng kasarian. Ang United Nations, kabilang ang UN Women at ang International Labor Organization (ILO) ay nag-aanyaya sa mga kasaping estado, kababaihan at pangmasang organisasyon, gayundin sa mga negosyo at organisasyon ng manggagawa at kapitalista, na isulong ang pantay na suweldo para sa trabaho ng pantay na halaga at ang pagpapalakas ng ekonomiya ng kababaihan.

Ang pantay na suweldo para sa pantay na trabaho (Equal pay for equal work) ay konsepto ng mga karapatan sa paggawa na ang mga indibidwal sa parehong lugar ng trabaho ay bibigyan ng pantay na suweldo. Ito ang karaniwang ginagamit sa konteksto ng sekswal na diskriminasyon, kaugnay ng agwat sa suweldo ng kasarian. Ang pantay na suweldo ay nauugnay sa buong hanay ng mga pagbabayad at benepisyo, kabilang ang pangunahing sahod, mga hindi bayad na suweldo, mga bonus at allowance. Ang ilang mga bansa ay kumilos nang mas mabilis kaysa sa iba sa pagtugon sa pantay na suweldo.

Sa ating bansa, bagamat ipinapanawagan na ipatupad ang Living Wage (Nakabubuhay na Sahod) na nakasaad sa Konstitusyon, ay nagkakasya pa tayo sa panawagang P750 Minimum Wage, Ipatupad! At upang madagdagan ang trabaho upang magkatrabaho rin ang mga walang trabahong maralita ay gawing anim na oras ang otso oras na paggawa. Kaya sa loob ng 24 oras na may tatlong shift ay magiging apat na shift na kung magiging anim na oras na paggawa. Ito'y karagdagang isang manggagawa sa 24 oras.

Ang Universal Basic Income (UBI) naman ay isang programang dapat ipatupad ng gobyerno kung saan ang bawat nasa hustong gulang na mamamayan ay tumatanggap ng isang takdang halaga ng pera nang regular. Ang mga layunin ng isang pangunahing sistema ng kita ay upang maibsan ang kahirapan at palitan ang iba pang mga programang panlipunan na nakabatay sa pangangailangan. Ang ideya ng unibersal na pangunahing kita ay nakakuha ng momentum sa U.S. habang patuloy na pinapalitan ng automation ang mga manggagawa sa pagmamanupaktura at iba pang sektor ng ekonomiya.

Ang ideya ng pagbibigay ng pangunahing kita sa lahat ng miyembro ng lipunan ay pinanawagan na ilang siglo na ang nagdaan. Binanggit ng 16th century English na pilosopo at estadista na si Thomas More ang ideya sa kanyang  akdang Utopia. Si Thomas Paine, isang pamphleteer na ang mga ideya ay nakatulong sa pag-udyok sa Rebolusyong Amerikano, ay nagmungkahi ng isang plano sa buwis kung saan ang mga kita ay magbibigay ng daloy ng kita ng gobyerno “sa bawat tao, mayaman o mahirap.” At iminungkahi ni Martin Luther King, Jr., ang "garantisadong kita" sa kanyang aklat na Where Do We Go from Here: Chaos or Community?  na nalathala noong 1967.

Magagawa ang lahat ng iyan kung mapapalitan ng uring manggagawa ang patakarang neoliberalismo na nagdulot, imbes na kasaganaan sana ng lipunan, ay kahirapan sa milyon-milyon, kundi man bilyong, mamamayan sa buong daigdig.

Kaya ang KPML, ngayong International Equal Pay Day, ay nakikiisa sa lahat ng manggagawa sa lahat ng bansa na panawagang Equal Pay for Equal Work at ipantay ang sahod ng kababaihan sa sahod ng kalalakihan! Ipatupad ang anim na oras na paggawa sa bansa! Pag-aralan ang Universal Basic Income, isabatas at ipatupad sa bansa! Wakasan na ang sistemang neoliberalismo na yumurak sa dignidad at pagkatao ng mamamayan!

Mga pinaghalawan:
https://www.un.org/en/observances/equal-pay-day
https://en.wikipedia.org/wiki/Equal_pay_for_equal_work
https://www.investopedia.com/terms/b/basic-income.asp

Sabado, Setyembre 17, 2022

Pahayag ng KPML sa World Patient Safety Day

PAHAYAG NG KPML 
SA WORLD PATIENT SAFETY DAY
Setyembre 17, 2022

PANGALAGAAN ANG KALUSUGAN!
BAWAT PASYENTE'Y INGATAN!
MURANG GAMOT PARA SA MARALITA!

Mahigpit na nakikiisa ang Kongreso ng Pagkakaisa ng Maralitang Lungsod (KPML) sa taunang pag-alala sa World Patient Safety Day (Pandaigdigang Araw ng Kaligtasan ng Pasyente) tuwing ika-17 ng Setyembre. Ayon sa World Health Organization (WHO), layunin ng araw na ito na itaas ang pandaigdigang kamalayan tungkol sa kaligtasan ng pasyente at magtaguyod ng nagkakaisang aksyon ng mga bansa  upang mabawasan ang pinsala sa pasyente. Ang kaligtasan ng pasyente ay nakatuon sa pagpigil at pagbabawas ng mga panganib, pagkakamali at pinsala na nangyayari sa mga pasyente sa panahon ng pagbibigay ng pangangalagang pangkalusugan.

Ang World Patient Safety Day ay isa sa 11 opisyal na pandaigdigang kampanya sa kalusugan ng publiko na itinakda ng World Health Organization (WHO), kabilang ang World Tuberculosis Day, World Health Day, World Chagas Disease Day, World Malaria Day, World Immunization Week, World No Tobacco Day, World Blood Donor Day, World Hepatitis Day, World Antimicrobial Awareness Week at World AIDS Day.

Mahalaga ang World Patient Safety Day upang maiwasan na ang mga nangyayaring pagkakamali noon, tulad ng pagkaiwan sa tiyan ng pasyente ng karayom o anumang kagamitan ng doktor, dahil nakaligtaan. Marami nang namatay sa COVID, ayon sa ulat ng Kagawaran ng Kalusugan, habang noong panahon ng pandemya ay nagsisiksikan sa mga ospital. Madalas pang kulang ang kama para sa mga pasyente, na kung magkaroon man ng kama ay wala sa kwarto kundi nasa pasilyo na. Nawa ang nakitang mga problema nito ay mabigyang kalutasan. 

Nawa'y magkaroon ng epektibo ngunit murang gamot para sa mga maralita. Maayos na pag-aasikaso sa mga pasyente, at huwag isapribado ang mga ospital upang ang kalusugan ay hindi ibatay sa tutubuin ng ospital kundi ang kalusugan ay serbisyo publiko.

Kalusugan, hindi tubo!
Ang kalusugan ay serbisyo, huwag gawing negosyo!

Biyernes, Setyembre 16, 2022

Pahayag ng KPML sa International Day for the Preservation of the Ozone Layer

Pahayag ng KPML sa International Day for the Preservation of the Ozone Layer
Setyembre 16, 2022

PROTEKTAHAN ANG OZONE LAYER!
PROTEKTAHAN ANG KALIKASAN
AT KALUSUGAN NG MAMAMAYAN!

Mahigpit na nakikiisa ang Kongreso ng Pagkakaisa ng Maralitang Lungsod (KPML) sa pagdiriwang ng International Day for the Preservation of the Ozone Layer (Pandaigdigang Araw para sa Pagpapanatili ng Ozone Layer). Ang tema na inihayag ng UN Environment Program for International Day for the Preservation of the Ozone Layer 2022 ay 'Global Cooperation Protecting Life on Earth'

Napakahalaga na protektahan ang buhay. Buhay ng tao, hayop, halaman at daigdig. At isa sa mga paraan ay ang hadlangan ang pagkabutas pa ng ozone layer. Ibig sabihin, ang mga dahilan ng pagkabutas nito ay huwag nating hayaang magpatuloy. Kaya nakikiisa ang KPML sa panawagang gumamit na ng renewable energy, at iwanan na ang pagsusunog ng fossil fuel at coal plants para sa enerhiya.

Dahil sinasala ng ozone layer ang karamihan sa mapaminsalang ultra-violet radiation mula sa araw, ang pagkilos na ito ay nagpoprotekta sa milyun-milyong tao mula sa kanser sa balat at katarata. Pinahintulutan nito ang mahahalagang ekosistema na mabuhay at umunlad. Pinabagal nito ang pagbabago ng klima: kung hindi ipinagbawal ang mga kemikal na nakakasira ng ozone, titingnan natin ang isang sakuna na pagtaas ng temperatura sa buong mundo na tinatayang 2.5°C pagsapit ng 2100.

Noong 1987, nagpulong sa Montreal ang mga kinatawan mula sa 24 na bansa at inihayag sa mundo na oras na upang ihinto ang pagsira sa ozone layer. Sa paggawa nito, ang mga bansang ito ay nangako sa kanilang sarili, sa pamamagitan ng Montreal Protocol on Substances that Deplete the Ozone Layer, na alisin sa mundo ang mga substance na nagbabanta sa ozone layer.

Noong 19 Disyembre 1994, idineklara ng UN General Assembly ang Setyembre 16 bilang International Day for the Preservation of the Ozone Layer, na ginugunita ang petsa kung kailan nilagdaan ang Montreal Protocol on Substances that Deplete the Ozone Layer noong 1987. Ang araw ay unang ipinagdiwang noong Setyembre 16, 1995.

Ang araw na ito ay pagpapaalala sa atin na dapat nating patuloy na alagaan ang ating kalikasan, lalo na ang ozone layer na sumasala sa radyasyon ng araw upang hindi tayo magkasakit. Patuloy tayong manindigan para sa ating kalikasan at protektahan ang ating daigdig para sa mga susunod na henerasyon.

Huwebes, Setyembre 15, 2022

Pahayag ng KPML sa International Day of Democracy

PAHAYAG NG KPML SA INTERNATIONAL DAY OF DEMOCRACY
Setyembre 15, 2022

Ang demokrasya nga ba'y ano? At bakit dapat ipagdiwang ang International Day of Democracy (Pandaigdigang Araw ng Demokrasya), kung ang nangingibabaw pa rin ay pang-aapi at pagsasamantala ng tao sa tao, lalo na sa panahong ito ng pag-iral ng neoliberalismo at lipunang kapitalismo?

May agam-agam ang maralita kung ang demokrasyang tinatamasa natin ay kalayaan lamang bumoto pag eleksyon? Kalayaang pumasok sa trabaho upang bumalik lamang kinabukasan kahit biktima ng kontraktwalisasyon?

Noong 2007, nagpasya ang United Nations General Assembly na ipagdiwang ang Setyembre 15 bilang International Day of Democracy, na layuning itaguyod ang mga prinsipyo ng demokrasya, at inimbitahan ang lahat ng miyembrong estado at organisasyon na gunitain ang araw sa isang naaangkop na paraan na nag-aambag sa pagtataas ng kamalayan ng publiko, habang ang mga demokrasya ay may mga karaniwang katangian, walang iisang modelo ng demokrasya at ang demokrasya ay hindi pag-aari ng alinmang bansa o rehiyon... Ayon pa sa UN, ang demokrasya ay isang unibersal na kahalagagan batay sa malayang pagpapahayag ng kagustuhan ng mga tao upang matukoy ang kanilang sariling pampulitika, pang-ekonomiya, mga sistemang panlipunan at kultural, at ang kanilang buong partisipasyon sa lahat ng aspeto ng buhay.

May ilang nagsasabing ang depinisyon ng demokrasya ay makikita sa Gettysburg speech ni Pangulong Abraham Lincoln ng Amerikam nang kanyang binanggit ang "government OF the people, BY the people, FOR the people" na sana nga'y nangyayari sa kasalukuyan. At hindi sana "government OFF the people, BUY the people, FOOL the people" na kadalasang nangyayari ngayon, lalo sa panahon ng pamamayagpag ng political dynasties sa ating bansa.

Mahigpit na naninindigan ang Kongreso ng Pagkakaisa ng Maralitang Lungsod (KPML) na ang tunay na demokrasya, na mula sa salitang Griyegong demos (mamamayan) at kratia (kapangyarihan, pamumuno), ay dapat pagsasakapangyarihan ng mamamayan. Ibig sabihin, dapat walang laksang naghihirap habang may mayayamang iilan lang walang naghaharing oligarkiya at dinastiyang pulitikal, hindi umiiral ang mga parasite o lintang manpower agency, tinatamasa ng manggagawa ang living wage, may sosyalisadong pabahay para sa maralita na hindi nakabatay sa market value, at natatamasa ng simpleng mamamayan ang hustisyang panlipunan. Hangga't naghahari ang iilan at mayorya ay naghihirap, hindi tunay na demokrasya ang umiiral.

Martes, Agosto 30, 2022

Pahayag ng KPML sa ikadalawampung anibersaryo ng Metro Manila Vendors Alliance (MMVA)

PAHAYAG NG KPML SA IKA-20 ANIBERSARYO NG METRO MANILA VENDORS ALLIANCE (MMVA)
Agosto 30, 2022

Mahigpit na nakikiisa ang Kongreso ng Pagkakaisa ng Maralitang Lungsod (KPML) sa pag-alala sa ikadalawampung anibersaryo ng Metro Manila Vendors Alliance (MMVA) na nabuo dahil sa matinding pagmamalupit at pagdurog sa maraming manininda sa bangketa (sidewalk vendors) sa pamumuno ni Bayani Fernando, na kilala bilang BF, na noong panahong iyon ay hepe ng Metro Manila Development Authority (MMDA). Nabuo ang MMVA noong Agosto 30, 2002 sa Delaney Hall ng UP Chapel sa Diliman. Ang unang halal na pangulo nito ay ang namayapang si Ka Pedring Fadrigon, na naging pangulo ng KPML mula 2004 hanggang 2019, at matagal na namuno sa Samahan ng Makabayang Manininda sa Fabella (SAMANA-FA) sa Mandaluyong. 

Sa ngayon, sa patnubay ni Tita Flor Santos, pangulo ng Oriang Women’s Movement, ang MMVA ay naging matatag at patuloy na lumalawak upang ang mga karapatan at kagalingan ng mga vendors ay mapangalagaan at maipaglaban. Ang vendors ay mararangal!

Ang mga vendor o yaong maliliit na manininda sa bangketa na walang pwesto sa palengke ay may karapatang mabuhay ng marangal, tulad ng mga malalaking negosyante at kapitalista. Nabubuhay sila sa pagtitinda upang itaguyod ang kanilang pamilya, makakain ng tatlong beses isang araw, at mapag-aral ang kanilang mga anak. Ang ginawa ni BF ay pagyurak sa kanilang dangal, at paninikluhod sa mga kapitalista at negosyanteng may pwesto sa palengke upang makopo ng mga ito ang pamilihan, habang iniitsapwera ang dukhang pilit pinagkakasya ang karampot na kita sa pagtitinda. Kumbaga, buhay na isang kahig, isang tuka. Karamihan sa vendors ay wala ring maayos na bahay at nakatira sa mga danger zones.

Sa patuloy na pakikibaka ng mga vendor, mula man sa MMVA o hindi, ang KPML ay kasama nila at kapatid sa pakikibaka para sa maayos nilang pagtitinda nang hindi ginagamitan ng dahas. Taas-nooo at taas-kamao kaming nagpupugay sa lahat ng mga manininda, at sa dalawang dekada nang pag-iral ng MMVA! Mabuhay kayo, mga kasama! Tuloy ang laban!

Pahayag ng KPML sa Unang National Press Freedom Day

PAHAYAG NG KPML SA UNANG NATIONAL PRESS FREEDOM DAY
Agosto 30, 2022

PAKIKIISA SA PAMBANSANG ARAW NG KALAYAAN SA PAMAMAHAYAG!
LABANAN ANG FAKE NEWS AT HISTORICAL DISTORTION!
PATULOY NA MAGBALITA AT IHAYAG ANG KATOTOHANAN!

Sa kauna-unahang pagkakataon ay ipagdiriwang sa bansa ang National Press Freedom Day (Pambansang Araw ng Kalayaan sa Pamamahayag) ngayong Agosto 30, 2022. Kaiba ito sa tuwing Mayo 3 na World Press Freedom Day na idineklara naman ng United Nations. Ang nasabing pagdiriwang ay bunsod ng Batas Republika (RA) Blg. 11699 na nilagdaan ng dating Pangulong Rodrigo Duterte nitong Abril 13, 2022 na nagdedeklara sa Agosto 30 ng bawat taon bilang "National Press Freedom Day." Ang Agosto 30 ng bawat taon ay isang working holiday, ayon sa RA 11699. Ito'y ibinalita ng Philippine News Agency (PNA) nito lang Abril 27, 2022 sa kanilang website. 

Sa ilalim ng batas na nabanggit, ang Agosto 30 ng bawat taon ay idineklarang National Press Freedom Day bilang parangal kay Marcelo H. del Pilar, ang ama ng Pamamahayag sa Pilipinas (Philippine Journalism). Si Del Pilar, na sumulat sa ilalim ng sagisag panulat na “Plaridel,” ay isinilang noong Agosto 30, 1850. Sila nina José Rizal at Graciano López Jaena ang bumubuo sa Kilusang Propaganda sa Espanya. Pinalitan niya si Jaena bilang patnugot ng La Solidaridad.

Dahil dito'y nakikiisa ang patnugutan ng Taliba ng Maralita, ang opisyal na publikasyon ng pambansang samahang Kongreso ng Pagkakaisa ng Maralitang Lungsod (KPML), sa pagdiriwang ng National Press Freedom Day tuwing Agosto 30 bilang parangal sa ating bayaning si Gat Marcelo H. Del Pilar, at sa iba pang mga mamamahayag na tumangan ng panulat upang ilantad ang katotohanan.

Kaya ngayong National Press Freedom Day, ipinahahayag nating tayo’y naninindigang dapat magbalita ng tumpak at totoo, lalabanan ang anumang halibyong o fake news, at ang bantang historical distortion o pagbabago ng kasaysayan. Mabuhay ang kalayaan sa pamamahayag at ang pagbabalita ng katotohanan! Labanan ang mga fake news!

Lunes, Agosto 29, 2022

Pahayag ng KPML hinggil sa Matagumpay na Nagsabado sa Pasig

PAHAYAG NG KPML HINGGIL SA MATAGUMPAY NA NAGSABADO SA PASIG
Agosto 29, 2022

Malugod at taas-kamaong nakikiisa ang Kongreso ng Pagkakaisa ng Maralitang Lungsod (KPML) sa paggunita ng matagumpay na Nagsabado sa Pasig. Ang Agosto 1896 ay itinuturing na “Birth of the Nation” (o Pagkasilang ng Bansa) mula nang punitin ng mga rebolusyonaryong pinamunuan ni Gat Andres Bonifacio, ang kanilang sedula. 

Tuwing ika-29 ng Agosto, inaalala ng mga Pasigueño ang Nagsabado sa Pasig. Noong Agosto 29, 1896, halos 2,000 Pasigueño ang nagmartsa papunta sa Plaza (Plaza Rizal ngayon) at napagtagumpayang makuha ang kuta ng mga guardiya sibil. Ayon sa pananaliksik, takipsilim ng Agosto 29, 1896, habang inihahanda ni Bonifacio ang kanyang mga tauhan sa pagsalakay sa Mandaluyong, ang mga anak ng Pasig na pinamumunuan ni Valentin Cruz ay sumalakay naman sa detatsment ng mga Espanyol sa Pasig. Inilarawan ng istoryador ng Pasig na si Dean Carlos Tech ang mga pangyayari tulad ng sumusunod: 

"Gabi ng Agosto 29, ang mamamayan mula sa mga kanayunan ng Pasig na Pineda, Bagong Ilog at Ugong ay tumawid sa Ilog San Mateo hanggang Maybunga, kung saan sila ay nagsanib-puwersa mula sa Santolan, Rosario, Maybunga, Palatiw, Sagad, Poblacion, Pinagbuhatan, Bambang, Kalawaan, Buting at iba pang nayon ng Pasig. Pagkatapos ng ilang huling tagubilin sa labanan, sa determinasyon nilang ipaglaban ang Kalayaan, sa pamumuno ni Heneral Valentin Cruz, ay nagmartsa sa pagsalakay ang magigiting na mga anak ng Pasig, armado ng karit, gulok, sibat, at ilang baril. Ang taong-bayan, na animo’y nasa pista, ay naglipana sa mga lansangan, na pinagbubunyi ang kanilang mga bayani. Nasa 2,000 silang kumakatawan sa bawat pamilya ng Pasig, mula sa lahat ng antas ng lipunan, sa pagpapakita ng pagkakaisa laban sa paniniil. Sinalakay nila ang Tribunal at ang punong-tanggapan ng Guardia Civil, sa ngayon ay tirahan ng Guanio, at nakakumpiska ng 17 ripleng de piston at tatlong Remington. Ang kumander ng Guardia Civil na si Manuel Sityar  ay nagtago sa tore ng simbahan. Ito ay isang mapagpalang gabi para sa Pasig at ang buong bayan ay nagalak sa unang tagumpay ng rebolusyon na naaalala ng matatanda bilang ''Nagsabado.''

Mabuhay ang Matagumpay na Nagsabado sa Pasig noong 1896!

Taas-kamaong nagpupugay ang KPML sa mga rebolusyonaryong Pilipino noong itinatag ang bansa ng Agosto 1896!

Pahayag ng KPML sa National Heroes' Day

PAHAYAG NG KPML SA NATIONAL HEROES’ DAY
Agosto 29, 2022

MABUHAY ANG ATING MGA BAYANI TULAD NINA GAT ANDRES BONIFACIO, MACARIO SAKAY, AT KA EDDIE GUAZON!

Mahigpit na nakikiisa ang Kongreso ng Pagkakaisa ng Maralitang Lungsod (KPML) sa pagdiriwang ng National Heroes’ Day (Pambansang Araw ng mga Bayani) tuwing huling Lunes ng Agosto. 

Ayon sa pananaliksik, Noong 1952, ibinalik ni Pangulong Elpidio Quirino ang petsa ng National Heroes Day pabalik sa huling Linggo ng Agosto. Pinagtibay ito ng Administrative Code ni Pangulong Corazon C. Aquino ng 1987 sa Executive Order No. 292, Book 1, Chapter 7, na naglaan ng listahan ng mga regular holiday at nationwide special days, na nagtatakda ng National Heroes Day bilang isang regular holiday na ipinagdiriwang sa huling Linggo ng Agosto. Noong Hulyo 24, 2007, nilagdaan ni Pangulong Gloria Macapagal-Arroyo bilang batas ang Batas Republika (RA) Blg. 9492, na nag-amyendahan sa Book 1, Chapter 7 ng Administrative Code. Sa bisa ng R.A. 9492, ang pagdiriwang ng Pambansang Araw ng mga Bayani sa gayon ay pumapatak sa huling Lunes ng Agosto. Ang katwiran sa likod ng hakbang ay ang programang "Holiday Economics" ni Pangulong Arroyo, na naglalayong bawasan ang mga pagkagambala sa trabaho sa pamamagitan ng paglipat ng mga pista opisyal sa pinakamalapit na Lunes o Biyernes ng linggo, upang magbigay-daan para sa mas mahabang bakasyon, paglilibang at turismo.

Sa aming mga maralita, inaalala din namin ang mga bayani ng aming sektor. Isa na rito si Ka Eddie Guazon, ang unang pangulo ng KPML, na namatay sa loob ng Senado habang ipinagtatanggol ang mga maralita mula sa demolisyon. Siya'y inatake sa puso habang nakikipagdebate sa loob ng Senado noong Mayo 19, 1989. Si Ka Eddie Guazon, na nagsabing "Ang pabahay ay karapatan ninuman kahit siya pa ay maralita," ay bayani ng mga maralita, kaya nararapat lang gunitain. Ang kanyang buhay at mga aral ay buhay na buhay sa puso't diwa ng mga tulad naming maralita.

Kaya ngayong National Heroes Day, hindi lamang ang mga kilalang bayani sa kasaysayan, tulad nina Gat Jose Rizal, Gat Andres Bonifacio, Gat Emilio Jacinto, at Gat Macario Sakay, ang dapat nating gunitain, kundi ang mga bayaning tulad nina Ka Eddie Guazon, na sa kanilang panahon ay nakipaglaban at kinamatayan ang paglaban para sa kapakanan ng mga maralita.

Lunes, Agosto 22, 2022

Pahayag ng KPML sa ikalimang taon ng pagkapaslang kay Kian Delos Santos

PAHAYAG NG KPML SA IKALIMANG TAON NG PAGPASLANG KAY KIAN DELOS SANTOS
Agosto 22, 2022

ANG PAGHUKAY MULI KAY KIAN AY PAGHAHANAP NG KATOTOHANAN!
KATARUNGAN KAY KIAN DELOS SANTOS!

Sa ikalimang taon ng pagkapaslang kay Kian Delos Santos, muling hinukay ang kanyang mga buto upang malaman ang katotohanan. Ang kanyang labi ay hinukay para sa autopsy nitong Agosto 15, 2022, bisperas ng ikalimang anibersaryo ng kanyang kamatayan, habang sinisikap ng kanyang pamilya na malaman ang higit pa tungkol sa kanyang pagkamatay at panagutin ang iba.

Ang high school student na si Kian Delos Santos ay 17 taong gulang nang barilin siya ng mga pulis sa isang akto na sinabi nilang pagtatanggol sa sarili.
Ngunit ang nakuhang video footage ay sumasalungat sa opisyal na ulat ng pulisya, na nagdulot ng malaking galit ng publiko laban sa madugong kampanyang kontra droga ni dating Pangulong Rodrigo Duterte.

Sinabi ni Randy Delos Santos, tiyuhin ng biktima, sa mga mamamahayag sa paghukay sa isang sementeryo sa Maynila noong Lunes na ang bangkay ay ipapa-autopsy sa isang forensic pathologist bilang paghamon ang opisyal na salaysay kung paano napatay ang mga taong tulad ni Delos Santos noong kampanyang War on Drugs. “Nagsasalita pa rin ang mga buto. Pagkatapos ng limang taon, tingnan natin kung makakatuklas pa tayo ng higit pang katotohanan,” (salin ng KPML mula sa Ingles), ang sabi pa ni Mang Randy, at idinagdag na isinusulong ng pamilya na mas maraming tao ang maparusahan sa pagkamatay ng kanyang pamangkin, nang hindi pinangalanan. Na

Ang mga opisyal na rekord ay nagpapakita na ang mga pulis ay pumatay ng 6,252 katao sa panahon ng crackdown kasunod ng halalan ni Duterte noong 2016, lahat ay sa pagtatanggol sa sarili. Sinasabi ng mga grupo ng mga karapatan na pinatay ng pulisya ang mga suspek sa droga sa napakalaking sukat, na itinanggi ng pulisya, at ang libu-libong mahiwagang pagpatay sa kalye ay hindi kasama sa tally.

"Kung talagang gumagana ang sistema ng hustisya, dapat marami ang maparusahan (salin ng KPML mula sa Ingles)," sabi ni Randy Delos Santos, at idinagdag na marami pang ibang kaso na sumasalungat sa mga pahayag ng gobyerno na nanlaban ang mga biktima.

Kami sa Kongreso ng Pagkakaisa ng Maralitang Lungsod (KPML) ay mahigpit na nakikiisa sa pamilya Delos Santos sa paghahanap ng katotohanan at mapanagot, di lamang ang mga maysala, kundi ang utak ng ganitong mga karumal-dumal na krimen.

Pinaghalawan ng datos:
https://www.rappler.com/nation/video-kian-delos-santos-digging-for-truth/
https://interaksyon.philstar.com/politics-issues/2022/08/16/225297/kian-delos-santos-body-exhumed-in-fresh-push-for-drug-war-justice/

Pahayag ng KPML sa Buwan ng Wika

PAHAYAG NG KPML SA BUWAN NG WIKA
Agosto 22, 2022

KILALANIN SI ASEDILLO, BUKOD KAY QUEZON, BILANG BAYANI NG WIKANG PAMBANSA

Mahigit na nakikiisa ang Kongreso ng Pagkakaisa ng Maralitang Lungsod (KPML) sa pagdiriwang ng Buwan ng Wika. Ang wikang Filipino ang siyang wika, di lamang sa pambansa, kundi ng karaniwang tao, ng manggagawa, ng maralita. Ang paggamit nito sa talastasan at sa mga pahayagan, tulad ng Taliba ng Maralita, na opisyal na publikasyon ng KPML, ay sanhi upang magkaunawaan at magkaisa tayo tungo sa ating pinapangarap na isang lipunang makatao at maunlad na kasama ang lahat.

Nitong nakaraang Agosto 19, na siyang kaarawan ng Ama ng Wikang Pambansa na si dating Pangulong Manuel Luis Quezon, ay ipinagdiwang din sa iba't ibang panig ng bansa, lalo na sa mga paaralan. Subalit bago pa maging tagapagtanggol at maging Ama ng Wikang Pambansa si Manuel L. Quezon, may isa nang kilalang guro sa kasaysayan ang unang nagtanggol sa sariling wika, at siya si Teodoro Asedillo. Ang kanyang buhay ay isinapelikula at ginampanan ng ating Pambansang Alagad ng Sining na si Fernando Poe Jr.

Ayon sa pananaliksik, labing-isang taon naglingkod bilang guro si Maestro Asedillo sa mababang paaralan ng Longos sa lalawigan ng Laguna, mula taong 1910 hanggang 1921. Bilang guro, itinuro niya ang lahat ng aralin sa maghapong pagpasok sa klase ng mga mag-aaral sa elementarya. Siya’y naangat bilang head teacher ngunit nagpatuloy siyang nagturo sa mga batang nasa ikatlo at ikaapat na baytang. Kilala siya sa kahusayan sa pagtuturo. Isang disiplinaryan, ayaw niya sa mga estudyanteng nagbubulakbol, di nagsisikap matuto, at nagsasayang lang ng oras.

Nang panahong iyong sakop ng Amerika ang bansa, ipinagbawal ang paggamit ng sariling wika sa pagtuturo, at yaong gumagamit nito'y pinarurusahan. Isa sa pinagtuunan ng pansin ng mga Amerikanong kolonisador ay ang Department of Public Instruction (DPI) sa kanilang kampanya ng pasipikasyon (pwersahang pagpayapa) at asimilasyon (sapilitang pagpapalunok sa atin ng sarili nilang kultura). Sa pamamagitan ng Philippine Commission Act No. 74 (Enero 1901), iniatas ni Gobernador-Heneral Elwell Otis ang mga sumusunod na polisiya: (1) sentralisadong sistema ng batayang edukasyon; (2) paggamit sa Ingles bilang wikang panturo at komunikasyon; at (3) pagtatatag ng isang kolehiyong normal para sa maramihang pagsasanay ng magiging mga guro.

Ang mga pangyayari at kalagayang ito ang nagtulak sa unang paghihimagsik ni Asedillo. Pinili niyang gamitin ang wikang Pilipino sa halip na wikang Ingles. Iminulat niya ang mga mag-aaral sa kagitingan at aral ng mga bayaning Pilipino, habang tinuruan din niya ang mga mag-aaral ng awiting makabayan. Hindi rin niya ginamit ang mga aklat na sinulat ng mga dayuhang awtor. Dahil dito, siya’y kinasuhan ng insubordinasyon o pagsuway sa kautusan ng kagawaran noong 1923. Ipinagtanggol niya ang sarili at ikinatwirang hindi dapat ipilit sa mga batang Pilipino ang kulturang banyaga sa kanilang karanasan at pang-unawa. Ngunit siya’y natalo at natanggal sa pagtuturo. Ang pamilyang Asedillo ay naghirap ng husto.

Anong saklap na pangyayari! Nang dahil sa pagtatanggol sa sariling wika na dapat gamitin sa pagtuturo, siya pa ang natanggal. Hanggang sa si Asedillo'y mawala sa pagkaguro at naghanap ng ibang trabaho, bilang sakada, bilang pulis, hanggang maging manghihimagsik. 

Sa ganitong punto, kami sa KPML ay nakikiisa sa panawagang dapat kilalaning bayani ng sariling wika si Teodoro Asedillo. Na sana'y may maipasang panukalang batas sa Kongreso at Senado, hanggang maging batas ang pagkilala kay Asedillo bilang tagapagtanggol at Bayani ng Wikang Pambansa.

Pinaghalawan ng datos:
Mula sa https://www.facebook.com/IRESManila/photos/a.498880233873326/519106188517397/?type=3
https://teodoroasedillo.blogspot.com/2016/04/si-teodoro-asedillo-bilang-bayani-ng.html?view=classic

Lunes, Agosto 15, 2022

Pagpupugay sa ika-25 anibersaryo ng Martsa ng Tagumpay ng mga Maralita ng Sitio Mendez

PAHAYAG NG KPML
Agosto 15, 2022

PAGPUPUGAY SA IKA-25 ANIBERSARYO NG MARTSA NG TAGUMPAY NG MGA MARALITA NG SITIO MENDEZ

Taas-kamaong nagpupugay ang Kongreso ng Pagkakaisa ng Maralitang Lungsod (KPML) sa ikadalawampu't limang anibersaryo ng tagumpay ng mga maralita ng Sitio Mendez sa Baesa, Lungsod ng Quezon.

Noong Hulyo 1997, madaling araw ay nademolis ang kabahayan ng may halos 500 pamilya ng maralita sa ASAMBA, (Alyansa ng mga Samahan sa Sitio Mendez, Baesa Homeowners Association). Ang lupain ay pag-aari ng mayamang angkang Araneta. Durog ang mga kabahayan ng maralita sa tinatayang 1.4 ektaryang lupain. Dahil doon, ang mga maralita ay nagmartsa patungo sa Quezon City Hall upang kondenahin ang marahas na demolisyon sa kanilang komunidad. Nagkampo sila ng halos isang buwan sa Quezon City Hall. Maraming tumulong sa laban ng maralita, tulad ng KPML sa pamumuno ni Ka Roger Borromeo, SANLAKAS sa pangunguna ni Tita Flor Santos, Bukluran ng Manggagawang Pilipino (BMP), Zone One Tondo Organization (ZOTO) sa pamumuno ni Ka Lydia Ela, ang artistang Konsehal Anthony Alonzo, at marami pang iba. 

Ang pagkilos na iyon ay tumanggap ng malawakang multi-sektoral at internasyonal na suporta, na nagresulta sa kanilang pagbabalik sa Sitio Mendez at ang pagsasakatuparan ng proyekto ng panlipunang pabahay ng lungsod. Sa pamumuno ni Mayor Ismael Mathay, at mga lider-maralita, ay napagkasunduang bilhin ng pamahalaang lungsod ang lupa para sa kanilang programang socialized housing.

Noong Agosto 15, 1997, matapos ang halos isang buwan, ay inilunsad ng mga maralita ng ASAMBA, sa pamumuno ni Ka Linda Sapiandante, ang halos anim-na-kilometrong makasaysayang "Martsa ng Tagumpay" bilang simbolikong pagbabalik sa kanilang lugar. Muling naitayo ang kanilang mga bahay at pamumuhay sa lugar. Tinulungan din sila ng internasyunal na grupong HABITAT for Humanity sa pagsasaayos ng kanilang mga bagong bahay. Ang pagkilos nila’y patunay na sa pagkakaisa at sama-samang pagkilos ay matatamo ang tagumpay. 

Sa ngayon ay makikita ang KPML street, Sanlakas street, BMP street, at iba pa, sa loob ng komunidad ng ASAMBA. Ang naganap na pagpapaunlad sa lugar ay halimbawa ng on-site, in-city resettlement. Ang aral nito’y aming ginugunita at binibigay na halimbawa sa ibang maralitang walang katiyakan sa paninirahan at may bantang demolisyon.