Monday, August 25, 2014

Sigaw sa Mendiola at Luneta: Pork Abolition, Hindi Term Extension, Hindi ChaCha!

Sigaw sa Mendiola at Luneta: Pork Abolition, Hindi Term Extension, Hindi ChaCha!

Agosto 25, 2014 - Madaling araw pa lang ng Lunes ay nasa Mendiola na ang mga kasapi ng SANLAKAS, Bukluran ng Manggagawang Pilipino, Kongreso ng Pagkakaisa ng mga Maralita ng Lungsod (KPML), Metro Manila Vendors Alliance (MMVA), Zone One Tondo Organization (ZOTO), Piglas-Kabataan, at Teatro Proletaryo. Bandang ikapito ng umaga ay dumating naman ang Partido Lakas ng Masa (PLM), UP KAISA, at iba pa.

Sa saliw ng ChaCha, at ng awiting "Kung alam mo lang, Bayan" (rendisyon ng awiting "Kung Alam Mo Lang, Violy" ni Gary Granada), nagsayaw ang mga kasapi ng Teatro Proletaryo sa Mendiola, bandang ikaanim ng umaga. Ito'y bahagi ng kanilang protesta laban sa pork barrel at term extension na balak ni Pangulong Noynoy Aquino kaya nais nitong magkaroon ng ChaCha o Charter Change.

Bandang ikasiyam ng umaga ay nagmartsa na sila patungo sa Quirino Grandstand upang makiisa sa mas malawak na pagtitipon ng sambayanan. Idinaos sa Luneta ang aktibidad na "Stand Up! Sign Up!" o "Manindigan at Lumagda" laban sa pakanang term extension ng pamahalaang Aquino.

Ulat at mga litrato ni Greg Bituin Jr.

Thursday, August 21, 2014

Noynoy, Pinayuhang Tularan ang Bayaning si Ninoy, hindi ang diktador na si Marcos

Noynoy, Pinayuhang Tularan ang Bayaning si Ninoy, hindi ang diktador na si Marcos

Kasabay ng ika-31 anibersaryo ng pagpaslang kay dating Senador Ninoy Aquino, nag-alay ng bulaklak sa monumento ni Ninoy sa Quezon Avenue, corner Timog Ave., ang mga kasapi ng Bukluran ng Manggagawang Pilipino (BMP), SANLAKAS, Kongreso ng Pagkakaisa ng mga Maralita ng Lungsod (KPML), Partido Lakas ng Masa (PLM), Piglas-Kabataan (PK), at Teatro Proletaryo. Dito'y pinuri nila ang kabayanihan ni Ninoy dahil sa kanyang malaking ambag laban sa diktaduryang Marcos. Kasabay nito'y kinutya naman ng nasabing mga grupo ang balak ng anak ni Ninoy na si Pangulong Noynoy Aquino na amyendahan ang Saligang Batas at palawigin ang kanyang termino sa pagkapangulo.

Nagpahayag naman ang dalawang beterano ng martial law na sina Tita Flor Santos ng Sanlakas, at Nick Elman ng Workers Alliance Against Corruption. Si Gie Relova, sec gen ng BMP-NCRR, ang siyang tagapagpadaloy ng programa. Inawit naman ng Teatro Proletaryo, na may saliw na sayaw, ang kanilang bersyon ng "Kung alam mo lang, Violy" ni Gary Granada, na pinamagatan nilang "Kung alam mo lang, Ninoy".

Matapos ang programa sa munumento ni Ninoy ay nagmartsa na ang nasabing mga grupo patungo sa Times Street, kung saan naroon ang bahay ni PNoy. May harang na sa kalsadang papasok ng Times Street kaya doon na lamang nagprograma ang nasabing mga grupo. At muli ay ipinalabas ng Teatro Proletaryo ang kanilang sayaw at awiting "Kung alam mo lang, Ninoy". Naging tagapagsalita sa programa sina Ka Ronnie Luna ng BMP, at Rasti Delizo ng Sanlakas.

Ulat at mga litrato ni Greg Bituin Jr.

Saturday, August 16, 2014

KPML-NCRR, sumama sa pagkilos laban sa kumpanyang Glencore

KPML-NCRR, SUMAMA SA PAGKILOS LABAN SA KUMPANYANG GLENCORE

"Gllencore: World-Class Human Rights Abuser!" Ito ang sigaw ng mga manggagawa, maralita at CSOs sa naganap na rali sa harap ng tanggapan ng Glencore sa Ortigas. Ito'y bilang paggunita sa naganap na masaker ng 34 na minero noong Agosto 16, 2012 sa Lonmin Mining Property sa Marikana, South Africa. Hinihiling ng mga minero na itaas ang kanilang sahod ngunit ang natanggap nila'y punglo, kamatayan.

Ang Lonmin Mining Property ng South Africa ay pag-aari ng kumpanyang Glencore, na siya rin umanong may-ari ng Sagittarius Mines sa Tampakan, South Cotabato dito sa bansa. May masaker ding nangyari sa Tampakan dahil sa mariing pagtutol ng mga katutubo sa pagmiminsa sa kanilang lugar. Ang nangyaring iyon sa Marikana ay naging isang dokumentaryong pinamagatang "Miners Shot Down" na ipinalabas na sa maraming bansa, at ipinalabas din dito sa Pilipinas noong Agosto 13, 2014. Iniugnay rin ang nangyaring iyon sa naganap na masaker sa Tampakan sa South Cotabato noong Oktubre 2012, kung saan pinaslang ang pamilyang Kapeon na tutol sa pagmimina sa kanilang lugar.

Pinangunahan ang nasabing pagkilos ng mga grupong Alyansa Tigil Mina (ATM), Philippine Miserior Partnership Inc (PMPI), SENTRO, Task Force Detainees of the Philippines (TFDP), Lilak, Focus on the Global South, Philippine Movement for Climate Justice (PMCJ), at Kongreso ng Pagkakaisa ng Maralitang Lungsod (KPML).

Ang tagapagpadaloy ng programa ay si Primo Murillo ng PMPI, at ang mga naging tagapagsalita ay sina Jaybee Garganera ng ATM, Fr. Oli Castro ng PMPI, Jun Santos ng SENTRO, Anthony Barnedo ng KPML, at Egay Cabalitan ng TFDP. Nang matapos ang programa, dinala ng mga tagapagsalita ang kanilang award sa ika-22 palapag, kung saan nag-oopisina ang Glencore dito sa Pilipinas.

Ang Agosto 16 ng bawat taon ay idineklarang Global Day of Remembrance (Pandaigdigang Araw ng Paggunita) sa mga pinaslang na manggagawa sa Marikana. Maglulunsad din ng film showing at pagkilos sa Tampakan, South Cotabato sa araw na ito, na pangungunahan ng Social Action Center (SAC) ng Diocese of Marbel.

Ulat at mga litrato ni Greg Bituin Jr.