Biyernes, Hunyo 27, 2014

Price control sa bawang, bigas, atbp., hiniling ng maralita

PRICE CONTROL SA BAWANG, BIGAS, ATBP., HILING NG MARALITA

Hunyo 27, 2014 - Mula sa Quinta Market sa Quiapo sa Maynila, nagmartsa ang mga maralita patungong Mendiola upang kondenahin ang kawalang-aksyon ng pamahalaan sa patuloy na pagtaas ng presyo ng pangunahing mga bilihin, partikular ang bawang. Ang isang kilong bawang ay pumalo na sa halagang P400 kada kilo, habang sa ibang palengke ay nasa P300 kada kilo. Noong Mayo 2014, ito'y nasa halagang P60-P70 lamang ang bawat kilong bawang, kaya higit apat na beses ang itinaas ng presyo ng bawang.

"Dapat kontrolin ng pamahalaan ang presyo ng mga pangunahing bilihin, tulad ng bawang, bigas, luya, atbp., ngunit walang magawa si PNoy, gayong kaya namang gawin ng pamahalaan na pigilan ang pagtataas ng presyong ito. Dahil sa pagyakap ng gobyerno sa sistemang liberalisasyon, pinabayaan na nila sa mga negosyante ang pagtatakda ng presyo ng mga bilihin. At dahil sa kagustuhan nilang tumubo, nagmahal ang bawang, luya, bigas, atbp., habang nahihirapan naman ang mga maralita," ayon kay Anthony Barnedo, secretary general ng KPML-NCRR (Kongreso ng Pagkakaisa ng mga Maralita ng Lungsod - National Capital Region chapter).

Ulat at mga litrato ni Greg Bituin Jr.

Lunes, Hunyo 23, 2014

Mga maralitang ina, nanawagan ng price control sa bigas, bawang, atbp.

MGA MARALITANG INA, NANAWAGAN NG PRICE CONTROL SA BIGAS, BAWANG, ATBP.

Hunyo 22, 2014 - Nagrali kaninang umaga sa palengke ng Balintawak ang may limampung kasapian ng Kongreso ng Pagkakaisa ng mga Maralita ng Lungsod (KPML) at Samahan ng Mamamayan - Zone One Tondo Organization (SM-ZOTO) dahil sa pagsirit ng presyo ng mga pangunahing bilihin, tulad ng bawang at bigas.

Kinalampag ng mga maralitang nanay ang mga dala nilang kaldero't kawali na may mga islogang "Price Control sa Bigas, Bawang, atbp., Now na!", "Liberalisasyon, Salot!" at "Modernisasyon sa Agrikultura, Gawing Prayoridad!"

Ayon kay Geilda Mirabueno, lider ng SM-ZOTO sa Tondo at inang may siyam na anak, "Hindi sapat ang ginawang Bawang Caravan ng pamahalaan, dahil di lang naman bawang ang nagmahal."

Sinabi naman ni Anna Lampitoc, isang lider ng KPML at isang solo parent, "Walang kwenta kung pagmomonitor lang ng presyo ng bilihin ang kayang gawin ng pamahalaan. Kailangang kontrolin ng pamahalaan ang presyo dahil ito'y isang kagyat at pambansang isyu. Hangga't pinaiiral ng pamahalaan ang polisiyang liberalisasyon, hindi tayo magkakaroon ng totoong food security. Para makaalpas dito, dapat iprayoridad ang agrikultura upang di umasa ang bansa sa importasyon."

Nagsagawa sila ng isang oras na programa sa palengke ng Balintawak, nag-noise barrage at nag-ikot sa loob ng palengke.

Ulat at mga litrato ni Greg Bituin Jr.
 

Biyernes, Hunyo 13, 2014

6.12.14 Protesta laban sa pork at bulok na sistema, inilunsad

6.12.14 PROTESTA LABAN SA PORK AT BULOK NA SISTEMA, INILUNSAD

Araw daw ng kalayaan kaya itinaon ang pagkilos ng Koalisyong Protesta 6.12.14  sa araw na iyon (Hunyo 12, 2014) upang ipakita ang pagkadismaya ng taumbayan sa animo'y sarswelang nagaganap sa pamahalaan, lalo na sa isyu ng pork barrel. Nais nilang lumaya na ang bayan mula sa paghahari ng iilan, pandaraya ng mga trapo, at pandarambong ng mga kawatan sa pamahalaan sa kaban ng bayan. Araw daw ng kalayaan, ngunit sa katunayan, batay sa kasaysayan, ang Hunyo 12, 1898 ay deklarasyon ng kalayaan ng bansa mula sa mga Kastila ngunit pagpapailalim sa mga Amerikano, na makikita mismo sa Acta de Independencia - isang dokumento ng deklarasyon ng kalayaan. Kung pagpapailalim ito sa mga Amerikano, ito ba'y kalayaan? O mas angkop na tawagin itong Araw ng Kadayaan, dahil hindi naman talaga lumaya ang bansa, kundi lumaya lang sa España para pasakop sa mga Kano? Ayon nga sa pamagat ng polyetong ipinamahagi roon ng Bukluran ng Manggagawang Pilipino (BMP): "Walang Tunay na Kalayaan Kung Malayang Pinagsasamantalahan ng Iilan ang Nakararaming Mamamayan".

Maraming mga indibidwal at mga grupo ang nagsitungo sa Bonifacio Shrine sa Mehan Garden sa Maynila bilang pakikiisa sa panawagang "Jail All" - o ikulong lahat ng mga sangkot sa pork barrel scam, sila man ay oposisyon o maka-administrasyon. Sa likod ng Bonifacio Shrine ay naroon naman ang Kartilya ng Katipunan na nakaukit sa pader sa malalaking titik na sumisimbolo naman na dapat yakapin ng taumbayan ang Kartilyang ito ng kalinisan ng pagkatao. Naniniwala ang iba't ibang grupong ito na dapat ikulong lahat ng sangkot sa pork barrel scam dahil malaki ang kasalanan nila sa mamamayan lalo na sa pagnanakaw sa kaban ng bayan ng bilyon-bilyong piso para sa kanilang mga sarili.

Napakahaba ng martsa at sama-samang pagkilos ng grupong BMP, Sanlakas, Kongreso ng Pagkakaisa ng mga Maralita ng Lungsod (KPML), Partido Lakas ng Masa (PLM), Alliance for Truth, Integrity and Nationalism (ATIN), Zone One Tondo Organization (ZOTO), Aniban ng Manggagawa sa Agrikultura (AMA), Pagkakaisa ng Manggagawa sa Transportasyon (PMT), Piglas-Kabataan (PK), SUPER-Federation, Makabayan-Pilipinas, Koalisyon Pabahay ng Pilipinas (KPP), Ang Grupo ng Organisadong Mamamayan (AGOM), at Proletaryong Rebolusyonaryong Kilusan (PRK). Nakasama nila sa Bonifacio Shrine ang mga grupong Kilusang KontraPork, Workers Alliance Against Corruption (WAAC), NAGKAISA, Freedom from Debt Coalition (FDC), Water for All Refund Movement (WARM), APL-SENTRO, Partido ng Manggagawa (PM), at marami pang iba. Ang estimasyon ay mga nasa humigit-kumulang sa apatnalibo ang lumahok sa makasaysayang pagkilos na ito.

Kita sa kanilang mga plakard ang mga panawagang "Ibasura ang sistemang pork, wakasan ang paghahari ng trapo", "Itayo ang gobyerno ng masa", "Ikulong lahat", "Panagutin si PNoy", "Noynoy, inutil, tuta ng kapitalista", "Panagutin si Noynoy, parusahan ang lahat", "Elitistang rehimen, itakwil", "Manggagawa, magkaisa at lumaban", "Parusahan ang mga magnanakaw sa gobyerno", at "JAIL ALL!" Sa polyeto naman ng BMP ay mababasa ang panawagang "Imbestigahan, Litisin at Ikulong LAHAT ng Kawatan (hindi lang si Pogi, Sexy at Tanda)".

Nagsalita naman sa entablado sina Ricardo "Dick" Penson ng ATIN, Atty. Aaron Pedrosa ng Sanlakas, Ka Leody de Guzman ng BMP, at marami pang iba. Nagsiawit naman sina Eli Buendia, Jograd dela Torre, Erwin Puhawan, at iba pa.

Adhika ng mga grupong ito at ng mga naging tagapagsalita na sumapit ang totoong kalayaan ng bayan, kung saan hindi na umiiral ang "Kasaganahan sa Iilan, Kahirapan sa Mamamayan".

Ulat at mga litrato ni Greg Bituin Jr.