Pahayag ng KPML sa International Day for the Eradication of Poverty

PAHAYAG NG KPML SA INTERNATIONAL DAY FOR THE ERADICATION OF POVERTY

Oktubre 17, 2022

MALULUTAS ANG KAHIRAPAN KUNG MAGKAKAISA 

ANG DUKHA'T URING MANGGAGAWA UPANG ITAYO 

ANG ISANG LIPUNANG MAKATAO, SISTEMANG 

PANTAY, AT MAY PAGPAPAHALAGA SA LAHAT!

NEOLIBERALISMO, WAKASAN! BAGUHIN ANG SISTEMA!

Mahigpit na nakikiisa ang Kongreso ng Pagkakaisa ng Maralitang Lungsod (KPML) sa paggunita sa International Day for the Eradication of Poverty o Pandaigdigang Araw Upang Pawiin ang Kahirapan tuwing Oktubre 17.

Bakit may ganitong araw? Ang International Day for the Eradication of Poverty ay isang internasyonal na pag-alala bawat taon tuwing Oktubre 17 sa buong mundo. Ang unang paggunita, ang "World Day to Overcome Poverty" ay naganap sa Paris, France, noong 1987 nang 100,000 katao ay nagtipon sa Human Rights and Liberties Plaza sa Trocadéro upang parangalan ang mga biktima ng kahirapan, gutom, karahasan, at takot sa pagpapasinaya ng isang paggunitang bato ni Joseph Wresinski, tagapagtatag ng International Movement ATD Fourth World. Noong 1992, apat na taon pagkatapos ng kamatayan ni Wresinski, opisyal na itinalaga ng United Nations ang Oktubre 17 bilang International Day for the Eradication of Poverty.

Mas maraming Pilipino ang mahihirap ngayong 2022 kumpara noong 2018, ayon sa pinakahuling opisyal na datos na inilabas ng Philippine Statistics Authority (PSA). Sa pagbanggit sa Family Income and Expenditure Survey nito, sinabi ng PSA na ang bansa ay mayroong 19.99 milyong indibidwal na nabubuhay sa ilalim ng poverty threshold. Ito ay kumakatawan sa 18.1 porsyento ng populasyon. Noong 2018, mayroong 17.67 milyong mahihirap na Pilipino. Samantala, tumaas ng 1.01 milyon ang bilang ng mga “mahihirap sa pagkain”. Iniulat din ng PSA ang 7.8 porsiyentong unemployment rate, na katumbas ng 3.71 milyong Pilipinong walang trabaho.

Sapat ba ang ayuda sa mga mahihirap? O dapat baguhin ang lipunan upang wala nang naghihirap? Tandaan natin ang sinabi ni Obispo Helder Câmara nang minsan niyang sinabi sa kanyang pangangaral, "Kapag nagbibigay ako ng pagkain sa mahihirap, tinatawag nila akong santo. Kapag tinanong ko kung bakit sila mahirap, tinatawag nila akong komunista." Bakit nga ba ganito?

Huwag tayong pumayag na nais lang ng mga mayayaman na maglimos sa mga mahihirap upang makarating daw sila sa langit, kundi dapat mawala ang pagkakahati ng tao sa iilang mayaman at laksang mahihirap. Hindi natin kailangan ng limos lalo't ginagamit lang ng mayayamang pulitiko ang mga mahihirap para sa kanilang ganansya sa pulitika. Ang dapat ay pag-aralan natin ang lipunan, at durugin ang dahilan kung bakit may ilang mayayaman at laksa-laksa ang mahihirap. Dapat nang baguhin ang ganitong bulok na sistema!

Kaya kami sa KPML ay nakikiisa sa lahat ng marginalized sector o saray ng sagigilid, laluna sa uring manggagawa, sa kanilang pagkilos laban sa bulok na sistemang nagdulot ng kaapihan at pagsasamantala ng tao sa tao. Dapat nang baguhin ang sistemang nagsulot ng lalo't lalong kahirapan sa mamamayan. Dapat nang itayo ang isang lipunang makatao na may pagkakapantay at hustisyang lipunan!

Pinaghalawan:

https://www.un.org/en/observances/day-for-eradicating-poverty

https://en.wikipedia.org/wiki/International_Day_for_the_Eradication_of_Poverty

https://thediplomat.com/2022/09/making-sense-of-the-philippines-latest-poverty-statistics/