Miyerkules, Hulyo 22, 2009

Opisina ni Mr. Con Ass, Binato ng Kamatis

PRESS RELEASE
Hulyo 22, 2009

OPISINA NI MR. CON ASS, BINATO NG MARALITA NG KAMATIS

Matapos ang matagumpay na paglulunsad ng rali sa opisina ni Miss Con Ass Rep. Mitch Cajayon ng Dist. 2 Caloocan City noong Hulyo 21, nirahilan naman ng mga maralita ang tanggapan ni Mr. Con Ass Malabon-Navotas Rep. Alvin Sandoval na nasa 20 A Bonifacio St., Tugatog, Malabon City. Ito'y pinangunahan ng Kongreso ng Pagkakaisa ng mga Maralita ng Lunsod (KPML) at Zone One Tondo Organization (ZOTO). May maralitang nakasuot ng boxing belt at sash na nakasulat ang Mr. Con Ass, at sa paligid ng sash ay may mga nakabiting maraming paper money. Binato ito ng mga maralita ng bulok na kamatis bilang simbolo ng kanilang pagkadismaya sa pagpirma ng mga kongresista, lalo na ng kanilang kongresistang si Rep. Sandoval, sa HR 1109.

Ang aktibidad na ito'y bahagi ng shame campaign ng iba't ibang organisasyon upang kondenahin ang pagpirma ng maraming kongresista sa HR 1109 na naglalayong baguhin ang Saligang Batas sa pamamagitan ng Constituent Assembly.

Ayon kay Gng. Celia Taripe, pangulo ng Zone One Tondo Organization (ZOTO) - Navotas Chapter, "Hindi kami titigil hangga't hindi binabawi ng mga kongresista ang kanilang pagpirma sa Con Ass pagkat nakasalalay dito ang pagkawasak ng ating bansa. Balak nilang tanggalin na ang mga proteksyong pang-ekonomyang nakasaad sa Konstitusyon, lalo na't nais ng mga kongresistang ariin ng mga dayuhan ng 100% ang ating mga lupa, kasama na ang media, ospital, eskwelahan, at iba pang serbisyo para sa mamamayan."

Walang komento: